Amose 6

Hankàñe ry mierañerañe e Tsione ao, naho o mipalitse ami’ty vohi’i Someroneo, o roandriam-pifeheañe valoha’e iatoa’ty anjomba’Israeleo! Mionjona mb’e Kalnè mb’eo le isao, akia henane zay mb’e Kamate jabajabay; vaho mizotsoa mb’e Gate nte-Pilistiy mb’eo. Ho soa te amy fifeheañe retiañe hao iereo? mandikoatse ty efe-tane’areo hao ty a iareo? Ry mampihànkañe i andron-kankàñey vaho mampitotoke i fiambesan-karotsahañey; o mitsalalampatse am-pandreañe nihamineñe hafotia-nife naho mihitsy an-kidori’iareo, vaho mikama anak’añondry boak’amy lia-raikey naho sarake boak’añivon-jolokeo; o mititike marovany arahem-peo vaho mamoroñe raham-pititihañe, manahake i Davideo; o minon-divay an-tsini-hara naho mihosotse menake soao, fe tsy iroveta’e ty hasotria’Iosefe. ie amy zao, hasese mb’an-drohy mb’eo ho mpiaolom-pirohy, vaho hafahañe añe ty sabadida’o mpihity an-telo-antarao. Fa nifanta amam-bata’e t’Iehovà, Talè; le hoe t’Iehovà Andrianañahare’i màroy, Hejeko ty fiebotsebora’Iakobe, naho mampangorý ahy o anjomba’eo: aa le hatoloko añe i rovay rekets’o ama’e iabio. Ie henane zay, naho lahilahy folo ty sisa añ’anjomba raike, fonga hihomake. Ho rambese’i rahalahin-drae’e kiraikiraike iereo hañakara’e añ’anjomba’e ao hañoroa’e, le ty hoe ty hanoe’e amy añ’anjomba aoy, Mbe ama’e hao irehe? le ty hoe ty hatoi’ty ao, Aiy! vaho hoe ka i raikey. Mianjiña, fa tsy volañeñe ty tahina’Iehovà. Inao fa handily t’Iehovà te ho tseratseraheñe o anjombao vaho ho hotohotoeñe o kibohotseo. Hilay ambatovato hao o soavalao? hitari-dasarý eo reketse katràka hao t’indaty? Mañino te nafote’areo ho voreke ty havañonañe, vaho ho vahon-tsoy ty vokan-kavantañañe? Ry mpirebek’amo raha tsy vente’eo, manao ty hoe: Tsy ty haozara’ay avao hao ty nahavontititse tsifa? Inao arè, ry anjomba’Israeleo te hatroako haname anahareo ty fifeheañe, hoe t’Iehovà Andrianañahare’i màroy, le ho silofe’iereo boak’am-piziliha’i Kamate eo pak’an-tsaka’Arabà añe.

Subscribe to our newsletter

Install Église Locale