Samoele I 27

Aa hoe ty fitsakorean-tro’i Davide: Indraik’andro ke ho faopaohem-pità’i Saole iraho; aa ino ty hahasoa ahy mandikoatse te hibioñe mb’an-tane’o nte-Pilistio mb’eo; toe hafoe’i Saole iraho tsy hipay ahy an-tane Israele ao ka; aa le ho poliorako o fità’eo. Niavotse amy zao t’i Davide nitsake mb’eo rekets’i lahilahy enenjato mpiama’e rey; mb’amy Akise, ana’i Maòke, mpanjaka’i Gate mb’eo. Aa le nindre nimoneñe amy Akise e Gate ao t’i Davide, ie naho ondati’eo, songa an-kasavereña’e naho i Davide rekets’i vali’e roe rey, i Akinoame nte-Iezreele, vaho i Abigale nte Karmele, nivali’i Nabaley. Ie natalily amy Saole te nivoratsake mb’e Gate añe t’i Davide; le tsy nipaia’e ka. Le hoe t’i Davide amy Akise: Aa naho nahatrea fañisohañe am-pihaino’o iraho, le anoloro toetse raik’amo rova an-kalokeo; fa ino ty himoneña’ty mpitoro’o an-drovam-panjaka mindre ama’o atoa? Natolo’i Akise aze ty Tsiklage amy andro zay; aa le atao hanañam-panjaka’Iehodao pak’androany ty Tsiklage. Le ty hamaro’ty andro nimoneña’i Davide an-tane’o nte-Pilistio: taoñe raike-tsi-efa-bolañe. Nionjoñe mb’eo amy zao t’i Davide rekets’o mpiama’eo, naname o nte-Gesorio naho o nte-Gizrio vaho o nte-Amalekeo, amy t’ie nimoneñe an-tane haehae, amy fañaveloa’o boak’e Sore pak’an-tane Mitsraimey. Zinevo’i Davide i taney, le tsy napo’e ho veloñe ndra lahilahy ndra ampela, naho tinava’e iaby o añondrio naho o añombeo naho o borìkeo naho o ramevao vaho o saroñeo. Le nimpoly mb’e Akise mb’eo. Le hoe t’i Akise: Aia ty nañatsafa’o lalañe anindroany? Le hoe t’i Davide: Añ’ila’Iehodà atimo añe, naho atimo’o nte-Ierakmileo mb’atimo’o nte-Kenio. Ndra lahilahy ndra ampela tsy nado’i Davide ho veloñe hera hitaroñeñe amy Gate ty hoe: Zao ty nanoe’i Davide. Ie ty nanoe’e amo hene andro naha-tan-tane’o nte-Pilistio azeo. Niantok’i Davide t’i Akise, ie nanao ty hoe: Toe nampitrotrotse vatan-dre am’ondati’e Israeleo; aa le ho mpitoroko nainai’e.

Unseren Newsletter abonnieren

Église Locale installieren