Samoele I 11

Nionjoñe mb’eo amy zao t’i Nakase nte-Amone, nitobe am-piatrefañe I abese-Gilade eo: le nanao ty hoe amy Nakase iaby o nte-Iabeseo: Mifañinà ama’ay vaho hitoroña’ay. Le hoe t’i Nakase nte-Amone am’iereo: Inao arè ty fepètse hanoeko ama’areo, te songa hakatrake o fihaino’areo ankavanao ho fañinjeañe am’Israele iaby. Le hoe o mpiaolo’Iabeseo ama’e: Toloro fito androm-panintsiñan-jahay hañitrifa’ay mb’an-tane’Israele iaby; ie amy zay naho tsy eo ty handrombak’anay le hiakatse mb’ama’o mb’eo. Nivotrake e Gibàn-tSaole ao o ìrakeo le nisaontsie’e an-dravembia’ondatio i entañe zay vaho fonga nipoñake ty rovetse ondatio. Nañorike mpirai-troke boak’an-tetek’ao t’i Saole, le hoe t’i Saole: Ino ty mañore ondatio t’ie mirovetse? Aa le nitalilia’iareo ty saontsi’o nte-Iabeseo. Ie nahajanjiñe i entañe zay t’i Saole le nentoe’ty Arofon’Añahare, vaho nisolebotse ty haviñera’e. Rinambe’e i katràka mpirai-joka rey, le linili-lili’e, naho nahitri’e mb’an-tane’Israele mb’eo mb’eo am-pitàn’ìrake, ami’ty hoe: Ze tsy mionjoñe mb’eo am-panonjohizañe i Saole naho am-pañorihañe i Samoele, le zao ka ty hanoañe o katràka’eo. Aa le nifetsak’am’ondatio ty fañeveñañe am’Iehovà, vaho niakatse mb’eo hoe ondaty raike. Niahe’e e Betseke ao: telo hetse ty ana’Israele vaho telo-ale o nte-Iehodao. Aa le hoe ty asa’iareo amo ìrake nivotrakeo: Zao ty ho enta’areo amo nte-Iabese-giladeo: hamaray aolo’ty mafana-voho t’ie hitendreke rombake. Nibalike naho nitalily amo nte-Iabeseo o irakeo le niehake, vaho hoe o nte-Iabeseo: Hamaray ty hiakara’ay mb’ama’areo vaho hanoe’areo ama’ay ze satrin’arofo’areo. Aa ie maraiñe, zinara’i Saole an-dia-rai’e telo ondatio le nimoak’an-tobe ao am-pijilovañe maraindraiñey vaho zinevo’iereo o nte-Amoneo am-para’te mafana-voho; niparaitake iaby ze nisisa kanao tsy nahaisahañe roe miharo lia. Le hoe ondatio amy Samoele; Ia o nivolañe ty hoe: Hahafehe antika hao t’i Saoleo? Aseseo mb’atoa indaty rezay hañohofan-doza. Fe hoe t’i Saole: Leo raik’am’ondatio tsy havetrake te anito, fa nanao fandrombahañe e Israele ao t’Iehovà anindroany. Le hoe t’i Samoele am’ondatio, Antao homb’e Gilgale mb’eo hamentesan-tika ty fifeheañe. Aa le niheo mb’e Gilgale mb’eo ondaty iabio naho nanoe’iereo mpanjaka añatrefa’Iehovà e Gilgale t’i Saole; le nisoroñe engam-panintsiñañe añatrefa’Iehovà; vaho nandia taroba t’i Saole naho o ana’Israele iabio.

Unseren Newsletter abonnieren

Église Locale installieren