Mpanjaka I 11

F’ie nikoko ampela ambahiny maro t’i Selomò, tovo’i anak’ampela’i Paròy, le ampela nte-Moabe, nte-Amone, nte Edome, nte-Tsidone, vaho nte-Kite; boak’amo fifeheañe nitsarae’Iehovà amo ana’Israeleo ty hoe: Ko iolora’areo, naho ko apoke hiharo-tihy ama’areo; fa toe hampitolihe’iereo amo ‘ndrahare’iareoo ty arofo’areo; ie nisazohe’i Selomò am-pikokoañe. Nanambaly fiton-jato re ho tañanjomba’e naho sakeza telon-jato; vaho nampandrìke ty arofo’e o vali’eo. Ie nibey, le nampitolihe’o vali’eo mb’an-drahare ankafankafa, vaho tsy nigahiñe am’Iehovà Andrianañahare’e ka ty tro’e manahake ty arofo’i Davide rae’ey. Songa norihe’i Selomò t’i Asterote ‘ndrahare’o nte-Tsidoneo, naho i Milkome ty haloloa’o nte-Amoneo. Aa le nanao hatsivokarañe am-pivazohoa’Iehovà t’i Selomò, ie tsy nañorike Iehovà an-kaliforan-troke, manahake i Davide rae’e. Niranjie’i Selomò an-kaboañe ey ty Kemose, i haloloa’i Moabey, am-bohitse atiñana’Ierosalaime ey, naho ho amy Moleke, ty haloloa’o nte-Amoneo. Nanoa’e izay amo vali’e ambahiny iaby nañoro emboke naho nanao soroñe aman-drahare’eo. Toly ndra niviñera’Iehovà t’i Selomò, ty amy arofo’e nandifik’am’Iehovà Andrianañahare’Israeley, ie fa niheo ama’e indroe; vaho linili’e ama’e ty amo raha zao te tsy horihe’e o ‘ndrahare ila’eo; fe tsy nambena’e i nandilia’Iehovà azey. Aa le hoe t’Iehovà amy Selomò, Kanao zao ty an-tro’o, naho tsy tana’o i fañinakoy naho o fañèko liniliko azoo, le toe ho riateko ama’o ty fifehea’o vaho hatoloko am-pitam-pitoro’o. Fe tsy hanoeko amo andro’oo, ty amy Davide rae’o, te mone ho tavaneko an-tañan’ana’o. Tsy ho fonga tavaneko i fifeheañey, fa hatoloko ami’ty ana’o ty fifokoañe raike ty amy Davide mpitoroko; naho ty am’Ierosalaime jinobokoy. Le nampitroboe’Iehovà rafelahy t’i Selomò; i Kadade nte-Edome, tirim-panjaka’i Edome. Ie te Edome añe t’i Davide, naho fa nionjomb’eo handenteke o nikoromakeo t’Ioabe mpifehe i valobohòkey, ie fonga zinevo’e ze atao lahilahy Edome— toe tàmbatse ao enem-bolañe t’Ioabe rekets’Israele iaby ampara’te naito’e ze fonga lahilahi’i Edome— le nitriban-day mb’e Mitsraime añe t’i Kadade naho ty ila’o mpitoron-drae’eo, ie mbe anak’ajaja t’i Kadade. Niavotse i Midiane iereo nivotrake e Parane, le nandrambe ondaty e Parane vaho nigodañe mb’e Mitsraime, mb’amy Parò Mpanjaka’i Mitsraime mb’eo, le tinolo’e anjomba naho mahakama vaho tane. Nanjo fañisohañe ra’elahy am-pahaoniña’i Parò t’i Kadade, kanao natolo’e aze ho tañanjomba’e ty rahavaven-tañanjomba’e, ty rahavave’i Takpanese mpanjaka ampela. Nisamake i Genobate ana-dahi’e ho aze ty rahavave’i Takpanese, ze nibeize’i Takpanese añ’anjomba’i Parò; vaho nitraok’amo ana’i Paròo añ’anjomba’i Parò t’i Genobate. Aa ie jinanji’i Kadade e Mitsraime añe te nitrao-pirotse aman-droae’e t’i Davide naho te nihomake t’Ioabe mpifehe’i màroy, le hoe t’i Kadade amy Parò. Ampiavoto mb’an-taneko añe. Le hoe t’i Parò ama’e, Fa inoñe ty tsy niampe tamako kanao mipay hañavelo mb’an-tane’o añe irehe? Tsy eo, hoe re, Fe apoho handeha avao. Mbore nampitroboen’Añahare ty rafelahy raike ka, i Rezone ana’i Eliadà, i nilay amy talè’e Hadadezere mpanjaka’i Tsobày, namory ondaty ho mpiama’e vaho nimpifehe firimboñañe, ie fa zinama’i Davide o e Tsobào, le nimb’e Damesèke mb’eo iereo nimoneñe ao, vaho nifehe e Damesèke. Nirafelahi’Israele re amo hene andro’i Selomòo, ie nitovoñe’e ty haemberañe nanoe’i Kadadeo; niheje’e t’Israele vaho nifelek’i Arame. Nañonjo fitañe amy mpanjakay ka t’Iarovame ana’i Nebate nte-Efratà boake Tseredà, mpitoro’i Selomò; Tseroà ty tahinan-drene’e, vantotse. Inao ty nañonjona’e fitañe amy mpanjakay: Niranjie’i Selomò ty Milo vaho namboara’e o heba an-drova’i Davide rae’eo. Nifanalolahy an-kaozarañe t’Iarovame; le nioni’i Selomò te nahimbañe i ajalahiy, vaho nampifehè’e aze o fitoloñañe añ’anjomba’Iosefeo. Ie henane zay, naho niavotse Ierosalaime t’Iarovame, te tendrek’ama’e amy lia’ey t’i Akià nte-Silò, nisikin-damba vao, ie nivahiny an-kivok’añe iereo roe. Rinambe’i Akià i lamba vao ama’ey le niriate’e ho folo-ro’amby; le hoe re amy Iarovame, Rambeso ty folo, fa hoe ty nafè’Iehovà Andrianañahare’Israele, Inao te ho riateko am-pità’i Selomò i fifeheañey vaho hatoloko azo ty fifokoañe folo; le hanañe fifokoañe raike re ty amy Davide mpitorokoy naho Ierosalaime, rova nijoboñeko amo hene fifokoa’Israeleo, amy t’ie namorintseñe Ahy vaho mitalaho amy Astorete, mpanjaka-ampela’o nte-Tsidoneo naho amy Kemose, ‘ndrahare’o nte-Moabeo, naho amy Milkome, mpanjaka’o ana’i Amoneo vaho tsy mañavelo amo lalakoo hanoa’iereo ty soa a masoko naho hifahatse amo fañèkoo vaho amo fepèkoo manahake i Davide rae’ey. Tsy ho fonga tavaneko am-pità’e i fifeheañey; fa hanoeko mpifehe amo hene andro hiveloma’eo, ty amy Davide mpitoroko jinobokoy, ie nañambeñe o lilikoo naho o fañèkoo; fe ho rambeseko am-pità’i ana’ey i fifeheañey, vaho hatoloko azo i fifokoañe folo rey. Le ho tolorako fifokoañe raike i ana’ey, hanaña’i Davide mpitoroko ty failo añatrefako nainai’e e Ierosalaime ao, i rova jinoboko ho Ahy ampipohako ty añarakoy. Ho rambeseko irehe, le ho hene fehè’o ze satrin-tro’o, vaho ihe ty ho mpanjaka’Israele. Ie amy zao naho hene haoñe’o ze andiliako azo naho hañavelo amo lalakoo naho hanao ty vantañe a masoko, hañambeñe o fañèkoo naho o lilikoo manahake i Davide mpitorokoy le ho mpiama’o iraho vaho hanoako anjomba mijadoñe, manahake ty namboarako i Davide, vaho hatoloko ama’o t’Israele. Ie amy zay hampisotriako ty tiri’i Davide fe tsy ho kitro añ’afe’e. Aa le nipay hañoho-doza am’Iarovame t’i Selomò; f’ie niongake nitriban-day mb’e Mitsraime añe, mb’amy Sisage mpanjaka’i Mitsraime vaho nitambatse e Mitsraime añe ampara’te nihomake t’i Selomò. O fitoloña’i Selomò ila’eo, naho o tolon-draha’e iabio, tsy fa sinokitse amy bokem-pitoloña’i Selomòy hao? Ty hene andro nifehea’i Selomò Israele e Ierosalaime ao le efa-polo taoñe. Le nitrao-pirotse aman-droae’e t’i Selomò, naho nalentek’an-drova’i Davide rae’e ao; vaho nandimbe aze nifehe t’i Rekhavame, ana’e.

订阅我们的新闻通讯

安装 Église Locale