Mikà 7

Hankàñe amako! fa manahake i nipòk’amo vokan’asara fa natontoñeoy, tsy am-pirotorotom-baloboke ho haneñe; ndra valoham-boa hampilelalela ty fiaiko. Fa nifaoheñ’an-tane atoy t’indaty mañori-Kake, tsy ao ty mahity am’ondatio; songa miampitse handrendreke lio, sindre mifañoroñe an-karato o mpirahalahio. Fità-roe ty mahatafetetse o sata rati’eo; ipaia’i roandriañey naho takea’i mpizakay ty vokàñe; aboa’ty bey ty fikitrohan-tro’e, vaho rarè’iereo hitraoke. Hoe hìsatse ty soa am’iereo, hoe vovom-patike ty mahity ama’e; i andro ampitsatohe’o mpijilojiloy: tondroke ty fitilihañe azo; ho doboñe iereo henane zay. Ko miato rañetse, ko mirampy aman-atehena; amy màndre añ’araña’o eoy, itaò o soñi’oo. Fa mañamavo an-drae’e ty ana-dahy, miatreatre an-drene ty anak’ampela, ty vinanto-ampela aman-drafoza’e ampela; rafelahi’ondatio t’indaty añ’akiba’e ao. Aa naho izaho, hitamà Iehovà; ho liñisako i Andrianañaharem-pandrombahakoy; hijanjiñe ahy t’i Andrianañahareko. Ko mirebeke ahy, ry mpalaiñ’ahio, ndra t’ie mikorovoke, mbe hitroatse; ndra mitobok’añ’ieñe ao, Iehovà ro hazavàko. Ho vavèko ty haviñera’Iehovà amy t’ie nandilatse ama’e, ampara’te ihalalia’e ho ahy, naho ampijadoña’e zakam-pañisohañe; ie hakare’e mb’an-kazavàm-b’eo, vaho ho treako ty havantaña’e. Ho oni’i rafelahikoy izay, vaho ho saroña’ty hasalarañe ty nanao amako ty hoe: Aia t’Iehovà Andrianañahare’o? Ho sambae’o masokoo, ie ho lialiàñe hoe fotak’an-dalañe eo henane zay. Ho androm-pampitroarañe o kijoli’oo amy andro zay, hibolea’i Hake mb’eo mbe’o. Ho androm-pitotsahañ’ama’o, boak’Asore naho i Mitsraime, boake Mitsraime pak’amy sakay; eka, boak’an-driake pak’an-driake, vaho boak’am-bohitse pak’am-bohitse, Le ho koake i taney ty amo mpimone’eo, ho vale’ty hatsivokaram-pitoloña’iareo. Araho an-kobai’o ondati’oo, i lia-rain-dova’o rerek’añ’ala ao, an-teñateñan-tane marorok’aoy; andrazo mb’e Basane naho mb’e Gilade mb’eo iereo manahake tañ’andro haehae. Manahake tañ’andro nañakarako azo an-tane Mitsraime ao, le hampiboahako raha fanjaka. Ho oni’o kilakila’ondatio le ho salatse ndra te maozatse; hamihim-palie am-pitàñe vaho ho valagìñe an-dravembia. Ie hitsela deboke hoe mereñe, hititititike t’ie miakatse an-kijoly ao hoe merembitike hirik’an-tane ao; hangebahebake t’ie miheo mb’am’Iehovà Andrianañaharentika, vaho hañeveñe ama’o iereo. Ia t’i Andrianañahare hañirinkiriñe Azo, Mpañafa-kakeo, naho mampipoke ty fiolà’o honkahonkan-dova’eo! Tsy tana’e nainai’e ty haviñera’e, vaho ifalea’e ty fiferenaiñañe. Hiferenaiña’e indraike tika, ho lialiàm-pandia’e o hakeon-tikañeo; Eka! hahifi’o an-driake lalek’ao o tahi’iareoo. Ho tolora’o havantañañe t’Iakobe, naho fiferenaiñañe t’i Avrahame, i nifantà’o aman-droae’ay haehae izay.

订阅我们的新闻通讯

安装 Église Locale