Hebreo 7

I Melkizedeke ‘nio, nimpanjaka’i Salema, mpisoron’Añahare Andindimoneñey, ie ty nifanalaka amy Abraàme nimpoly amy nandrebaha’e i mpanjaka rey naho nitata’e, le nitolora’i Abraàme ty fahafolo’ze he’ey—ie atao Mpanjakan-kavantañañe hey, ty amy dika i tahina’ey, vaho Mpanjaka’i Salema ndra Mpanjakam-panintsiñañe; ie tsy aman-drae, tsy aman-drene, tsy aman-toñon-droae, tsy aman’androm-pifotora’e, tsy amam-pitamperan-kaveloñe, fe nampanahafeñe amy Anan’Añaharey, mitoetse ho mpisoroñe nainai’e tsy modo. Haraharao heike ty hara’elahi’indatiy kanao nitolora’i Abraàme raentika ty faha-folo’o kinopa’eo. Le toe lilie’i Hake o tarira’i Levy norizan-ko mpisoroñeo ty hanontoñe am’ondatio, toe amo longo’eo, i faha-foloy, ie boak’am-pisafoa’i Abraàme. Le i tsy toñoneñe aman-droae’iareoy ty nandrambe ty faha-folo amy Abraàme vaho nitata i nampitamàñey. Tsy kalafo te mitata ty zay ty zoke. Naho atoy re le rambese’ondaty mbe hihomakeo i faha-foloy, fe i añey ro taroñeñe te veloñe. Aa ie tsaraeñey, i Levy mpandrambe i fahafoloy, ro nandoa ty faha-folo añamy Abraàme, amy t’ie tampisafoan-droae’e ao te nifanalaka amy Melkizedeke. Aa naho nahafonitse ty fisoroña’i Levy (toe ama’e ty nandrambesa’ondatio Hake) le inoñe amy zao ty ipaiañe mpisoroñe hitroatse amy famosora’i Melkizedekey, fa tsy amy famosora’i Aroney? Aa kanao vaoeñe i famosorañey, tsy mahay tsy vaoeñe ka t’i Hake. Amy te foko hafa i tsaraeñey, le tsy ama’e ty nitoron-kitrely. Toe fohiñe te tarira’i Joda i Talèn-tika, fe tsy nisaontsie’i Mosè fisoroñañe t’i Joda, miha-malange te mpisoroñe manahak’i Melkizedeke ty nitroatse, ie tsy nanoeñe am-pepè’i Hake ty am-panoñonan-drae, fa an-kaozaran-kaveloñe tsy modo. Ty hoe ty nitaroñe’e: Mpisoroñe nainai’e irehe Amy famosora’i Melkizedekey. Toe miha-modo i fepetse taoloy ami’ty hamavazoa’e naho ty tsy fahalefea’e, (amy te tsy eo ty nahatafetere’i Hake), fe nipoteake ty fitamàn-tsoa, hitotofan-tika aman’Añahare; mbore nanoeñe am-panta, (toe tsy fanoeñ’am-panta o mpisoroñeo, f’itoy ro am-panta, ie nanoeñe ty hoe: Toe nifanta t’Iehovà vaho tsy hihotike: Mpisoroñe nainai’e irehe.) Antsake t’ie ho fañina soa, amy te mitsoak’aze t’Iesoa. Maro i mpisoroñe rezay, ie tsy mijadoñe am-pitoloña’e fa agadon-kavilasy. Fa itìañe ka, kanao mitoloñe nainai’e, ro am-pisoroñañe tsy ifandimbezañe. Izay ty talim-pahahenefa’e rombake do’e o mitotok’aman’Añahare añama’eo, ie veloñe nainai’e hihalaly ho a iareo. Mañeva an-tika i Mpisorombey zay: ie masiñe, tsy aman-tahiñe, tsy aman-kila, miavak’amo aman-kakeoo, vaho nonjoneñe ambone’o likerañeo. Ie tsy mipay boak’andro, manahake o mpisoroñe taoloo, ty hañenga soroñe ho amo tahi’eo hey vaho ho amo hakeo’ondatio. Fa nanoe’e indraik’avao ie nañenga i fañòva’ey. Oriza’i Hake t’indaty aman-kila ho mpisorom-bey; fe i tsara am-panta sinokitse tafara’i Hake ty nañorizañe i Anake nifonireñe ho nainai’ey.

订阅我们的新闻通讯

安装 Église Locale