Zekarià 2

Nampiandraeko maso le nahatrea te ingo ty tsifa efatse. Le hoe iraho amy anjely nifanaontsy amakoy, Inoñ’o raha zaoo? Le hoe re amako: I tsifa nampiparaitake Iehoda naho Israele vaho Ierosalaime rey. Natoro’Iehovà ahy ty mpandranjy efatse. Le hoe ty asako: Hitoloñe inoñe t’ie nitotsak’atoy? Le hoe ty tinaro’e: O tsifa retiañe ty nampivarakaike Iehoda kanao leo ondaty raike tsy nahaongake ty añambone’e; le nivotrak’atoy i retiañe hañembañe iareo naho handretsake o tsifa’o kilakila’ondaty nampitroatse ty tsifa’e an-tane’Iehoda hampiparatsàke azeo. Nampiandraeko maso le nahatrea te ingo t’indaty minday talim-panjeheañe am-pità’e. Le hoe iraho: Homb’aia v’iheo? Le hoe re amako: Hanjehe Ierosalaime, hahaisake ty am-pohe’e naho ty an-dava’e. Aa le ingo nionjom-beo i anjely nisaontsy amakoy, vaho niakatse mb’eo ka ty anjely raike hifanalaka ama’e, le nanoe’e ty hoe: Mihitrifa, saontsio ty hoe amo ajalahio: Himoneñe tsy aman-kijoly t’Ierosalaime ty ami’ty hatsifotofoto’ondaty naho añombe ama’e. Amy te, Izaho, hoe t’Iehovà ty ho kijolin’afo ama’e hañarikatok’aze; Izaho ty ho enge’e añivo’e ao. Hoke! mirifata boak’an-tane avaratse añe, hoe t’Iehovà; fa naboeleko añe manahake o tiok’efa’i likerañeio nahareo, hoe t’Iehovà. Hoke! ry Tsione, mibolitiora ry mpimoneñe amy anak’ampela’i Baveley; fa hoe ty nafè’Iehovà’i Màro, nañirak’ahy hitoha engeñe amo fifeheañe nikopak’azoo: Toe mipaoke ty saintem-pihainoko ze mitsapa anahareo. Ingo te hahelahelako ambone’iereo ty tañako, le ho fikopaha’o nitoroñe iareoo; vaho ho fohi’o te Iehovà ro nañirak’ahy. Misaboa naho mirebeha, ry anak’ampela’i Tsione; fa ingo ho avy iraho himoneñe añivo’o ao, hoe t’Iehovà. Maro o fifeheañe hirekets’am’Iehovà amy andro zaio ty ho ondatiko, le himoneñe añivo’o ao iraho; vaho hapota’o te Iehovà’i maroy ro nañirak’ahy. Ho rambese’Iehovà t’Iehoda ho anjara’e amy tane miavakey vaho ho joboñe’e indraike t’Ierosalaime. Mianjiña, ze kila nofotse, añatrefa’Iehovà, ie fa nivañoñe naho niavotse i akiba’e miavakey.

Prenumerera på vårt nyhetsbrev

Installera Église Locale