Tesalonika I 1

Tesalonika I 1

I Paoly naho i Silasy vaho i Timoty, Ho ami’ty Fivori’o nte-Tesalonika aman’Añahare Rae naho i Talè Iesoà Norizañeio: Fierañerañañe naho Fañanintsiñe Andriañe’ay nainai’e t’Andrianañahare ty ama’areo iaby, manoñoñe anahareo amo halali’aio; le tiahi’ay lomoñandro ty fitoloña’areo am-patokisañe naho ty fitromaha’areo aman-koko naho ty figahiña’areo mitamà i Talèntika Iesoà Norizañey añatrefan’Añahare Raen-tika. Fohi’ay ry roahalahy kokoan’Añahareo, te jinobo’e, fa tsy nitotsake ama’areo an-tsara avao i talili-soa’aiy; fa aman-kaozara’i Arofo Masiñey vaho am-pireketan-tro añoñe. Fohi’areo ka ty fañaveloa’ay ama’areo. Toe nitsikombe anay naho i Talè nahareo; fa ndra te nanjoan-kaloviloviañe, le rinambe’areo an-kafalea’i Arofo Masiñey i tsaray. Aa le nitsikombea’ze hene mpiato e Makedonia naho Akaia añe. Le tsy e Makedonia naho e Akaia añe avao ty nampiboelea’areo ty saontsi’i Talè, fa toe nikatsakatsake an-toets’aia’aia o fatokisa’areo an’Andrianañahareo vaho tsy anovoña’ay rehake, fa italilia’iareo ty hasoam-pampihovà’areo anay, ie nitolik’aman’Añahare naho niamboho ami’ty fahasive, mitoroñe an’Andrianañahare veloñe naho to, vaho mandiñe i Ana’e andindìñey, i natroa’e an-kavilasiy— Iesoà mpañaha antika amy haviñerañe ho aviy.

Prenumerera på vårt nyhetsbrev

Installera Église Locale