Iirmeà 2

Le niheo amako ty tsara’Iehovà, nanao ty hoe: Akia mikoiha an-dravembia’Ierosalaime ao ty hoe: Hoe t’Iehovà: tiahiko ty hatea’i hatora’oy, ty fikokoa’o, ihe nienga-vao; i fireketa’o amako an-dratraratray an-tane mboe tsy nitongisañe añe. Niavake am’Iehovà t’Israele, ty lohavoan-kavokara’e; hanan-kakeo ze mampibotseke ama’e, hankàñe ty hizò iareo, hoe t’Iehovà. Mijanjiña ty tsara’Iehovà, ry anjomba’Iakobe, naho ry hene fifokoan’anjomba’Israele; Hoe t’Iehovà: Ino ty tsi-havañonañe nizoe’o roae’areoo amako, kanao nihankaña’e, naho nañorike ty tsy jefa’e, vaho nifotsake ho kafoake? Mbore tsy nanao ty hoe iereo: Aia t’Iehovà nanese antika niakatse an-tane Mitsraime, niranga i fatram-beiy, i tanen-diolio naho koboñey, i tanem-paosa an-talinjon-kavilasiy, tane mb’e lia’e tsy nitsahe ‘ondaty, vaho tsy fimoneña’ty ana’ondaty. Nendesako mb’an-tane mamokatse, hikama’areo ty hasoa’e; fa ie nizilik’ao te mone tiniva’areo i tanekoy, vaho vineta’areo i lovakoy. Tsy nanao ty hoe o mpisoroñeo: Aia t’Iehovà? Namoea’o mpamandroñe Hàke iabio iraho, nandilatse ahy o mpiarakeo, nitoky añamy Baale o mpitokio, vaho nañorike raha tsy vara. Aa le hiatreatreako, hoe t’Iehovà, vaho hatreatrèko o anan’ana’areoo. Mitsahà mb’an-tokonosen’te-Kitìmeo añe naho mandrendreha naho ampañitrifo mb’e Kedare mb’eo vaho mitsoeha, hera ho oni’areo te fa teo, o hoe zao: Tane aia ty nañova o ‘ndrahare’eo, ie toe ‘ndrahare tsie avao? fe nasolo’ondatiko raha tsy manjofake ty enge’iareo. Ilatsao ry likerañeo, minevenevèra naho mijehàra, hoe t’Iehovà. Nanao hakeo roe ondatikoo: Nifarie’iareo iraho, i Rano Veloñe migoangoañey, hihalia’iareo kadaha, kadaha señake tsy mahatan-drano. Ondevo hao t’Israele? Fetrek’oro hao? Aa le ino ty idohirañ’aze? Fa nitroñe ama’e o liona tora’eo, nipoña-peo hampangoakoak’i tane’ey, kòake iaby o rova’eo, tsy amam-pimoneñe. Hinara’o ana’i Nofe naho i Tak’penkeseo ty hevo’o. Tsy zao hao ty tali’i raha zay, te naforintse’o t’Iehovà Andrianañahare’o, i niaolo azo amy lalañeiy. Ino mb’arè ty atao’o an-dalam-b’e Mitsraime añe, hitohoke ty ranon-tSikore hao? Ino ka ty hanoe’o an-dalañe mb’e Asore mb’eo, he hitrinike i ranon-tSàkay hao? Ty halò-tsere’o avao ty hitrevok’azo, naho hañendak’azo ty fidisa-voli’o; mahaoniña arè, vaho mahaisaha te raha raty naho mafaitse ty fitsambolitio’o an’Andrianañahare’o, naho te tsy ama’o ty fañeveñañe Amako, hoe t’i Talè, Iehovà’i Màroy. Fa pinozako haehae ty joka’o, rinafadrafako o vahotseo, le hoe irehe: Tsy ho toroñeko, te mone nandrea’o vaho nanao hakarapiloañe ambone’ze hene haboañe naho ambane’ze fonga hatae mandrevake Ie naketsako am-bahem-panjàka, toe am-boa’e soa do’e; inom-barè ty nifotera’o ho hatae tsy jefa’e, ho vahe alik’amako? Aa ndra te ihe mikitroñe an-kilìny, vaho milipotse an-tsavony ao, mboe komatrao amako o tahi’oo, hoe t’i Talè, Iehovà. Aa vaho ino ty atao’o ty hoe: Tsy aman-kila iraho, izaho tsy nihitrike mb’amo Baaleo? Isao ty sata’o am-bavatane ao, mahafohina o anoe’oo; kiloan-drameva malisa irehe, manivalativala o lala’eo; tamanam-birike lý zatse am-patrañe ao, mañantson-tioke am-pañirian-tro’e, ia ty mahafikalañe i fitongoña’ey? Tsy ho mokotse ty mipay aze, ho oni’iareo amy fivola’ey. Tano o fandia’oo tsy ho afa-kana, ty tretra’o tsy haran-drano; fe hoe irehe: Tsy aman-ko tamaeñe, Aiy! amy te nikoko ambahiny iraho, le tsy mete tsy heañeko. Hambañe ami’ty hasalara’ty mpikizo, ie tendreke, ty hameñara’ty anjomba’Israele: ie naho o mpanjaka’eo, o roandria’eo, o mpisoro’eo, vaho o mpitoki’eo. Ie manao ami’ty hatae ty hoe: Raeko irehe, naho ami’ty vato: Ihe ty niterak’ahy, toe nampiatre-boho amako iereo fa tsy ty laharañe; fe an-tsa maha am-poheke ro hanoa’iareo ty hoe: Miongaha, rombaho zahay. Aia heike o ‘ndrahare tsinene’o ho azoo? Angao hiongake iereo, naho mete handrombak’azo an-tsan-kankà’o ao; fa mira ami’ty hamaro’o rova’oo ty ndrahare’o, ry Iehodà. Akore t’ie miatreatre ahiko? Ie fonga nanao hakeo amako, hoe t’Iehovà. Tsy jefa’e ty nandafàko o ana’areoo, ie tsy mete avohotse; toe nabotsem-pibara’areo o mpitoki’areoo, hoe namotsahan-diona. Ry tariratseo, inao ty tsara’Iehovà: Nifatram-bey am’Israele hao iraho? ndra tane migobon-kaiem-bey? Ino ty atao’ondatikoo ty hoe: Votsotse zahay; tsy homb’ama’o ka? Handikofa’ty somondrara hao o rava’eo, ndra ty enga-vao o saro’eo? Fe haliño’ondatikoo andro tsy fotofoto iraho. Ino ty ihamina’o ty lalam-pipaia’o koko? Toe nanare’o amo sata-rati’oo ka o kalalijakeo. Mbore oniñe an-jipo’o ao ty liom-piai’o rarake vañoñeo; tsy nirendre’o t’ie niboroboñake ama’o; ie amy hoe rezay manao ty hoe: Izaho tsy aman-kakeo; fa mitolik’amako ty haviñera’e— ingo mikai-jaka amako irehe ami’ty atao’o ty hoe: Tsy aman-tahin-draho. Ie mikanifokanifoke avao ami’ty fiovà’o lalañe; Toe ho salare’i Mitsraime ka manahake ty hameñara’o amy Asore. Boak’atoy ty hiakara’o, taña-mitan-doha; fa napo’Iehovà o niatoa’oo, vaho tsy hiraorao am’iereo irehe.

Prenumerera på vårt nyhetsbrev

Installera Église Locale