Amose 8

Zao ty natoron’Añahare Talè ahy; Ingo ty vakoa pea havokaran’asara. Le hoe re, O Amose, ino o isa’oo? Le hoe iraho, Ty vakoam-boan’asara. Vaho hoe t’Iehovà amako, Fa tondrok’am’ondatiko Israeleo ty figadoña’e; ie tsy hapoko ka. Ie amy andro zay handimbe o sabo añ’anjombao ty bekom-pandala, hoe t’Iehovà, Talè: ho pea lolo atoy naho aroa i taney; le havokovoko am-pianjiñañe añe iereo. Janjiño izao ry mpigedrañe o rarakeo, ry mpañito o poi’e amy taneio, ie manao ty hoe, naho añe i pea-bolañey le haletan-tika i ampembay; naho modo i andro Sabotsey le ho sokafen-tika o an-drihao, ho tomoreñe ty kapoake, naho honjoneñe i dralay, vaho hampivilañeñe am-pañahy o balantsio. Ho kaloen-tika drala o rarakeo naho hana roe o poi’eo, vaho haletan-tika reke-kafo’e i ampembay. Fe nifanta ami’ty volonahe’Iakobe t’Iehovà, Le lia’e tsy haliñoko o sata’iareoo. Tsy hampiozoñozoñe i taney hao zay: hampandala o hene mpimoneñeo? hanganahana manahake i Sakay, hivalitaboake vaho hiketrake indraike manahake i saka’i Mitsraimey. Ho tondrok’amy andro zay, hoe t’Iehovà, Talè, te, hampitsoforeko an-tsipinde-mena i àndroy, vaho ho lombofako ieñe ty tane toy añ’andro mazava; naho hafoteko ho fandalàñe o sabadida’areoo naho ho firovetañe o sabo’areoo; fonga hampisikineko gony ze tohake, naho ho peaheko ze hene añambone; le hampangololoiheko hoe t’ie ni-tañoloñoloñañe, vaho hafaitse ty androm-pigadoña’e. Ingo, ho tondroke ty andro, hoe t’Iehovà, Talè, te hiraheko an-tane atoy ty san-kerè, fa tsy ty hasaliko-mahakama, naho tsy ty hataliñieren-drano, fa ty fijanjiñañe o tsara’Iehovà o; hirererere boak’an-driake pak’an-driak’añe ondatio, naho boak’avaratse vaho hianiñanañe, hibelobelo mb’etia mb’eroa hipay ty tsara’Iehovà fa tsy ho isa’e. Ho toirañen-keahea o somondrara maintelèñeo naho o ajalahio. Le o mifanta amy hakeo’i Someroneio ami’ty hoe: Kanao veloñe ty ‘ndrahare’i Dane; naho, Katao veloñe ty sata’i Beèrsèbae; le hikorovoke, tsy hitroatse ka.

Prenumerera på vårt nyhetsbrev

Installera Église Locale