Tolom-Piràhe’e 15

Teo ty nizotso boak’Iehodà añe nañoke ty hoe amo roahalahio: Ze tsy savareñe amy sata’i Mosèy, le tsy ho rombaheñe. Tsy naivañe ty fifandierañe naho fifanointoiña’i Paoly naho i Barnabasy ama’e le sinafiri’iereo ty hañitrike i Paoly naho i Barnabasy naho ty ila’e mb’e Ierosaleme mb’amo Firàheñe naho bey añeo ty amy ontane zay. Ie nampionjone’i Fivoriy amy lalañey, le niranga i Foinika naho i Samaria, nitalily ty fisolohoa’o kilakila ondatio vaho nahaehake o roahalahy iabio. Ie nandoake e Ierosaleme ao, le rinambe i Fivoriy naho o Firàheñeo naho o beio, vaho nitalilieñe ze he’e nanoen’Añahare añam’iereo. Fe niongake ty mpiato ila’e amo Fariseo, nanao ty hoe: Tsy mete tsy ampisavareñe ondatio vaho lilieñe hañorike ty Hà’i Mosè. Nivory hisafiry i entañe zay o Firàheñeo naho o beio, f’ie nifandietse avao, aa le niongake t’i Petera nanao ty hoe: O Roahalahio, fohi’areo te nitoroan’Añahare hatrela’e te ho janjiñe’o kilakila ondatio am-bavako ty enta’i talili-soay vaho hiantoke. Aa le nitaroñe am’iereo t’i Andrianañahare Mpaharofoanañ’arofo, le nitolora’e i Arofo Masiñey manahake ty nanoe’e aman-tikañe. Toe tsy nambaha’e aman-tika iereo kanao nefera’e am-patokisañe o arofo’iareoo. Aa vaho akore ty itsoha’areo an’Andrianañahare, hampitongoà’areo joka am-pititia’o mpiòkeo, ie tsy nileon-tika ndra o roaen-tikañeo? Aiy! Atokisan-tika te i hasoa’Iesoà Talèn-tikañey ro maha voarombak’antika, le hambañe amy zay iereo. Fonga nianjiñe i màroy, nijanjiñe ty nitalilie’i Barnabasy naho i Paoly o viloñe naho halatsàñe nanoen’Añahare añivo’o kilakila ‘ndatio añam’iereoo. Ie nigadoñe i fitaliliañey, le hoe ty natoi’Iakobe: O roahalahio, ijanjiño, Fa nitalilia’i Simona i fitilihan’Añahare valoha’ey, handrambesa’e ondaty amo kilakila ondatio ho amy tahina’ey, mira amo nitsarae’o mpitokio, amy pinatetseio ty hoe: Ie añe, le hibalike raho naho hamboareko indraike i kivoho’i Davide nirotsakey; ho tsenèko indraike i nikoromakey, vaho hatroako, soa te hipay Iehovà ondaty ila’eo toe ze kilakila ondaty tokaveñe ami’ty añarako, hoe t’Iehovà mampahafohiñe o raha zao boake haehae añe. Aa le hoe ty safiriko, te tsy holañen-tikañe o mitolik’aman’Añahare boak’amo kilakila ondatio, fe anokiran-tika taratasy, hifoneña’iareo ze raha nitivae’o hazomangao naho ty hakarapiloañe naho ty henam-biby nidageañeñe vaho ty lio. Amy te nitaroñeñe haehae amy ze kila rova t’i Mosè, ie vakieñe am-pitontonañ’ao boa-t Sabata. Aa le nisatrie’o Firàheñeo naho o beio naho i fivory iabiy ty hijoboñe ondaty am’iereo ao, hihitrike mb’e Antiokia añe mindre amy Paoly naho i Barnabasy. Le jinoboñe t’i Joda (atao Barsabasy) naho i Silasy, ondaty mpiaolo amo rahalahio. Aa le nisokireñe ty hoe am-pita’iareo: Ry Firàheñeo naho o roahalahy beim-pivorio, Ho amo rahalahy boak’amo kilakila’ndatio e Antiokia naho e Sirià vaho e Kilkia añeo: Talilio’areo: Ie jinanji’ay te boak’ama’ay atoy o tsy nitoroa’aio, nitsibore anahareo an-tsaontsy nañembetse, le natao’ay t’ie nivory am-pitraofan-drehake, te hahasoa ty hijoboñe ondaty tsy ampeampe hampombañe mb’ama’areo mb’eo mindre aman-drañe’ay sarotse, i Barnabasy naho i Paoly— ondaty nihirimbeloñe ty amy tahina’i Talè Iesoà Norizañey. Aa le nampihitrife’ay t’i Joda naho i Silasy hamente o entañe zao am-palie amy te hoe nò’i Arofo Masiñey naho zahay ty tsy hanovoña’ay kilankañe mandikoatse o fañè rezao: Falio ze raha nisoroñañe an-kazomanga naho ty lio naho ze dinageañe vaho ty hakarapiloañe. Mahasoa anahareo te ifoneñañe. Manintsiña. Aa le nampionjoneñe mb’eo iereo naho nivotrake e Antiokia le natonto’iereo i Fivoriy vaho natolotse i taratasiy. Ie vinaki’iereo le niehake ty amy fañosihañey. Aa kanao mpitoky t’i Joda naho i Silasy, le nañosike naho nañafatratse o roahalahio an-tsaontsy maro. Ie roñoñe añe, le nampañaveloe’o rahalahio himpoly mb’amo nañitrik’iareoo mb’eo. Fe nitambatse e Antiokia ao t’i Paoly naho i Barnabasy mindre ami’ty ila’e maro, nañoke naho nitaroñe ty tsara’Iehovà. Ie nahamodo andro tsiampeampe, le hoe t’i Paoly amy Barnabasy: Antao hibalike naho hitilike o roahalahin-tika amy rova iaby nitaroñan-tika o tsara’i Talèo reio, hañontane iareo. Sinafiri’i Barnabasy ty hinday i Jaona (atao Marka) hitrao-dia, fe nifahara’i Paoly te tsy hahasoa te hindeseñe ie nivik’am’iareo e Pamfilià añe naho tsy nindre am-pitoroñe. Aa le akore ty fifanjomora’iareo kanao nifampipitsoke. Nendese’i Barnabasy t’i Marka nijon-dakañe mb’e Kiprosy añe, le jinobo’i Paoly t’i Silasy vaho nienga, ie fa nitatae’o roahalahio ho ami’ty hasoa’i Talè. Le niranga mb’e Sirià naho e Kilkia mb’eo re nañafatratse o Fivorio.

Подписаться на нашу рассылку

Установить Église Locale