Samoele I 4

Nanitsike Israele ty saontsi’i Samoele; ie amy zao nionjoñe hiatrek’amo nte-Pilistio t’Israele naho nitobe añ’ila’i Ebene’ha’ezere ey; vaho nitobe e Afeke ey ka o nte-Pilistio. Niriritse hiatrek’am’Israele añ’aly o nte-Pilistio; aa ie nitangilihiliñe an-kotakotake iereo, le linafa añatrefa’o nte-Pilistio t’Israele, va’e efats’arivo amo lahindefo’eo ty zinevo’iareo amy montoñey. Ie nimpoly an-tobe ao ondatio, le hoe ty ontane’o roandria’Israeleo, Aa vaho manao akore te namofok’antika añatrefa’o nte-Pilistio t’Iehovà? Antao hakaren-tika mb’etoa i vatam-pañina’Iehovà y boake Silò ao, le ie aman-tika, va’e ho rombahe’e am-pitàn-drafelahin-tika. Aa le nañitrike mbe Silò ondatio ninday i vatam-pañina’Iehovà mpimoneñe añivo’i kerobe reiy boak’ao; nindre amy vatam-pañinan’Añaharey i ana-dahi’i Elý roe rey, i Kofný naho i Pinekase. Aa ie nivotrak’an-tobe ao ty vatam-pañina’Iehovà, le akore ty fipazapazake pinoña’Israele iaby kanao nanginikinike i taney. Ie jinanji’o nte-Pilistio ty fikoraha’i pazapazakey, le hoe iereo: Ino o fañenotsatsak’an-tobe’o nte-Evreo? Le nirendre’iareo te nivotrak’an-tobe ao ty vatam-pañina’Iehovà. Niholi-balà amy zao o nte-Pilistio, le hoe iereo: Nivotrak’an-tobe ao t’i Andrianañahare. Hoe iereo, Hankàñe aman-tika! fa tsy izay te omale naho fakomale-bey. Hekoheko aman-tika! Ia ty handrombak’an-tika am-pità’o ‘ndrahare maozatseo? O ‘ndrahare nandafa o nte-Mitsraimeo amo angorosy iaby an-dratraratrao. Mifatrara ho bakalàhy ry nte-Pilistio tsy hitoroña’areo o nte-Evreo manahake ty fitoroña’iareo an-tika; mihaozara hoe t’ie ondaty, le mialia. Aa le nialy o nte-Pilistio naho nigioke t’Israele vaho songa nitriban-day mb’an-kiboho’e mb’eo t’indaty; le tsi-fotofoto ty nizamañe; toe lahindefo telo-ale ty nikorovok’amy hotakotakey. Tinavañe i vatam-pañinan’Añaharey; vaho zinevo t’i Kofný naho i Pinekase, i ana-dahi’i Elý roe rey. Nihitrihitry boak’amy hotakotakey t’i nte-Beniamine niheo mb’e Silò mb’eo amy andro zay, riatse iaby o saro’eo, vaho deboke ty añambone’e. Ie pok’eo, ingo t’i Elý niambesatse amy fiambesa’e añ’olon-dalañey nijilojilo; ie nihitikitik’añ’arofo ty amy vatan’Añaharey. Aa naho nizilik’an-drova ao t’indaty, le nikoaike iaby i rovay. Ie jinanji’i Elý ty fikoraha’i fitoreovañey, le hoe re, Ino ze o fikontsiañañe zao? Nihitrike mb’amy Elý indatiy, nitalily. Ie amy zao ni-sivampolo-valo’amby taoñe t’i Elý, vaho nifè-pihaino, tsy nahaisake. Le hoe indatiy amy Elý: Vaho niboak’amy fifandraparapahañey iraho anindroany, nihitrike boak’amy hotakotakey. Aa le hoe re ama’e, O anako, ino i tsaraeñey? Le hoe ty natoi’i nihitrikey, Nandripàke aolo’o nte-Pilistio t’Israele, le tsifotofoto ty nizamañe am’ondatio naho i ana-dahi’o roe rey, nihomake t’i Kofný naho i Pinekase vaho tinavañe i vatan’Añaharey. Aa ie nitalily i vatan’Añaharey, le niponake nañamboho amy fiambesa’ey añ’ila’i lalambeiy re, le nipozake ty fititia’e vaho nihomake, amy t’ie ondaty bey naho navesatse. Fa efa-polo taoñe ty nizaka’e Israele. Ie amy zao, nivesatse ty vinanto’e ampela, ty vali’i Pinekase, naho fa hisamake; aa ie jinanji’e i taliliy te tinavañe i vatam-pañinan’Añaharey naho te nihomake iaby ty rafoza’e naho i vali’ey, le nibokoke vaho nisamake; amy te nifetsaha’ty fitsongoa’e. Aa ie amy fivetraha’ey, hoe ty rakemba nijohañe añ’ila’e eo: Ko hemban-drehe, fa nahatoly ana-dahy. F’ie tsy nanoiñe, tsy nañaoñe. Natao’e Ikabòde ty añara’i ajajay, ami’ty hoe: Fa nienga Israele ty engeñe; amy te tinavañe i vatam-pañinan’Añaharey, naho ty amy rafoza’ey naho i vali’ey, ie nanao ty hoe: Nienga Israele ty engeñe, amy te tinavañe i vatam-pañinan’Añaharey.

Подписаться на нашу рассылку

Установить Église Locale