Sabo 90 — Baiboly Tandroy

Sabo 90

Ry Talè, Ihe ni-fimoneña’ay amo tarira’ay iabio. Ie mboe tsy toly o vohitseo mboe tsy tsinene’o ty tane toy naho ty voatse toy, boak’an-kaehae hambo’e añe pak’an-kitro añ’afe’e añe, Ihe ro Andrianañahare. Ampolie’o mb’an-debok’ao ondatio ami’ty hoe: Mimpolia ry ana’ondaty. Fa arivo taoñe am-pivazohoa’o ty andro raike toe hoe omale te nihelañe, ie manahake ty fiambenañe an-kaleñe. Sinao’o añe hoe an-tsorotombake iereo, le miròtse, f’ie maraiñe, le hoe ahetse mipitsipitsike. Mioboñoboñe te maraindraiñe mbore mitombo, ie hariva miheatse vaho miforejeje. Toe mongore’ty haviñera’o zahay, mampangebahebak’anay ty fifombo’o. Fa napo’o añatrefa’o o tahi’aio, am-pireandrean-dahara’o eo o hakeo’ay mietakeo. Fonga mihelañe ami’ty fifombo’o o andro’aio; fa nagado’ay hoe fiselekaiñañe o tao’aio. Ty andro’o tao’aio le fitompolo taoñe; mete ho valo-polo, t’ie maozatse; fe hamokorañe naho fangoakoahañe avao ty enge’e, migadoñe aniany, vaho mitiliñ’añe. Ia ty mahafohiñe ty haozara’o haviñera’oo? naho ty fañeveñañe mañeva Azo ty ami’ty fifombo’o? Aa le anaro zahay hañiake o andro’aio, hahazoa’ay arofo mahihitse. Mimpolia ry Iehovà! Ombia? iferenaiño o mpitoro’oo Eneño an-kafatraram-pikokoa’o te maraindray zahay, hirebeha’ay naho hifalea’ay amo hene andro’aio. Ampifaleo mira amo andro nampisotria’o anaio, naho amo taoñe nahaisaha’ay haratiañeo. Fa halange amo mpitoro’oo o fitoloña’oo, naho ty enge’o amo ana’iareoo. Ho aman-tika ty fañisoha’i Talè Andrianañahare’ay; ajadoño ty tolom-pità’ay; eka aoreño o satam-pità’aio.

Подписаться на нашу рассылку

Следите за новыми профилями, мероприятиями и обновлениями платформы.