Mpanjaka II 23

Nampañitrike i mpanjakay, le natontoñ’ama’e ze hene androanavi’Iehoda naho Ierosalaimeo. Le nionjomb’añ’anjomba’Iehovà mb’eo i mpanjakay rekets’ondati’Iehoda iabio naho ze fonga mpimone’Ierosalaime naho mpisoroñe naho mpitoky, naho ze kila ondaty, ty kede naho ty bey, vaho hene vinaki’e an-dravembia’iareo ze tsara amy bokem-pañina nitendrek’añ’anjomba’Iehovà y. Nijohañe ami’ty fahañe eo i mpanjakay naho nifañina añatrefa’Iehovà, t’ie hañavelo am-pañorihañe Iehovà naho hiambeñe o lili’eo naho o taro’eo vaho o fañè’eo añ’ampon’arofo naho an-kaliforam-pañova, hahatafetera’e o tsara’i fañina sinokitse amy bokeio; le niantofa’o fonga ondatio i fañinay. Linili’i mpanjakay amy zao t’i Kilkià mpisoroñe naho o mpisoroñe am-pirimboñañe faha-roe naho o mpitan-dalambeio, ty hañakara’iareo an-kivoho’Iehovà ze fanake nanoeñe amy Baale naho an-tsamposampo naho amy valobohòn-dikerañey; le niforototoe’e alafe’Ierosalaime an-kivo’i Kidrone ao vaho nendese’e mb’e Betele añe ty laveno’e. Nafotsa’e iaby o mpisorom-pahasive noriza’o mpanjaka’Iehodao hañenga amy ze toets’abo amo rova’Iehodào, naho amo toetse mañohoke Ierosalaimeo; le o nañenga amy Baale, amy àndroy, amy volañey, amo vasiañe mifamorohotseo, vaho amy valobohòn-dikerañeio. Naaka’e añ’anjomba’Iehovà mb’alafe’Ierosalaime mb’eo, mb’an toraha’i Kidroney o Aserào naho finorototo’e an-toraha’i Kidrone ey naho dinemodemo’e ho bo vaho nafitse’e amo kibori’o ana’ondatio i debokey. Narotsa’e o kibohom-borololo añ’ila’i anjomba’Iehovà y amy fanenoñan-drakemba o tèmen’Aseràoy. Fonga nakare’e amo rova’Iehodao o mpisoroñeo naho nileore’e o toets’abo nañemboha’o mpisoroñeo mifototse e Geba pake Beeresebà vaho narotsa’e o toets’abo am-pimoahañe i lalambei’Iehosoà bein-tanañeio, am-pitàn-kavia an-dalambei’i rovaio. ie amy zao tsy nionjom-b’amy kitreli’Iehovà e Ierosalaimey añe o mpisoron-toets’aboo, f’ie nitrao-pikama mofo tsi-aman-dalivae amo rahalahi’eo. Nileore’e ty Topete, am-bavatane’i ana’i Hinomey, tsy hampirangà’ondaty añ’afo’i Moleke ao ty ana-dahi’e ndra ty anak’ampela’e. Nafaha’e o soavala noriza’o mpanjaka’Iehodao amy àndroy, am-pimoahañe añ’anjomba’Iehovà, marine’ty efe’i Matane-meleke, vosie, am-pariparitse ey, vaho finorototo’e añ’afo o sareten’androo. Le narotsa’i mpanjakay i kitrely an-tafo’i efetse ambone’i Ahkaze namboare’o mpanjaka’Iehodaoy naho o kitreli’i Menasè niranjie’e an-kiririsa roe’i anjomba’Iehovà eio le dinemodemo’e vaho nahifi’e an-torahan-Kidrone ao ty debo’e. Le nileore’i mpanjakay o tamboho aolo’Ierosalaime am-pitàn-kavanan-kaboan-kaleorañeo, i namboare’i Selomò mpanjaka’Israele amy Astorete, ty haloloa’o nte-Tsidoneo, naho amy Kemose, ty haloloa’o nte-Moabeo vaho amy Milkome, ty haloloa’o ana’i Amoneo. Dinoro-demo’e o saren-drahao naho finira’e o hazomangao, vaho natsafe’e taola’ondaty o toe’eo. Le i kitrely e Beteley, naho i toets’abo’Iarovame namboare’i ana’i Nebate nampanan-kakeo Israeley; fonga narotsa’e i kitreliy naho i toets’aboy, le finorototo’e i toets’aboy, naho dinemodemo’e ho deboke vaho hinotomomo’e i Aserày. Ie nitolike t’Iosià, le niisa’e o kibory an-kaboañeio naho nampañitrife’e naho nakare’e amy kibory rey o taolañeo vaho finorototo’e ambone’i kitreliy handeora’e aze, hambañe amy tsara’Iehovà tsinei’indatin’Añahare nikoike irezaiy. Aa hoe re, Lona’ia o treakoo? Le hoe ondati’i rovaio ama’e: Kibori’indatin’Añahare niheo mb’etoa boak’Iehoda nitsey o raha anoe’o amy kitreli’i Beteleioy. Le hoe re: Adono; ko apo’areo ho tsiborè’ondaty o taola’eo. Aa le nado’iareo o taola’eo, rekets’o taola’i mpitoky boake Someroneio. Nafaha’Iosià iaby o anjomban-toets’abo an-drova’i Somerone namboare’o mpanjaka’Israeleo nampiviñetse Iehovà o, le hene nanoe’e am’iereo i nanoe’e e Beteley. Fonga zinevo’e ambone kitrely eo o mpisoron-toets’abo taoo naho noroa’e ambone’iereo ty taola’ondaty; vaho nimpoly mb’e Ierosalaime mb’eo. Linili’i mpanjakay o hene ondatio, ami’ty hoe: Ambeno i fihelañ’ambone’Iehovà Andrianañahare’oy, i sinokitse amy bokem-pañinaiy. Aa le mboe lia’e tsy nanoeñe ty fihelañ’ambone manahake izay boak’añ’andro’o mpizaka nizaka Israeleo ndra amo androm-panjaka’Israeleo naho o mpanjaka’Iehodào; amy taom-paha-folo-valo’ambi’Iosià mpanjakay ty nañambenañe i fihelañ’ambone am’Iehovà y e Ierosalaime ao. Fonga nafaha’Iosià ze mpandrombo angatse naho jiny naho terafime naho hazomanga vaho ze hene haloloañe nizoeñe an-tane’Iehoda naho e Ierosalaime ao hamente ty enta’i Hake sinokitse amy boke nioni’i Kilkià mpisoroñey añ’anjomba’Iehovà aoiy. Le tsy eo ty nañirinkiriñe aze amy ze mpanjaka niaolo aze, ie nitolik’am’Iehovà an-kaampon’arofo naho an-kaliforam-pañova vaho an-kene haozara’e, ty amy Hà’i Mosey; ie tsy amam-panonjohy nitroatse nanahak’aze. Fe tsy nitolik’amy fifombo’e niforoforoy t’Iehovà, amy haviñera’e nisolebotse am’Iehodà, ty amo fonga sigý nisigihe’i Menasè Azeo. Le hoe t’Iehovà, hafahako am-pahatreavako t’Iehoda, manahake ty nañafahako Israele vaho hahifiko añe ty rova jinoboko toy naho i anjomba nataoko ty hoe: Ho ao i añarakoiy. Aa naho o fitoloña’Iosià ila’eo, o raha nanoe’e iabio, tsy fa sinokitse amy bokem-pamoliliañe o mpanjaka’Iehodaoy hao? Ie tañ’andro’e le nionjo haname ty mpanjaka’i Asore t’i Parò-Nekò mpanjaka’i Mitsraime mb’an-tsaka Perate añe; nomb’ama’e mb’eo t’Ioase, mpanjaka, fe vata’e niisa’e le zinevo’e e Megidò añe. Nitakone’o mpitoro’eo an-tsarete i fañova’ey, nendese’iereo mb’e Ierosalaime mb’eo vaho nalentek’an-kibori’e ao. Rinambe ondati’i taneio t’Iehoakaze, ie ty noriza’iareo ho mpanjaka handimbe an-drae’e. Roapolo-taoñe telo’amby t’Iehoakaze te niorotse nifehe, le nifeleke telo volañe e Ierosalaime ao; i Kamotale, ana’Irm-meà nte-Libnà, ty tahinan-drene’e. Nanao haratiañe am-pivazohoa’Iehovà re manahake o fonga satan-droae’eo. Le vinaho’i Parò-Neko e Ribà an-tane Kamate añe re, tsy hameleha’e t’Ierosalaime; le sinaze’e talenta zato volafoty naho talenta volamena raike i taney. Le nanoe’i Parò-Neko mpanjaka t’i Eliakime ana’Iosia handimbe an-drae’e Iosia naho novae’e ho Iehoiakime ty tahina’e naho nendese’e mb’e Mitsraime mb’eo t’Iehoakaze, vaho nihomake añe. Natolo’Iehoiakime amy Parò i volafoty naho volamenay, le nangalà’e haba i taney ty amy lili’i Paròy; rinambe’e am’ondati’i taneio i volafoty naho volamenay, sambe ty amy vili-loha’ey, hanolotse aze amy Parò-Neko. Roapolo-taoñe lime amby t’Iehoiakime te niorotse nifehe; vaho nifeleke folo-taoñe raik’amby e Ierosalaime ao; i Zebidà, ana’i Pedaià nte-Romà, ty tahinan-drene’e. Le nanao haratiañe am-pivazohoa’Iehovà re manahake o satan-droae’eo.

Подписаться на нашу рассылку

Установить Église Locale