Jaona III 1 — Baiboly Tandroy

Jaona III 1

I Zokey, Ho an-drañeko Gaio, ikokoako an-katò. O rañetse, mitat’azo iraho, lonike t’ie hiraorao naho ho jangañe, mira amo fanintsiñan’arofo’oo. Akore ty hafalean-troko, te niloneak’atoy o rolongoo nitaroñe ty hatò ama’o ao, ty fañaveloa’o an-katò. Tsy eo ty mahaehak’ahy mandikoatse zao, t’ie mahatsanoñe te mañavelo an-katò o anakoo. O rañetse, migahin-drehe amo hene fañimbà’o an-drolongoo antsak’amo ambahinio. Fa nitalilie’iareo añatrefa’i Fivoriy ty fikokoa’o. Aa le mahasoa azo t’ie ampionjone’o mañeva an’Andrianañahare, amy te i Tahina’ey ty niavota’iareo mb’eo tsy nandrambe ndra inoñ’inoñe amo kilakila ondatio. Aa le mete aman-tika ty mañimba ondaty hoe zaio, hitraofan-tika fitoloñe ami’ty hatò. Nisokireko i Fivoriy, fe tsy mandrambe ty enta-tika t’i Diotrefa, ie te ho mpiaolo añivo’iereo. Aa naho mb’eo iraho le hampanohineko aze o sata anoe’eo ie manambaitambaiñ’antika. Mbore tsy mahaeneñe aze, kanao mitoky tsy handrambe o rahalahio, naho sebañe’e o te hanao zaio, toe aitoa’e amy Fivoriy. O rañetse, ko mitsikombe ty raty fa ty soa. Boak’aman’Añahare ty manao soa; tsy nahaisak’an’Andrianañahare ty mpanao raty. Hene mitalily soa i Demetrio, naho ty hatò, naho onjone’ay amy taro’aiy vaho fohi’o te to ty taro’ay. Maro ty ho nisokirako, fe tsy teako t’ie an-taratasy ndra rano-mainte te sokireñe. Misalala hahatrea azo te aniany, hifañòhahohàn-tika laharañ’an-daharañe. Hanintsiñe ama’o. Mañontane azo o rañetseo. Añontaneo an-tahinañe o rañetseo.

Подписаться на нашу рассылку

Следите за новыми профилями, мероприятиями и обновлениями платформы.