Iirmeà 50

Ty entañe nitsarae’Iehovà ty amy Bavele, tane’o nte-Kasdioy, añam’Iirmeà mpitoky. Taroño amo kilakila’ndatio, tseizo; añonjono vorovoro, koiho vaho ko ampikafireñe ty hoe: Tinavañe ty Bavele, salatse t’i Bele, lonjetse ty Merodake; songa nampisalareñe o saren-drahare’eo, dinemoke o hazomanga’eo. Amy te boak’avaratse añe ty fifeheañe haname aze, ty hampangoakoake i tane’ey, ampara t’ie tsy amam-pimoneñe; fonga nañariok’añe ndra ondaty ndra hare. Amy andro zay, naho amy sa zay, hoe t’Iehovà, le homb’atoy o ana’Israeleo, ie naho o ana’Iehodao, hangololoike ty rovetse te mañavelo, vaho ho tsoehe’iereo t’Iehovà Andrianañahare’iareo. Hañontanea’iareo ty lalañe mb’e Tsione mb’eo, naho hampiatrefe’iareo laharañe; Homb’eo iereo hireketse am’Iehovà ami’ty fañina tsy modo nainai’e, tsy ho haliño. Fa añondry motso ondatikoo; nampandrifihe’o mpiara’iareoo; nampidadà’iereo amo haboañeo; nirererere am-bohitse pak’an-kaboañe, nandikofa’iareo ty fitofà’iareo. Fonga nampibotseke iareo ze nifanendrek’ama’e; le nanao ty hoe o malaiñ’iareoo: Tsy aman-kakeo zahay; amy t’ie ro nandilatse am’Iehovà, fimoneñan-kavantañañey, am’Iehovà fitaman-droae’iareo. Miridriha boake Bavele ao, naho iakaro ty tane o nte-Kasdio, vaho itsikombeo ty oselahy miaolo’i lia-rai’ey. Inao! ho troboeko hionjoñe hiatrek’i Bavele ty firimboñam-pifeheañe ra’elahy boak’an-tane avaratse añe; miriritse ama’e iereo, le ho tavaneñe amy zao; hanahake o amy fanalolahy mahimbañeo o anam-pale’iareoo, tsy ama’e ty himpoly mañomaño; Ho kopaheñe t’i Kasdy; hahaeneñe ze hene mamaok’ama’e; hoe t’Iehovà: Ty hafalea’areo, naho ty firebeha’areo: ry mpampikopake i lovakoio, ty fitrekoa’areo le hoe tamana añ’ahetse, vaho misehaseha hoe soavala mirefe; Hangirifiry ty fisalaran-drene’o, ho meñatse i nahatoly azoy; ho tsitso’o fifeheañeo, fatram-bey, tane karakankaiñe vaho liolio. Ami’ty haviñera’Iehovà le tsy himoneñañe, fa ho vata’e bangìñe; ho latsa iaby ze miary amy Bavele, hikosàke amo hekoheko’e iabio. Ampiririto hialy amy Bavele añ’ariari’e eo ry mahatam-paleo, ahiririño, ko manisa ana-pale; amy te anaña’Iehovà tahiñe. Mirohafa añ’arikatoke aze, fa miambane re; mihotrake o faha’eo, rebake o kijoli’eo; izay ty fañondroha’Iehovà, Mamalea fate! hambañe amy nanoe’ey ty hanoañe ama’e. Aitò amy Bavele ty mpandrarake, naho i mpita-meso am-pitatahañey, ie ihembaña’e ty fibaram-panindry, songa hitolike mb’am’ondati’eo, sindre handripake mb’an-tane’e mb’eo. Añondry miparaitake t’Israele, niroahe’o lionao añe; Ty valoha’e nampibotsek’aze, i mpanjaka’i Asorey naho ami’ty figado’e toy t’i Nebokadnetsare mpanjaka’i Bavele ro nampipekañe o taola’eo. Aa le hoe t’Iehovà’i Màroy, t’i Andrianañahare’Israele: Inao! ho liloveko ty mpanjaka’i Bavele naho i tane’ey, manahake ty nandilovako i mpanjaka’i Asorey. Le hampoliko mb’am-piandraza’e mb’eo t’Israele, hihinañe e Karmele naho e Basane ao, vaho hahaeneñe ty tro’e ty an-kaboa’i Efraime naho i Gilade. Amy andro rezay naho amy sa zay, hoe t’Iehovà, ho kodebèñe ty hakeo’Israele fe tsy ho eo, naho ty tahi’Iehodà, fa tsy hahaoniñe; amy te ho hahàko ty hakeo’o napoko ho sehanga’eo. Mionjona mb’an-tane’Merataime, atreatréo, naho o mpimoneñe e Pekodeo, mongoro, vata’e rotsaho, hoe t’Iehovà, ano iaby o nandiliako azoo. Inao, ty hotakotak’amy taney, naho ty fandrotsaham-bey. Akore te finira naho pinozake ty ana-bato’ty tane toy! Akore te nampangoakoaheñe añivo’o fifeheañeo ty Bavele! Ie nandaharako fandrike, toe tsinepake ka, ry Bavele, fe tsy napota’o; nivazohoen-drehe vaho nitratse, amy te ihe nifangatotse am’Iehovà. Fa sinoka’Iehovà ty fañaja’e, vaho nakare’e o fialian-kaviñera’eo; ty fitoloñañe tsy mete tsy anoe’i Talè, Iehovà, an-tane o nte-Kasdio. Itameo boak’an-tsietoitane añe, sokafo o riha’eo, atontono mañambone kivotre kivotre, vaho rotsaho; ko anisa’o ndra inoñe. Fonga lentao o vosi’eo, ampizotsò mb’am-panjamanañe ao; feh’ohatse ama’e! fa tondroke ty andro’iareo, ty androm-pandilovañe. Inay! ty feom-pipiliotse naho o nandrifitse boak’an-tane Baveleo, hitsey e Tsione ao ty fañondroha’Iehovà Andrianañaharentika, i vale-fate’e ty amy anjomba’eiy. Koiho hifanontone hiatreke i Bavele o mpitàm-paleo, o mampibitsoke fale iabio; mitobea añ’arikatoke aze; ko ado’areo te ho eo ty hiborofotse; ondroho ty amo sata’eo, avaleo ama’e o fonga fitoloña’eo, fa nirengevohe’e t’Iehovà, i Masi’Israeley. Aa le hikorovok’an-tameañe eo o ajalahi’eo, songa hampianjiñeñe amy andro zay o lahin-defo’eo, hoe t’Iehovà. Inao! miatre azo raho ty mpitoabotse tia, hoe t’i Talè, Iehovà’i Màroy; fa tondroke ty andro’o, ty namotoañako handilo azo. Hitsikapy naho hikorovoke i loho mpiroharohay, tsy ho amam-pañongake; le ho viañeko afo o rova’eo, vaho ho forototoe’e o faripari’e iabio. Hoe t’Iehovà’i Màroy, naharo forekekeñe o ana’Israeleo naho o nte-Iehodao; fa tinambozò’o nitsepak’iareo, nifoneña’iareo tsy hamotsots’iareo. Maozatse ty Mpijeba’iareo, Iehovà’i Màroy ty tahina’e, ho henefa’e ty fisalala’iareo, hampitofa’e i taney, vaho ho troboe’e o mpimone’i Baveleo. hoe t’Iehovà Hebae’ty fibara o nte-Kasdio, naho o mpimone’i Baveleo, naho o roandria’eo, vaho o mahihi’eo. Ohare’ty fibara o mpandañitseo, hampidagolàñe iareo; Hebaem-bi-lava o fanalolahio, hampidemòhañe iareo. Ho amo soavala’iareoo ty fibara, naho amo sarete’eo, naho amo ambahiny iaby añivo’iareoo, fa hanahake ty rakemba iereo; amo vara’eo ty meso-lava, vaho ho voloseñe. Hafaosa amo rano’eo, fa ho riteñe, amy t’ie tanen-tsamposampon-draha, vaho renge’iareo o irevendreveña’iareoo. Aa le hitrao-pitobok’ao ty fosa naho ty farasy, hiantraño ao ka o voron-tsatrañeo; le tsy ho fimoneñañe kitro-katroke, tsy hañialoañe mb’an-tariratse an-tamingañe. Ho hambañe amy nandrotsahan’Añahare i Sedome naho i Amorà vaho o mañohoke iareoo, hoe t’Iehovà; tsy himoneña’ondaty, tsy hañialoa’ty ana’ondaty. Inao! hitotsake boak’avaratse añe ondatio, fifeheañe jabajaba naho mpanjaka maro ty ho troboeñe boak’an-tsietoitane añe. Vontitire’iereo ty fale naho ty lefoñe, mpampisoañe tsy miferenaiñe; mitroñe hoe i riakey ty feo’iareo, mijon-tsoavala; miriritse hoe ondaty hihotakotake, ama’o ry anak’ampela’i Bavele. Fa jinanji’ty mpanjaka’i Bavele ty talily iareo, vaho migebañe o fità’eo; namihiñ’aze ty halonjerañe, ty fanaintaiñan-ampela mitsongo. Inao! eo ty hionjoñe hoe liona boak’amo rongo-matahe’Iordaneo mb’an-goloboñe mifahetse mb’eo; f’ie ho roaheko amy zao, vaho ho tendrèko hamehe aze ze joboñeko; fa ia ty rahambako? Ia ty hamotoañ’andro ho ahy? Le ia ty mpiarake hahafiatrek’ahiko? Aa le mahajanjiña ty safiri’Iehovà nisafirie’e i Bavele, naho ty ereñere niereñere’e i tane’o nte-Kasdioy; toe ho kozozote’e mb’eo ndra ty kede amy lia-rai’ey, hampangoakoahe’e ty am’iereo i fiandraza’iareoy. Hampirihindrihie’i Taney ty koike manao ty hoe: Fa rinambe ty Bavele; vaho ho janjiñeñe amo fifeheañeo ty fikoaihañe.

Подписаться на нашу рассылку

Установить Église Locale