Foto’e 33

Le nampiandrà’Iakòbe o fihaino’eo naho niisa’e te nimb’ama’e mb’eo t’i Esave reketse ty lahilahy efa-jato. Aa le zinara’e amy Leae naho amy Rahkele vaho amy mpitoro’e ampela roe rey o ajajao. Nanoe’e aolo’e ey o mpitoroñeo rekets’o ana’eo, le nanonjohy iereo t’i Leae naho o ana’eo vaho amboly ao t’i Rahkele naho Iosefe. Niary mb’aolo’iereo mb’eo re nibokok’an-tane im-pito am-pañarineañe i zoke’ey Aa le nilay mb’ama’e mb’eo t’i Esave niambotrak’amy fititia’ey le norofa’e vaho sambe nangoihoy. Niandra t’i Esave nahaoniñe o rakemba reketse keleiañeo, le hoe re, Ia o mindre lia ama’oo? Hoe re: O anake natolon’Añahare am-patarihañe amo mpitoro’oo. Nitotoke mb’eo amy zao o mpitoroñ’ampela rekets’anakeo, le nibokok’ambane; nimb’eo ka t’i Leae rekets’anake naho nibokoke; nañarine amy zao t’Iosefe naho i Rahkele sindre niondreke. Hoe t’i Esave, Ino ty dika’i lia’e maro nikovovoke nifanalaka amakoy? Tinoi’Iakòbe ty hoe, Ty hahatendrehañe fañisohañe am-pivazohoa’i talèkoy. Fa hoe t’i Esave, Mahàtsek’ahy o ahikoo, ry rahalahiko, tano ho azo o azoo. Hoe t’Iakòbe, Aiy, ie nahatrea ìsok’am-pahaisaha’o, le rambeso an-tañako o ravoravoo; amy te izaho mahaisake o lahara’oo, le hoe mahatrea ty laharan’Añahare, vaho t’ie nino’o. Ehe rambeso i ravoravo binanabanako, fa niferenaiñan’Añahare, naho maro o amakoo. Le nosihe’e vaho rinambe’e. Le hoe re, Antao hitrao-dia, le hiaolo anahareo iraho. Fe hoe ty natoi’e, Fohi’ty talèko te kamba o ajajao, vaho amako o rene’e naho añombe-vave rohy, aa naho ilosoran-tehake ndra andro raike le fonga ho mate o hareo. Ehe te hañavelo aolo’i mpitoro’ey mb’eo ty talèko, hisitsirako mora mb’eo ty amo hare mangovovok’aolo ahio naho ty amy filesalesa’o ajajao, ampara’te pok’amy talèko e Seire añe. Aa le hoe t’i Esave, Angao handivako ama’o ondaty amakoo. Fa hoe re, Fa akore? Ee t’ie hahatrea fañisohañe am-pahaisaha’i talèkoy. Aa le nimpoly mb’e Seire añe amy àndro zay t’i Esave. Le nimb’e Sokote añe t’Iakòbe le nañoren-kivoho, naho namboara’e fialofañe o añombe’eo, vaho natao Sokote i toetsey. Niavy tsy añolañe an-drova’i Sikeme an-tane Kanàne eo t’Iakòbe boake Padan’arama añe, vaho nañoren-kivoho aolo’i rovay ey. Le vinili’e bogady zato amo ana’i Khamòre rae’i Sikemeo ty ila’i teteke nampipoha’e i kivoho’eiy. Le nañoren-kitrely eo ze natao’e El-Elohe-Israele.

Подписаться на нашу рассылку

Установить Église Locale