Estere 7 — Baiboly Tandroy

Estere 7

Aa le nimb’amy sabadidakey mb’eo i mpanjakay naho i Hamane mitraok’amy Estere mpanjaka-ampela. Le nanao ty hoe amy Estere indraike i mpanjakay amy andro faharoey amy fanjotsoañe divaiy: Ndra inoñe ty halali’o, Estere mpanjaka-ampela, le hatolotse azo; vaho ndra inoñ’inoñ’o salalae’oo, le hanoeñe ampara’ty vakim-pifeheañe. Nanoiñe amy zao t’i Estere mpanjaka-ampela: Aa naho nanjo fañisohañe am-pahaoniña’o iraho ry mpanjaka, lehe mahafale i mpanjakay, le inao ty halaliko te hatolotse ahy ty fiaiko; toe ty fiai’ondatikoo ro hàtako; amy t’ie naletake, izaho naho ondatikoo, ho mongoreñe, ho zamaneñe vaho hampikoromaheñe; fa naho naletake ho ondevo-lahy naho ondevo-ampela le ho nitsiñe iraho ndra te tsy ho nilefe’i rafelahiy havahañe ty ho nimotso amy mpanjakay. Nisaontsy amy zao t’i Akasverose mpanjaka, nanao ty hoe amy Estere mpanjaka-ampela: Ia v’izao, aia re, te mahavany izay an-tro’e ao? Le hoe t’i Estere: O rafelahy naho sadiavaheo, ty lo-tsereke Hamane tia. Nianifañe aolo’i mpanjakay naho i mpanjaka-ampelay amy zao t’i Hamane. Niongak’amy fanjotsoañe divaiy am-piforoforoa’e amy zao i mpanjakay, niakatse mb’an-kiririsa’i anjombay; fe tambatse eo t’i Hamane nihalaly ty fiai’e amy Estere mpanjaka-ampela; fa napota’e te hankàñe ty fisafiria’i mpanjakay. Nibalik’amy zao boak’an-kiririsan’anjomba ao mb’amy fanjotsoañe divaiy mb’eo i mpanjakay, ie nibabok’an-tihi’i Estere eo t’i Hamane. Le hoe i mpanjakay: Aa ho vahora’o añ’atrefako etoa ka hao añ’anjomba atoy o mpanjaka-ampelao? Ie nienga i falie’ey i saontsiy le sinaro’iareo ty lahara’i Hamane. Le hoe t’i Harbonà, raik’amo mpiatrak’aolo’i mpanjakaio, Inao! mitroatse añ’anjomba’i Hamane ey ty fampiradoradoañe limampolo kiho mañambone, rinanji’i Hamane ho a i Mordekay nitaron-kasoa i mpanjakaiy. Le hoe i mpanjakay, Aradoradò ama’e. Aa le naradorado’iereo amy firadoradoañe nihentseña’e ho a i Mordekaiy t’i Hamane; vaho nanintsiñe ty haviñera’i mpanjakay.

Подписаться на нашу рассылку

Следите за новыми профилями, мероприятиями и обновлениями платформы.