Sabo 68

Hiongake t’i Andrianañahare, le hiparaitake o rafelahi’eo; vaho hibioñe aolo’e eo o malaiñe Azeo. Hambañe ami’ty fampisaohañe hatoeñe, isaoho añe ka; manahake ty fitranaha’o karafo tantele aolo’afoo, ty hikoromaha’o tsivokatseo añatrefan’Añahare. Ho ehake o vañoñeo, hirebeke añ’atrefan’Añahare eo, hiriñariña an-kobaiñe. Misaboa aman’Añahare, bangò i tahina’ey; onjono i Mpiningitse miranga i montombeiy, Ià ty tahina’e; vaho mitreñà añatrefa’e eo. Raem-bode-rae naho mpañomey to amo vantotseo t’i Andrianañahare an-kivoho’e miavake ao. Ampimoneñan’Añahare añ’akiba ao ty jorý; akare’e mb’an-kavokarañe o rinohio; fe mitobok’an-tane kirikintàñe ao o mpitrabikeo. O Andrianañahare, ie niaoloa’o ondati’oo, ie nihofiha’o firanga i fatram-beiy, Selà niezeñezeñe i taney, nihotrake i likerañey aolo’i Andrianamboatse, Nihondrahondra ty Sinay añatrefa’i Abo Tia, Andrianañahare’Israele eo. Nanondraha’o oran-joba, ry Andrianañahare; niventè’o i lova’o navozoy, Nitobok’ao i mpirai-lia’oy, nifahana’o ami’ty havokara’o o rarakeo, ry Andrianamboatse. Nitaroñe t’i Talè; mitozantoza o rakemba mitalily i entañeio. Nitriban-day mb’eo o mpanjakan- dahindefoñeo! Nivoratsake; le ho zarae’i tambatse an-kiboho’e ao o kinopakeo, ie mandre am-bàlan’añondry ao, le manahake ty elan-deho misarom-bola-foty; mimilemiletse volamena o volo’eo. Ie nampivarakai’i El-Sadai i mpanjaka rey, le niavy an-Tsalmone ty oram-panala. Vohin’Añahare ty vohy Basane; vohitse lako-lengo’e ty haboa’i Basane; Inoñe ty ikiraña’areo ry haboañe maro-lengo’eo, i vohitse nirien’Añahare himoneña’ey? Eka himoneñe ao nainai’e t’Iehovà. Añ’ale’ale o sareten’Añahareo, arivo-añ’arivo’e; ama’e ao an-kamasiña’e t’i Talè manahake e Sinay añe. Nionjoñe añ’abo eñe irehe, nikozozote’o an-drohy o fandrohizañeo, nandrambe ravoravo am’ondatio, vaho amo mpiolao, himoneña’Ià, Andrianañahare. Andriañeñe t’i Talè mpivave o kilankan-tikañeo boak’andro, i Andrianañaharem- pandrombahantikañey. Selà Andrianañaharem-pañaha an-tika t’i Andrianamboatse; Toe a Iehovà Talè ty famotsorañe an-kavilasy. Le hanorotoro ty loha’o rafelahi’eo t’i Andrianañahare, ty kovo-doha minankanankañe amo hakeo’eo. Hoe t’i Talè: Hampoliko o e Basaneo, hahereko boak’an-keraheran-driak’ao, Ho demohem-pandia’o an-dio o rafelahi’oo, hanañ’anjara an-dion-drafilahy ka o lelan’amboa’oo. Fa niisa’iareo o fañaveloa’oo ry Andrianañahare, ty fionjonan’Añahareko, toe i Mpanjakakoy, mb’amy miavakey ao. Miaolo o mpisaboo, manonjohy o mpititikeo; añivo’e ao o somondrara mampikantsankantsàñe o kantsàñeo: Andriaño am-pivory ao t’i Andrianañahare, i Iehovà boak’am-pigoangoaña’Israele. Ingo t’i Beniamine tsitso’e, miaolo iareo, o roandria’Iehodào am-pirimboña’eo, o roandria’i Zeboloneo, o roandria’i Naftalio. Fa linilin’Añahare’o ty haozara’o; mihaozara! Ry Andrianañahare, nañenefa’o ho anay izay, ty kiboho’o e Ierosalaime añe, ty ibanabanà’o mpanjakao ama’oy. Endaho o biby hako am-bindao, o añombelahy maroo rekets’o dronga’ondatioo, songa mandialia tseram-bolafoty; navarakai’e ondaty tea alio. Hiavotse e Mitsraime ao o sorotà’eo, halisa hañity fitàñe aman’Añahare t’i Kose. Misaboa aman’Andrianañahare, ry fifehea’ty tane toio; rengeo an-tsabo t’i Talè; Selà I miningitse andindì’o likerañe haehaeo, Inay, ampionjone’e i fiarañanaña’ey, i fiarañanañañe ra’elahiy. Iantofo te an’Andrianañahare ty haozarañe ambone’Israele eo ty ahe’e an-dikerañe ao ty hafatrara’e. Mampañeven-drehe, ry Andrianañahare, an-toe’o miavake ao; I Andrianañahare’Israele, ro mpanolotse haozarañe naho hafatrarañe am’ondati’eo. Andriañeñe t’i Andrianañahare!

Assinar nossa newsletter

Instalar Église Locale