Efesosy 4

Aa le ihalaliako, izaho mpirohi’i Talè, t’ie hañavelo mañeva i koike nikanjiañe anahareoy, nainai’e mireke an-trentram-po naho mifampiheve am-pikokoañe, ie ilozoha’areo tambozotse ty fitraofan-kina’i Arofoy, mifampipiteke am-pilongoañe. Raike i fañòvay, naho raike i Arofoy—manahake t’ie kinoike ho amam-pitamàñe raike te nikanjieñe: Talè raike, fatokisañe raike, filiporañe raike, naho Andrianañahare raike, Rae’iabikey, lohà’ze he’e, kila añama’e, vaho hene ama’e. F’ie songa nitoloreñ’arofo ami’ty nanokantsokaña’i Norizañey falalàñe. Izay ty nipatera’e ty hoe: Ie nionjoñe mb’añ’abo añe, kinozozò’e an-drohy i fandrohizañey vaho tinolo’e falalàñe ondatio. Aa kanao nionjon-dre, ino i tsaraeñey naho tsy t’ie nizotso hey mb’an-tsikeokeo’ty tane toy ao? I nizotsoy, le i nionjoñe andindi’ze hene likerañe, hañenefa’e ze he’ey. Natolo’e ho Firàheñe ty ila’e naho mpitoky ty ila’e naho venje ty ila’e vaho mpiarake naho mpañoke ty ila’e, hañoke o noro’eo hitoloñe am-pitoroñañe, handranjy ty fañòva’i Norizañey ampara’t’ie hene maha-pitrao-kina am-patokisañe, haharendreke i Anan’Añaharey, hitombo ho añoñ’ay, amy havañonañe nihenefa’i Norizañeiy; ie amy zao tsy ho anak’ajaja ka, havoamboa’ty onja, naho hasiotsio’ze fonga tiom-pañohañe, ami’ty famañahia’ondaty kante an-kalìtake naho kilily, fe am-pitaroñañe ty hatò am-pikokoañe, ty hitomboan-tika ami’ty halifora’e amy Loha’ey ao, toe i Norizañey. Ie ty andrafetañe i fañòvay iaby hifampikatoke, naho hifandreketa’ze hene fange’e amy fifanozaña’ey, songa mañeneke i fitoroña’ey, hampitomboa’e naho hampiraoraoa’e am-pikokoañe i fañòvay. Aa le hoe iraho, eka afanto’ay naho i Talè, ama’areo te tsy hañavelo ami’ty fañaveloa’o kilakila ondatio ka, ami’ty hakoaham-pivetsevetse’iareoo, fa maieñe ty fahafohina’iareo, tsy mpiami’ty havelon’Añahare ty amy habahimoañe an-tro’iereo ao, ami’ty hagañ’arofo’iareo; ie fa dridra an-troke, nijoroboñe an-kadrao-lo, hitoloñe ze fonga hameñarañe vaho fatiti-mena. Tsy izay ty nioha’areo amy Norizañey, ie toe jinanji’areo naho nandrèndreke ama’e, ty amy hatò am’Iesoà ao, le o satan-kavelo’areo taoloo, korendaho i haondaty hambo’e mihamomoke ty amo drao’e mamañahio, le mivaoa am-pitsakorean-troke ao, vaho atsetaho indaty nivaoeñey, tsinene hambam-bintañe aman’Añahare an-kavantañañe naho an-katò miavake. Aa le apitsoho ty fandañirañe, songa mifanaontsia an-kahiti’e, fa mpifampipiteke tika. Miboseha fe ko mandilatse, asoao tsy ho tra ty motak’andro ty haviñera’areo, tsy mone hañomey lalañe i mpañìnjey. Asoao tsy hampikametse ka i mpikizoy, fe hitromake am-pità’e amy ze mahasoa, hanaña’e ty hazòtso ami’ty mipay. Ehe te tsy hakarem-palie’areo ze entañe tsy vente’e fa ze hampiraorao o ila’eo ami’ty fañeva’e, hañasoa o mpijanjiñeo. Ko ampanaheloe’areo i Arofo Masin’Añaharey, i namoli-fitomboke anahareo ho amy andro fijebañañeiy. Apitsoho ama’areo ty afero, ty fombo, ty haviñerañe, ty fihorentseñañe naho ty fanambaitambaiñañe vaho ty halo-tserehañe, fe mifampiferenaiña naho mifampilendèña an-troke vaho mifampihevea manahake ty nañahan’Añahare anahareo amy Norizañey.

Assinar nossa newsletter

Instalar Église Locale