Lioke 3

Tamy taom-paha folo-lime-ambi’ty naha mpanjaka i Tiberio Kaisara, ie niragova e Iehodà t’i Pontio Pilato naho mpifeleke e Galilia t’i Heroda, naho mpifeleke e Itoria miharo am-pari’i Trakonitisy t’i Filipo rahalahi’e, naho mpifeleke e Abilena t’i Lisania vaho tami’ty naha-talèm-pisoroñe i Anasy naho i Kaiafa, le nivotrake amy Jaona ana’i Zakaria am-babangoañe añe ty saontsin’Añahare. Nitsitsihe’e i tane fiaria’i saka Iordaneiy nitalily ty filiporam-pisolohoañe ho ami’ty fañahàn-kakeo; ie pinatetse amy boken-tsara’Isaia mpitokiy ty ti-hoe: Ty fiarañànaña’i mikoike am-patram-bey añey: Hajario ty lala’i Talè, Avantaño o oloñolo’eo, Lembefañe ze hene goledoñe, aketrake ze atao vohitse naho tamboho, ho vantañeñe o mikelokelokeo, naho fonga hareneñe o lalañe tomoantoañeo; Vaho ho oni’ze kila nofotse ty fandrombahan’Añahare. Le hoe re tamy lahialeñe nivovotse mb’ama’e mb’eo halipotsey: O ry Tariran-dapetake! Ia ty nanoro anahareo hibotitsike amy haviñerañe mitotokey? Ampiboaho vokatse mañeva soloho; le ko mamototse mitsakore an-troke ao ty hoe, Rae’ay t’i Abraàme. Itaroñako te mahafitroatse anake ho a i Abraàme amo vato retoañe t’i Andrianañahare. Fa ampoto-katae eo henaneo i fekoñey; le ho firaeñe vaho hafetsak’añ’afo ao ze hatae tsy mamoa voa soa. Aa hoe ty ontane’i lahialeñey ama’e: Ino ty hanoe’ay? Hoe ty natoi’e: Ze aman-tsaroñe roe, soa re te handiva ami’ty tsy ama’e; le hoe izay ka ze manañe mahakama. Pok’eo ka o mpamory vili-lohao halipotse, nanao ama’e ty hoe: O Mpañoke, ino ty hanoe’ay? Le hoe re tam’iereo: Ko mangalake mandikoatse ty linily ho anahareo. Le hoe ty ontane’o lahin-defoñeo: Izahay ka! Ino ty hanoe’ay? Le hoe re tam’iereo: Ko misenge hery ama’ondaty, le ko manao talily vìlañe, vaho mimoneña amo karama’areoo. Amy fitamà’ondatioy, le hene niereñere i Jaona añ’arofo te hera ie i Norizañey, ke tsy ie, le hoe ty natoi’i Jaona am’iareo iaby: Toe alìpoko an-drano ao nahareo, fa homb’eo ty maozatse te amako; tsy mañeva ahy ty hañaha o tomin-kana’eo. Ie ty handipotse anahareo an-Tio Masiñe naho añ-Afo. Am-pità’e ty tsikelo’e, le hahoro’e an-tihy famofohañe ao o vokatseo vaho hatonto’e an-driha o mahakamao, fa ho sodora’e añ’afo tsy hay vonoeñe ty kafo’e. Mbe maro ty fañosihañe nanoe’e te nitaroñe am’ondatio. Aa ie nitrevoke i Heroda mpanjaka ty amy Herodiasie valin-drahalahi’e naho ze fonga sata raty nanoe’i Heroda, le mbore nahili’e am-balabey ao t’i Jaona, ho tovo’iaby rezay. Ie fonga nalipotse ondatio, nilipotse ka t’Iesoà, niloloke naho nisokake i likerañey vaho nizotso ama’e am-batañe manahake ty deho i Arofo Masiñey, le hoe ty fiarañanañañe hirik’andindìñe ao: Anako irehe, kokoako; Ihe ro mahafale ahiko. Va’e telopolo taoñe t’Iesoà te namototse i fitoloña’ey; ie natao ana’Iosefe, toe ana’i Hely, ana’i Matate, ana’i Levy, ana’i Melky, ana’Ianà, ana’Iosefe, ana’i Matatìase, ana’i Amose, ana’i Naome, ana’i Esly, ana’i Nangay, ana’i Maàte, ana’i Matatìase, ana’i Semey, ana’Iosefe, ana’Iodase, ana’Ioanase, ana’i Resà, ana’i Zorobabele, ana’i Salatiele, ana’i Nery, ana’i Melky, ana’i Ady, ana’i Kosame, ana’i Elmaodame, ana’i Ere, ana’Iosè, ana’i Eliezere, ana’Ioreime, ana’i Matate, ana’i Levy, ana’i Someone, ana’Iodase, ana’Iosefe, ana’Ionane, ana’i Eliakime, ana’i Melease, ana’i Mainane, ana’i Matatae, ana’i Natane, ana’i Davide, ana’Iesày, ana’i Obede, ana’i Boze, ana’i Salmone, ana’i Naasone, ana’i Aminadabe, ana’i Arame, ana’i Esrome, ana’i Farese, ana’Iodase, ana’Iakobe, ana’Isaake, ana’i Abraàme, ana’i Tera, ana’i Nakore, ana’i Saroke, ana’i Ragao, ana’i Paleke, ana’i Evre, ana’i Salà, ana’i Arfaksade, ana’i Seme, ana’i Noe, ana’i Lameke, ana’i Matosalà, ana’i Enoke, ana’Iàrede, ana’i Malelaele, ana’i Kainane, ana’i Enose, ana’i Sete ana’i Dame, anak’Andrianañahare.

Subskrybuj nasz newsletter

Zainstaluj Église Locale