Jaona I 2

Ry keleiakoo, isokirako o raha zao tsy handilara’areo. Aa naho eo ty mandilatse, le manam-pañalañalañe aman-dRae tika, Iesoà Norizañey, i Vantañey. Ie ty fañeferañe o hakeon-tikañeo, tsy ty antikañ’avao fa a ty voatse toy iaby. Zao ty aharendrehañe t’ie mahafohiñe aze, le t’ie mañambeñe o lili’eo. Ie manao ty hoe: Fantako re, fe tsy mañambeñe o lili’eo ro remborake, vaho tsy ama’e ty hatò. Aa ndra ia ia mañambeñe o tsara’eo, le fonitse ama’e ao ty fikokoañe an’Andrianañahare. Zao ty ahafohinañe t’ie ama’e: ze manao te mimoneñe ama’e ao, tsy mahay tsy mañavelo amy fañaveloa’ey. O ry rañetseo, tsy isokirako lily vao, fa i lily haehae tama’areo am-pifotorañ’añey. I lily taoloy i tsara jinanji’areoy. Tovo’e, isokirako lily vao, ze tò ama’e naho ama’areo, amy te mihelañ’añe i ieñey vaho mireandreañe i toe hazàvañey. Ze manao te an-kazavañe f’ie malain-dongo le mbe añ’ieñe ao. Mimoneñe an-kazavañe ao ty mikoko rahalahy, le tsy ama’e ty hahatsikapy aze. Fe añ’ieñe ao ty malain-dongo le an-kamoromoroñañe ao ty andenà’e, vaho alik’ama’e ty hombà’e fa nigoà’i ieñey o maso’eo. Manokitse ama’areo iraho ry keleiako, fa votso-kakeo añamy tahina’ey. Manokitse ama’areo iraho ry aba, amy te fohi’areo i boak’am-baloha’ey. Manokitse ama’areo iraho ry ajalahio, fa nahagioke i ratiy. Nanokitse ama’areo iraho ry kabìy, amy te mahafohiñe an-dRae. Nanokitse ama’areo iraho, ry aba, amy te fohi’areo i boak’am-baloha’ey. Nanokitse ama’areo iraho ry ajalahy, amy te maozatse, naho mimoneñe ama’areo ao o tsaran’Añahareo, vaho fa nahareketse i ratiy. Ko mikoko ty voatse toy, ndra o raha ami’ty voatse toio. Naho eo ty mikoko ty voatse toy, tsy ama’e ty fikokoan-dRae. Toe tsy boak’aman-dRae fa hirik’ami’ty voatse toy ze an-tane atoy iaby—ty hadrao’o nofotseo, ty fihañam-pihaino naho ty fisengean-kaveloñe.— Fa mihelañe añe ty voatse toy naho o ìna rati’eo, fe ho veloñe nainai’e ty manao o satrin’Añahareo. Ry keleiako, fa sa sahengaha’e toy; ie nahajanjiñe te ho avy i norizam-bìlañey, toe maro ty norizam-bìlañe pok’eo henaneo. Izay ty aharendrehañe t’ie fa sa honka’e. Nienga an-tika iereo, fa toe tsy nimpiaman-tika. Naho toe ni-mpitraok’aman-tika le mbe ho ni-mpiaman-tikañ’avao; fa izay ty mampidodea te tsy ni-mpiaman-tika. Fa nanàvoñe anahareo i Masiñey, vaho hene fohi’areo. Tsy t’ie tsy mahafohiñe ty hatò ty nisokirako fa t’ie mahafohiñe, vaho tsy amam-bande ty hatò. Ia ty remborake naho tsy ty mandietse te Iesoà i Norizañey. Norizam-bìlan-dre, mpitety an-dRae naho i Anakey. Tsy aman-dRae ze mitety i Anakey; aman-dRae ka ze miantoke i Anakey. Aa le ampimoneño ama’areo ao i jinanji’areo tam-baloha’ey. Ie imoneña’i jinanjiñe am-baloha’ey, le himoneñe amy Anakey naho aman-dRae ao nahareo. Zao i nampitamae’e antikañey, le i haveloñe nainai’e tsy modoy. Nisokireko ama’areo irezao ty amo mipay hamañahio. F’ie, toe imoneña’i Fanavonañe niazo’areo ama’ey, le tsy ipaiañe ka te hatoro ondaty, fa hitoroa’i Fanavona’ey ze he’e, ie ro to, fa tsy vande—aa ty amy nañòha’e anahareoy, le imoneño. Ie amy zao ry keleiako, imoneño, hahatokisan-tika amy fiboaha’ey, tsy hitsolofìñe an-kasalarañe te totsake. Kanao rendre’areo t’ie vantañe, le fohi’areo te hene mitoloñe ami’ty fahiti’e ze anake nampiareñe’e.

Subskrybuj nasz newsletter

Zainstaluj Église Locale