Iirmeà 41

Ie amy volam-paha-fitoy, le nivotrak’amy Gedalia ana’i Ahikame e Mitspà ao t’Ismaele ana’i Netania, ana’i Elisama tirim-panjaka, ie mpiamo roandria’i mpanjakaio, reketse ty lahilahy folo, vaho nitrao-pikama e Mitspa ao. Niongak’amy zao t’Ismaele ana’i Netania naho i folo lahy nindre ama’e rey, vaho linihi’iereo fibara t’i Gedalia ana’i Ahikame, ana’i Safane; vinono iereo i noriza’i mpanjaka’i Baveley ho mpifehe’i taneiy. Zinama’Ismaele ka ze nte-Iehodà mpiama’e ao, o niharo amy Gedalia e Mitspào naho o nte-Kasdy nizoeñeo, o lahin-defoñeo. Ie herone amy namonoa’e i Gedaliay, ie tsy eo ty naharendreke, le totsake eo t’indaty valompolo boake Sekeme naho boake Silò naho hirike Somerone, an-tanteahetse hinaratse naho sikiñe riniatse, vaho an-tsandriñe linililily, ninday enga mahakama naho embok’am-pitàñe homb’añ’anjomba’Iehovà mb’eo. Aa le niavotse i Mitspà t’Ismaele ana’i Netania hifanalaka am’iereo, nangololoike ty rovetse t’ie nañavelo mb’eo; ie nigadoñe am’iereo, le hoe ty asa’e ama’e: Antao homb’e Gedalia ana’i Ahikame mb’eo. Aa ie naneñateña i rovay le zinama’Ismaele ana’i Netania rekets’o mpiama’eo vaho namokovoko iareo am-po kadaha ao. Fe nizoeñe am’iereo t’indaty folo nanao ty hoe amy Ismaele, Ko avetra’o fa aman-kaja mikafitse an-tonda ao, ty vare-bolè, naho ampemba, naho menake vaho tantele. Aa le napo’e, tsy vinono’e miharo amo rolongo’eo. I kadaha najorobo’Ismaele i lolo amy Gedalia rezay le ty nanoe’i Asa mpanjaka ty amy Baasa mpanjaka’Israeley; le natsafe’Ismaele ana’i Netania ama’e ao o vinonoo. Le fonga nendese’Ismaele an-drohy añe ty sehanga’ondaty e Mitspà ao, o anak’ampela’i mpanjakaio naho ze kila ondaty nengañe e Mitspà ao, o nafanto’i Nebozaradene mpifehe mpigaritse amy Gedalia, ana’i Ahikame; aa le nasese’Ismaele ana’i Natania an-drohy vaho nienga hitsake mb’amo ana’i Amaneo añe. Aa ie jinanji’Iohanane ana’i Karea naho o mpifehen-dahindefo mpiama’eo ty halò-tsereke nanoe’Ismaele ana’i Netania, le nendese’iereo o lahilahy iabio naho nionjoñe mb’eo hifangantotse am’Ismaele ana’i Netania, vaho nitendrek’ama’e an-drano-bey e Gibone eo. Le ie niisa’o hene ondaty nindre am’Ismaeleo t’Iohanane ana’i Karea, naho o mpifehe lahin-defoñe nindre ama’eo, le nifale, naho songa niamboho vaho niveve mb’am’Iohanane ana’i Karea mb’eo ondaty nasese’Ismaele an-drohy boake Mitspào. Fe niborafitse am’Iehonane t’Ismaele ana’i Netania reketse ty ondaty valo, nimb’amo ana’i Amoneo mb’eo. Aa le nendese’Iohanane, ana’i Karea, naho ze hene mpifehe lahin-defoñe nindre ama’e, ty sisa’ondaty rinambe’e am’Ismaele ana’i Netania, boak’e Mitspàao—ie fa vinono’e t’i Gedalia ana’i Ahikame naho o mpiama’eo—o lahilahio naho o lahindefoñeo naho o rakembao, naho o ajajao, naho o vositse nendese’e boake Giboneo, le nienga, vaho nañialo an-kialo’i Kimhame marine i Betlekheme añe, hiavotse mb’e Mitsraime añe, ty amo nte-Kasdio, amy t’ie nihembaña’iereo, ty amy namonoa’Ismaele ana’i Netania t’i Gedalia ana’i Ahikame, i nampifelehe’i mpanjaka’i Baveley i taneiy.

Subskrybuj nasz newsletter

Zainstaluj Église Locale