Zekarià 5

Nampiandraeko maso indraike vaho nahatrea te ingo ty boke-peleke mitiliñe Le hoe re tamako: Ino o oni’oo? le hoe ty natoiko: Mahatrea boke-peleke mitiliñe; roapolo kiho ty andava’e, naho folo kiho ty ampohe’e. Aa le hoe re tamako: Izay ty fàtse mandrambañe ty tarehe’ty tane toy; le songa ho soiheñe añe ze mampikametse ty amy sinokitse amy lafe’e raikey, vaho fonga ho faoheñe añe ze mifantafanta, ie i sinokitse amy lafe’e ila’ey. Ampionjoneko mb’eo, hoe t’Iehovà, hiziliha’e ty kiboho’i mpikizoy naho ty kivoho’i mpifanta vìlañe ami’ty añarakoy; ie hialeñe amy akibay le habotse’e rekets’o hatae’eo naho o vato’eo. Aa le niavotse mb’eo i anjely nifanaontsy amakoy, nanao amako ty hoe: Ampiandrao henaneo o fihaino’oo, le mahaisaha, he ino o miheo mb’eoo. Le hoe iraho: Ino zao? Le hoe re: Ie i fañaranañe mionjom-beoy; le tinovo’e ty hoe: Ie ty vinta’iareo an-tane toy iaby— le ingo te nampionjoneñe ty lombo’e fìrake—vaho amy fañaranañey ao ty rakemba miambesatse. Le hoe re: Zao o hatsivokarañeo. Le naronje’e am-po’i fañaranañey ao re, vaho nafetsa’e am-bava’e eo i lombo’e firakey. Nampiandraeko maso amy zao naho nahatrea te ingo nimb’eo ty rakemba roe, i tiokey amo ela’eo, ie aman’elan-tsama, vaho nongaha’iareo añivo’ty tane toy naho i likerañey i fañaranañey. Aa le hoe ty asako amy anjely nisaontsy amakoy: Hendese’iereo aia i fañaranañey? Le hoe re tamako: Hamboara’iereo akiba an-tane Sinare añe; ie hinalankañe izay le hapok’an-toe’e eo.

Baiboly Tandroy

Copyright © 2023 Steve Lellelid Language: Tandroy (Malagasy, Tandroy-Mahafaly) DRAFT VERSION This translation is made available to you under the terms of the Creative Commons Attribution Share-Alike license 4 — CC-BY-SA-4.0 — CC-BY-SA-4.0

Abonner på nyhetsbrevet vårt

Hold deg oppdatert på nye profiler, arrangementer og plattformnyheter.