Iekezkèle 19

Inao koahe, añonjono fandalàñe o roandria’Israeleo, le ano ty hoe: Ia ty rene’o? Toe liona vave’e añivo’o lionao, ie nandre amo lionao nañabey o amori’eo. Nibeize’e ty raik’amo ana’eo, le ninjare liona tora’e, nioke hitsepake i tsindrokey; nabotse’e ka t’indaty. Jinanji’o kilakila’ndatio ty ama’e; le finandri’iareo an-koboñ’ao, vaho nendeseñe am-porengotse mb’an-tane Mitsraime añe. Ie nionin-drene’e amy fandiñisa’e azey, t’ie po-pitamàñe, le nangake raike ka amo ana’eo, vaho nibeize’e ho liona tora’e. Nitingatinga amo lionao re ninjare liona tora’e, nihazatse nipay tsindroke; vaho namotseke ondaty. Narotsa’e o kijoli’iareo fatratseo, naho nampangoakoahe’e o rova’iareoo; nilatsà’i taney naho ze fonga ama’e ao ty feom-pitroña’e. Niambotraha’o kilakila’ndaty boak’amy ze hene fifelehañe mañohok’azeo, le nandafiha’iareo harato, namandrike aze an-kobo’iareo ao. Niporengote’iareo naho najoñe an-kipa viñe ao, vaho nasese mb’am-panjàka’i Bavele mb’eo; vinaho’iareo añe tsy ho tsanoñañe am-bohi’Israele ao ka ty feo’e. Nanahake vahe an-tanembalobok’ao ty rene’o, naketsa añ’olon-drano eo; nandrevake vaho niegoego ty amy rano manganahanao. Nanoeñe kobaim-pifehe ty ra’e fatratse; nitiotiotse ambone o tora’e fatratseo; niningoningo ambone eo o tora’e maroo. F’ie nombotañe an-keloke, naho nahifik’an-tane eo; nimaihe’i tiok’atiñanañey o voa’eo; nipekañeñe o tsampa’eo, niforejeje i foto’e maozatsey, vaho nitomontoñe’ty afo. Naketsa am-patrañe añe re henaneo, an-tane maike amam-paipaiñe. Niakatse an-tsampa’e lava ty afo, namorototo o voa’eo, le tsy aman-tsampa maozatse re hanoeñe kobaim-pifeheañe. Fandalàñe toy, toe ho fandalàñe.

Abonner på nyhetsbrevet vårt

Installer Eglise Locale