Avotse 27

Tseneo kitrely am-barama mendoraveñe, lime kiho ty halava’e naho lime kiho ty ampohe’e; hatao efa-mira i kitreliy vaho telo kiho ty haabo’e. Le itseneo tsifa i hotso’e efatse rey; ho raik’ama’e i tsifa’e rey vaho ipakoro torisìke. Le andranjio ty fana’e fañafahan-davenoke naho o sadròm-poroha’eo naho o antova’eo, o firango’eo naho o finga’eo; ano torisìke o harao’e iabio. Le andranjio harato torisike tsingarakarake; le tseneo ravake torisìke efatse i tsingarakarakey ankotso’e efatse. Reketo ambane’ty soñi’i kitreliy i tsingarakarakey hahatakara’e ty havaki-miran-kaabo’i kitreliy mañambane. Andranjio baoñe i kitreliy, baoñe ami’ty mendoraveñe, le ipakoro torisìke. Aziliho amo ravakeo i bao’e rey le songa hifamalahañe añ’ila’roe’i kitreliy i bao rey hitarazoañe aze. Itseneo koake am-barambañe, amy nanoroañ’azo ambohitse eiy ty handranjiañ’aze. Itseneo kiririsa i kivohoy: mb’amy Negeve mañatimo le lamba tinenon-kèreñe am-pole leny matify ty hiradorado amy kiririsay; zato kiho ty halava’e ami’ty lafe’e raike; ty anakòre’e roapolo naho ty vave’e torisìke roapolo; ty porengo volafoty amo anakòreñe naho bandi’eo. Ie ka ty avaratse ami’ty andava’e: ty firadoradoa’e zato kiho, ty anakòre’e roapolo naho ty vave’e torisìke roapolo vaho o fiporengon’anakòreñeo naho o bandi’eo am-bolafoty. Le ty ampohe’i kiririsay ahandrefañey, limampolo kiho ty firadorado’e, folo ty anakòre’e naho folo ty vave’e. Le ty andava’i kiririsay, limampolo kiho ty añ’ila’i fanjirihañey mianiñànañe. Ty firadoradoa’e ami’ty ila’i lalambeiy, folo-lime amby kiho, ty anakòre’e telo vaho ty vave’e telo. Le ty firadorado’e añ’ila’e ka, folo-lime amby naho ty anakòre’e telo vaho ty vave’e telo. Ty lalambei’i kiririsay, firadoradoañe roapolo kiho: ami’ty manga, malòmavo naho mena mañabasà vaho leny rinorotse am-pole matify nivahorem-pitrebeke; ty anakòre’e efatse naho ty vave’e efatse. Songa bandieñe volafoty o anakòre’e mañohoke i kiririsaio, volafoty o porengo’eo vaho torisìke o vave’eo. Kiho zato ty andava’i kiririsay naho limampolo ty ampohe’e etoa naho eroa naho kiho lime ty haabo’o aman-deny rinorotse matifio, vaho o vave’e torisìkeo. Hene torisìke o fana’i kivohoio amy ze fitoloñañe aze naho o tsato’eo vaho o tsato’i kiririsaio. Amantoho amo ana’Israeleo ty hinday menak’olive ki’e finofoke hireheta’i jiroy nainai’e amy kibohom-pamantañañey alafe’i lamba-fañefetse aolo’i fañinaiy, le ho hajarie’i Aharone naho o ana’eo ty hireheta’e añatrefa’Iehovà boa-kariva ampara’te porea’ty maraindray: ho fañè amo hene’tariran’ana’Israeleo.

Abonner på nyhetsbrevet vårt

Installer Eglise Locale