Mpizaka 10

Ie añe t’i Abimeleke, le nitroatse handrombake Israele ka t’i Tolà, ana’i Poà, ana’i Dodò, nte-Isakare; mpimoneñe e Samire am-bohi’i Efraime. Nizaka e Israele taoñe roapolo-telo’amby re naho nihomake vaho nalenteke e Samire ao. Ie añe, nitroatse ka t’Iaire nte Gilade le nizaka taoñe roapolo-ro’amby. Nanañ’anadahy telo-polo re niningitse añ’ana-borìke telo-polo, ie aman-drova telo-polo, o atao rova’Iaire sikala henaneo; an-tane Gilade ao irezay. Nivilasy t’Iaire vaho nalenteke e Kamone ao. Nanao haloloañe am-pivazohoa’Iehovà indraike o ana’Israeleo ie nitoroñe o Baaleo naho o Hazomangao naho o’ndrahare’i Arameo naho o’ndrahare’i Tsidoneo naho o ‘ndrahare’i Moabeo naho o ‘ndraharen’ana’i Amoneo naho o ‘ndraharen-te-Pilistio vaho naforintse’iareo t’Iehovà, tsy nitoroñe aze. Aa le nisolebotse am’Israele ty haviñera’Iehovà le natolo’e am-pità’o nte-Pilistio, vaho am-pità’o ana’i Amoneo. Finorekekè’iareo naho dinemo’iareo taoñe folo-valo’amby o ana’Israeleo, toe o ana’Israele alafe’Iordaney an-tane’o nte-Amoreo e Giladeo. Nitsaha’o ana’i Amoneo ka Iordaney hialy am’Iehoda, naho amy Beniamine, naho amy anjomba’i Efraimey, vaho vata’e nalovilovy t’Israele. Nitoreo amy Iehovà amy zao o ana’Israeleo, nanao ty hoe: Aman-kakeo ama’o zahay, fa niambohoa’ay t’i Andrianañahare’ay, vaho nitoroñe o Baaleo. Aa le hoe t’Iehovà amo ana’Israeleo: Tsy nirombaheko amo nte-Mitsraimeo hao naho amo nte-Amoreo naho amo ana’i Amoneo, naho amo nte-Pilistio? Niforekeke’o nte-Tsidoneo ka, naho o nte-Amalekeo, naho o nte Amoneo le nitoreova’areo vaho rinombako am-pità’iareo. Fe niambohoa’areo, vaho nitoroñe ‘ndrahare ila’e; izay ty tsy andrombahako anahareo. Akia koiho o ‘ndrahare jinobo’areoo; angao handrombaha’iareo amo hasotria’areoo. Le hoe o ana’Israeleo amy Iehovà: Toe nanao hakeo zahay, ano ama’ay ze hatao’o soa; fa ehe hahao te anito. Aa le nadò’iareo añe o ‘ndrahare ankafankafa añivo’iareo ao, naho nitoroñe Iehovà; vaho niferenaiña’ty arofo’e o nte’Israeleo amo falovilovia’eo. Kinoik’amy zao o nte-Amoneo naho nitobe e Gilade ao. Nifanontoñe ka o ana’Israeleo le nitobe e Mitspà ao. Le hoe ty nifanaontsia’ondatio naho o roandria’i Giladeo: Ia mb’arè ty hiorots’aly amo ana’i Amoneo? Ie ty hatao lohà’o hene’mpimone’i Giladeo.

Abonneer op onze nieuwsbrief

Église Locale installeren