Mpañoke 4

Aa le niharaharaeko indraike ze forekekeñe iaby ambane’i àndroy: hehe ty ranomaso’o forekekeñeo, ie tsy amam-pañohò; naho am-pità’o mpamorekekeo ty hafatrarañe; f’ie tsy amam-pañimba. Aa le nandrenge o vilasy fa nihomakeo iraho, ambone’o veloñe mbe amañ’aiñeo. Eka, lombolombo i roe rey ty mbe lia’e tsy eo, ie mbe tsy nahaoniñe ty sata-raty anoeñe ambane’i àndroy. Nitreako indraike te o fitoloñañe iabio naho ze tolon-draha mahatafetetse, le voka’ty fifampitsikiriha’ondaty naho i rañe’ey. Hakafoahañe naho fañeañan-tioke ka zao. Mamihim-pitañe ty dagola, vaho abotse’e ty nofo’e. Hàmake ty fianjiñañe mahapea-pitàñe, ta ty fitàn-droe pea fitromahañe naho fañeañan-tioke. Nenteako indraike o hakafoahañe ambane’i àndroy. Teo ty raike tsy amam-paha-roe; toe tsy nanañ’anake, tsy aman-drahalahy: fe tsy mbia tsy heneke o fitoloña’eo; vaho tsy mahaene-pihaino’e ty vara; Tsie, hoe re, Ia ze o itoloñako zao, malorè ty fiaiko tsy hanjo ty soa? hakafoahañe ka zao mbore fifanehafañe mahaore. Hàmake te roe ta t’ie raike; amy te soa fitombo ty fitoloña’iareo. Ie mikorovoke ty raike, honjone’i rañe’ey; fe feh’ohatse te mikorovoke ty bangìñe tsy manañ’ila hampitroatse aze. Tovo izay, ie mitrao-pandreañe ty roe le mafana: fa ino ty hampafana aze t’ie raike? Mete hiambotraha’t’indaty ty raike ie miereñereñe, fe hijohañe hiatrek’aze ty roe; tsy rofondrofoteñe aniany ty taly telo-randra. Ndra kitra’e ajalahy rarake mahihitse ta t’ie mpanjaka antetse gege tsy mañaoñe hatahata. Toe niboak’am-balabey ao re ho mpanjaka; ie nirarake te nitoly am-pifehea’e ao. Nitreako te niarimboe’ze hene veloñe ambane’i àndroy, i ajalahy tsinara valoha’ey, i handimbe azey, naho te tsifotofoto ondaty am-boriza’e ao, f’ie tsy ho loho onjone’o manonjohy azeo. Toe hakafoahañe ka zao vaho fañeañan-tioke. Ambeno ty lia’o mb’añ’anjomban’añahare mb’eo, harineo hijanjiñe’o, Hàmake izay ta te mañenga ty soro’o seretseo, ie tsy apota’e te manao raty.

Abonneer op onze nieuwsbrief

Église Locale installeren