Marka 4

Ie niorotse nañoke añ’olon-driake eo indraike le akore ty hamaron-dahialeñe nihipoke ama’ey kanao nijon-dakañe le niambesatse an-driake ey, vaho tañ’olotse, an-tamboho ey i màroy. Le nitaroña’e raha maro am-pandrazàñañe, vaho hoe re te nañoke: Inao: Teo te niavotse mb’eo ty mpandrara-tabiry handrarake. Ie nandrarake, le nipoke añ’olon-dalañe eo ty ila’e vaho nimb’eo o voroñeo nitsimok’aze. Ty ila’e nipoke ami’ty lamilamy marivo tane, fe nitiry aniany, amy te tsy nilaleke i taney, ie nanjirike i àndroy, fe nimae, vaho niforejeje amy te tsy niam-bahatse. Nipoke am-patike ao ka ty ila’e, fe nitiram-patike nampidageañe aze vaho tsy namoa. Ty ila’e nipoke an-tane hoba, le nitiry naho nandrevake vaho namokatse, teo ty telo-polo, teo ty enem-polo, vaho teo ty zato. Le hoe re: Ze aman-dravembia mahajanjiñe, Le mijanjiña. Ie nitolake, le nañontanea’o mpiama’eo naho i folo ro’amby rey i nirazañe’ey, vaho nanoa’e ty hoe: Inahareo ro nitolorañe ty tafatoño’i Fifehean’Añaharey, fe hene razañeñe o alafe’eo soa te: ie miisake, ro hañisake fe tsy hahaoniñe; ie mitsendreñe, ro hijanjiñe, fe tsy haharendreke; ke hitolike, vaho ho hahàñe o tahi’iareoo. Le hoe re tam’iereo: Tsy nirendre’areo hao i ohatse zay? aa le akore ty haharendreha’areo o fandrazañañe iabio? Mandrarake o tsarao i mpandrarakey. O añ’olon-dalañeo, amy nandrarahañe i tsaraiy, ie mijanjiñe, pok’eo aniany i mpañìnjey manoitse i tsara nararake am’iareoy. Manahake izay o nararake am-batovatoeñeo, ie mahatsendreñe i tsaray le mandrambe aze an-kaehake amy zao; f’ie tsy amam-bahatse, le aniany avao te mitojeha ty hasilofañe ndra ty fampisoañañe ty amy tsaray le torifike iareo. I nararake am-patike ao rezay, le o mijanjiñe i tsaraio, fe mitsamoake ao ty fihakahaka’ty tane toy, naho ty hakalitaha’o varao, naho ty hatea-raha ila’e, ze mahadageañe i tsaray tsy hamokatse. O retoañe nararake an-tane soao, le mijanjiñe i tsaray naho mandrambe aze vaho mamokatse: eo ty telo-polo, eo ty enem-polo, vaho eo ty zato. Le hoe re tam’iereo: Endeseñe ho rongonan-karoñe hao ty jiro? ke hazilike ambane fandreañe ao? tsy hàmake t’ie apoke am-panampezan-jiro ey hao? Toe tsy ao ty naetake ze tsy ho bentareñe, vaho tsy ao ty nitsikoeñe ze tsy ho boraheñe. Ze aman-dravembia hijanjiñe, Mijanjiña. Le hoe re tam’iereo: Ereñereo o janjiñe’areoo; fa ami’ty fañarànañe añaràna’areo ro añarànañe ama’areo vaho ho tompeañe ama’areo mijanjiñe. Ho tovoñeñe ze manañe, fa ami’ty tsy manañe ndra ty kedekedek’ama’e ro sintoneñe. Le hoe re: Razañeñe amy t’indaty mandrarake tabiry an-tane eo i Fifehean’Añaharey, mirotse re te haleñe naho mitroatse boak’andro; mitiry naho mitombo i tabiriy, fe tsy apota’e te manao akore. Mampitiry ho aze i taney: i losoy aolo, le i toka-tsofi’ey, vaho izay o voa’e matoe an-doha’eo. Ie rifo le ahitri’e i mesoy fa tondroke ty fitatahañe. Hoe ka re: Inoñe ty handrazañan-tika i Fifehean’Añaharey? Ohatse manao akore ty ampidodean-tika aze? Ampanahafeñe ami’ty voa-nonoke, ie amboleañ’an-tane ro kede amy ze tabiry an-tane atoy; f’ie tongisañe, le mitiry naho midorenake mandikoatse ze hatae an-tetek’ao vaho ampandrevahe’e tsampañe hanoa’o voron-dikerañeo traño añ’alo’e ao. Maro ty fandrazañañe nitsarae’e hoe izay ty amy nahafijanjiña’iareo. Le tsy nitaroña’e naho tsy am-pandrazañañe avao; ie nitolake vaho nampalange ze he’e amo mpiama’eo. Ie niroñe ho hariva i àndroy, le hoe re am’iereo: Antao hitsake mb’andafe eñe. Nienga i lahialeñey iereo naho nendesen-dre, ie tan-dakañe ao avao. Nindre lia ama’e ka ty lakañe ila’e. Nikofaok’amy zao ty tio-bey, le trinabotrabo’o onjao i lakañey, vaho nañaly ho pea. Tam-boli’i lakañey re nirotse añ-akalañe, le nampivañoneñe ami’ty hoe: O Talè, tsy ahoa’o hao t’ie òpo? Nitroatse re nitrevoke i tiokey naho nanao ty hoe amy riakey, Manintsiña, mipendreña. Le nijihetse i tiokey vaho nipendreñe ami’ty do’e. Le hoe re tam’iereo: Ino ty ihembaña’areo? Mboe tsy am-patokisañe hao? F’ie nianifañe, nifanao ty hoe: Ondaty manao akore v’itoio, te ivohora’i tiokey naho i riakey!

Abonneer op onze nieuwsbrief

Église Locale installeren