Sabo Talango’e 8

Ho ni-soa naho ni-rahalahiko irehe, i ninono am-patroan-drenekoy! Ie amy zay, naho nitendrek’ama’o alafe’e ao iraho vaho nañorok’azo, le tsy ho nifosae’ondatio. Ho nikozozoteko mb’añ’anjomban- dreneko mb’eo, mb’amy nañoke ahikoy. ho nampinomeko divay mandrove, naho ty ron-draketako. Iondana’ty lohako ty fità’e havia, vaho mañohoñ’ahy ty fità’e havana. Afantoko ama’areo, ry anak’ampela’Ierosalaimeo; ko mampitsekake fikokoañe am-para’te irie’e. Ia o mionjomb’etoy misazok’amy fikokoa’eio? Nampivañoneko ambane’i takokoy irehe; amy nampitsongoa’o i rene’o; teo ty nitsongoa’i nahatoly azoy. Apetaho hoe voli-fitomboke añ’arofo’o ao iraho, hoe alama am-pità’o eo; fa mira ami’ty haozaran-kavilasy ty fikokoañe, manahake ty hagàñe i tsikeokeokey ty famarahiañe; misolebotse o lel’afo’eo, toe lel’afo milebaleba. Rano tsifotofoto tsy mahasaoke ty fikokoañe; naho tsy mahaopo aze ty fisorotombahañe; ie hatolo’t’indaty ze hene vara añ’anjomba’e ao hahazoa’e fikokoañe, le ho vata’e onjirañe. Manan-jay ampela zahay f’ie mbe tomoe-nono, hanoe’ay akore i zai’aiy amy andro fifofoañe azey? Naho kijoly re le handranjia’ay fitilik’abo volafoty; ie lalambey, le harikatoha’ay varamba-mendoraveñe. Kijoly iraho, hoe fitilik’abo o nonokoo; hoe t’ie minday fañanintsiñe am-pihaino. Nanan-tondam-bahe e Baale-Kamone ao t’i Selomò; nafondro’e ama’ondaty. Songa mañondroke volafoty arivo ama’e ty amo voka’eo. Aoloko eo i tanem-bahekoy, azo ry Selomò i arivoy, roan-jato ty a o mpañalahala i voka’eio. O ry mpimoneñe an-goloboñe ao, te hijanjiñe ty fiarañanaña’o o mpiamakoo, ehe ampitsanoño ahy! Mipitsiha ry kokoakoo, manahake o fanalokeo naho o farasy ambone vohitse iregoregoan-kafirio.

Misoratra ao amin'ny gazety anay

Apetraho ny Église Locale