Sabo Talango’e 6

Sabo Talango’e 6

Nimb’aia i kokoa’oy, ry maintelèn’ampelao? Nitsile mb’aia i kokoa’oy, hindreza’ay fipay? Nizotso mb’an-golobo’e mb’eo i kokoakoy, mb’am-pilafiham-pahafiriañe mb’eo, hiarake an-golobo’e ao, naho hanontoñe o voñem-bindao. A i kokoakoy iraho, vaho ahiko re, ie miarak’am-baremañitse ao. Hamotsontane irehe, kokoako, manahak’i Tirzà, naho ty hasoa’Ierosalaime, amam-bolonahetse hoe lahialen-defoñe mañonjom-borovoro. Atoliho mb’eo hoekeo o maso’oo, fa mampivalitaboak’ahy; manahake ty lia-rain’ose mikararake mañambane i Gilade mb’eo o volo’oo. Lia-rain’añondri-vave mionjoñe boak’ampanasañe ao o nife’oo, songa reke-pihambañe, ndra raike tsy jeña. Hoe vakim-boan-draketamena ty fitendrean’aoli’o an-kalo’o marerarera’oo. Mete ho enempolo ty valim-panjaka, naho valompolo o sakeza’eo vaho somondrara tsy fotofoto; fa ihe ry dehoko, ry homozohozo’e, tsy amañ’ohatse, bako tokan-drene’e, mitoratsik’amy nisamak’azey. Ie nizoe’o somondrarao le natao’iareo soa-tata, nandrenge aze ka o valim-panjakao naho o sakezao. Ia o miboake hoe t’ie andro manjirikeo? motsotsore hoe i volan-dorisay, mikotritriake hoe i àndroy, mahalatsa hoe valobohòke mirañoraño an-kobaiñe? Nizotso mb’añ’ala-vondron-tsakoa mb’eo raho hisary o fitirim-bao am-bavataneo, hañenteako ke mibotiboty o vaheo, he mamòñe o raketao. Niambovo amako te navotra’ty troko an-tsarete ao, hehe te añ’ilako eo ty roandria.

Misoratra ao amin'ny gazety anay

Apetraho ny Église Locale