Razan-tSaontsy 3

O anake, ko haliño o entakoo le ampañambeno ty tro’o o lilikoo, Le halavan’andro naho taon-kavelo vaho fierañerañañe ty hatovoñ’ama’o. Ko ado’o hieng’azo ty fatarihañe naho ty hatò; rohizo am-bozo’o eo, sokiro an-takelan-tro’o ao, hahaoniña’o hamaràm-bintañe vaho tahinañe soa ampivazohoan’Añahare naho ondatio. Miatoa am’Iehovà an-kaampon-tro’o vaho ko iatoa’o ty hilala’o; Iantofo amy ze hene lia’o, le ho vantañe’e o lala’oo. Ko manao mahihitse a maso’o; mirevendreveña am’Iehovà vaho ihankaño ty hatsivokarañe, ie ho fijangañan-tsandri’o, vaho fameloman-taola’o. Iasio t’Iehovà amo vara’oo, naho ami’ty lohavoa’o nampitomboe’oo; Le handopolopo, hamopòke ty an-driha’o ao vaho handopatse divay vao o sajoa’oo. O anake, ko sirikae’o ty fandilova’Iehovà ko heje’o o fañendaha’eo, fa lilove’Iehovà ty kokoa’e, hambañe ami’ty rae i anadahy ampokofe’ey. Haha t’indaty mahaonin-kihitse, naho t’indaty itomboan-kilala, fa lombolombo ty fitomboam-bolafoty ty fibodobodoa’e, vaho ambonem-bolamena ty havokara’e. Sarotse te amo safirao vaho tsy amo salalae’oo ty mañirinkiriñ’aze. Lava-havelo ty am-pitàn-kavana’e vara naho asiñe ro am-pitàn-kavia’e. Lalam-panintsiñañe o lala’eo, vaho fierañerañañe o lalam-pandia’eo. Hataen-kavelon-dre amo mivontititse ama’eo; naho hene haha ze mamejañe aze. Hihitse ty nañoriza’Iehovà ty tane toy; Hilala ty nampijadoña’e o likerañeo; O hilala’eo ro ampiborahañe o lalekeo, vaho ampitsopaha’o rahoñeo mika. O anake, asoao tsy hisitake am-pahatreava’o ao o raha zao: vontitiro ty hihitse to naho ty filieram-batañe, hamelombeloñe ty tro’o, naho handravake ty vozo’o. Le handena’o an-kanintsiñe ty lia’o, vaho tsy hikotrofotse ty tombo’o. Tsy ho hembañe te mandre; eka ie mihitsy, ho mamy ty firoro’o. Ko mianifañe te ivotraha’ty mampangebahebake, ndra ty fampiantoañe o lo-tserekeo te mifetsake. fa Iehovà ro hatokisa’o naho hitañe ty tombo’o tsy ho fandriheñe. Ko tana’o ami’ty mañeva ty soa, naho an-taña’o ty mahaeneñe aze. Ko manao ty hoe am’ondatio: Akia hey, le mibaliha, vaho hamaray ty hanolorako azo— ie ama’o ao avao. Ko mikitro-draty am’ondatio, ie mimoneñe am-patokisañe marine’azo. Ko liera’o tsi-aman-tali’e ty ondaty tsy nanjoam-boiñe. Ko tsikirihe’o t’indaty piaroteñe vaho ko joboñe’o o sata’eo; tiva am’Iehovà ty mengoke; fe itraofa’e safiry ty vantañe. Nafà’Iehovà ty akiba’o lo-tserekeo, fe tahie’e ty kivoho’o vantañeo. Toe ati’e o mpanitseo, fe isohe’e ty mpireke. Handova hasiñe o mahihitseo, fa onjone’o seretseo ka ty mahasalatse.

Misoratra ao amin'ny gazety anay

Apetraho ny Église Locale