Nekemia 7

Ie nifonitse i kijoliy naho fa natroako o lalañeo naho fa tinendreko o mpañambeñeo naho o mpisaboo vaho o nte-Levio, le nafantoko amy Kananý, rahalahiko naho amy Kananià, mpifelek’i anjombam-panjakay ty fandiliañe Ierosalaime (amy te ondaty vañon-dre, nañeveñe aman’Añahare mandikoatse i màroy); le nanoako ty hoe: Ko sokafe’areo o lalambei’Ierosalaimeo ampara’te mafana-voho ndra te eo o mpigaritseo, arindrino naho agabeño; vaho joboño mpañambeñe amo mpimone’Ierosalaimeo, songa ami’ty fiambena’e naho sindre tandrife’i anjomba’ey. Toe bey naho jabajaba o rovao fe tsy niampeampe t’indaty ao vaho mboe tsy namboareñe o anjombao. Le najon’Añahareko an-troko ao ty hanontoñe o mpiaoloo naho o mpifehe ondatio, hampiantoñoñe iereo. Le nitreako ty bokem-piantoño’o nionjoñe mb’atoy tam-baloha’e vaho nizoeko sinokitse ao ty hoe: Zao o ana’i borizà niavotse am-pandrohizañe amo nasese mb’eoo, amo nasese’i Nebokadnetsare mpanjaka’i Baveleo vaho nimpoly mb’e Ierosalaime naho Iehoda añe, songa mb’an-drova’e mb’eo; o nindre amy Zerobabele mb’etoao, Iesoa, i Nekemià, i Atsarià, i Raamià, i Nahamanià, i Mordekay, i Bilsane, i Misperete, i Bigvay, i Nekome, i Baanà. Ty ia’ty lahilahy amo nte-Israeleo, le zao: O ana’i Paroseo, roarivo-tsi-zato-tsi-fitompolo-ro’amby. O ana’i Sefatiào: telonjato-tsi-fitompolo-ro’amby. O ana’i Arào, enenjato-tsi-limampolo-ro’amby. O ana’i Pakate-moabeo, o ana’Iesoào naho Ioabeo, ro’arivo-tsi-valonjato-tsi-folo-valo’amby. O ana’i Elameo, arivo-tsi-roanjato-tsi-limampolo-efats’amby. O ana’i Zatòo, valonjato-tsi-efapolo-lim’amby. O ana’i Zakaio, fitonjato-tsi-enempolo. O ana’i Binoio, enenjato-tsi-efapolo-valo’amby. O ana’i Bebaio, enenjato-tsi-roapolo-valo’amby. O ana’i Azgadeo: roarivo-tsi-telonjato-tsi-roapolo-ro’amby. O ana’i Adonikameo, enen-jato-tsi-enempolo-fito’amby. O ana’i Bigaio, ro’arivo-tsi-enempolo-fito’amby. O ana’i Adineo, enenjato-tsi-limampolo-lim’amby. O ana’i Atere Kizkiào, sivampolo-valo’amby. O ana’i Kasomeo, telonjato-tsi-roapolo-valo’amby. O ana’i Betsaio, telonjato-tsi-roapolo-efats’amby. O ana’i Karifeo, zato-tsi-folo-ro’amby. O ana’i Giboneo, sivampolo-lim’amby. O nte-Betlekheme naho i Netofào, zato-tsi-valopolo-valo’amby. O nte-Anatoteo, zato-tsi-roapolo-valo’amby, O nte-Bete-azemaveteo, efapolo-ro’amby. O nte-Kiriate-Iearimeo, i Kefirà vaho i Beroteo, fiton-jato-tsi-efapolo-telo’amby. O nte-Ramà naho nte-Gebao, enen-jato-tsi-roapolo-raik’amby. O nte-Mikmaseo, zato-tsi-roapolo-ro’amby. O nte Betele naho Aio, zato-tsi-roapolo-telo’amby. O nte-Nebo ila’eo, limampolo-ro’amby. O ana’i Elame ila’eo, arivo-tsi-roanjato-tsi-limampolo-efats’amby. O ana’i Karimeo, telonjato-tsi-roapolo. O ana’Ierikoo, telonjato-tsi-efapolo-lim’amby. O ana’i Lodeo, i Kadide vaho i Ono, fitonjato-tsi-roapolo-raik’amby. O ana’i Senàao, teloarivo-tsi-sivanjato-tsi-telopolo. O mpisoroñeo: o ana’Ikedaià, tañ’anjomba’Iesoào, sivanjato-tsi-fitom-polo-telo’amby. O ana’Imereo, arivo-tsi-limampolo-ro’amby. O ana’i Pasoreo, arivo-tsi-roanjato-tsi-efapolo-fito’amby. O ana’i Karimeo, arivo-tsi-folo-fito’amby. O nte-Levio: o ana’Iesoao, a i Kadmieleo vaho o ana’i Hodevào, fitom-polo-efats’amby. O mpisaboo: o ana’i Asafeo, zato-tsi-efapolo-valo’amby. O mpañambeñeo: o ana’i Salomeo, o ana’i Atereo, o ana’i Talmoneo, o ana’i Akobeo, o ana’i Katitào, o ana’i Sobaio, zato-tsi-telopolo-valo’amby. O mpitoroñe amy anjombaio: o ana’i Tsikào, o ana’i Kasofào, o ana’i Tabaoteo, o ana’i Keroseo, o ana’i Siào, o ana’i Padoneo, o ana’i Lebanao, o ana’i Kagabào, o ana’i Salmaio, o ana’i Kanàneo, o ana’i Gideleo, o ana’i Gakhareo, o ana’i Reaiào, o ana’i Retsineo, o ana’i Nekodao, o ana’i Gazameo, o ana’i Ozào, o ana’i Paseakeo, o ana’i Besaio, o ana’i Meonimeo, o ana’i Nefisesimeo o ana’i Bakokeo, o ana’i Kakofào, o ana’i Karkoreo, o ana’i Batsliteo, o ana’i Mekidào, o ana’i Karsào, o ana’i Barkoseo, o ana’i Siserao, o ana’i Tamakeo, o ana’i Netsiakeo, o ana’i Katifào. O anam-pitoro’i Selomòo: o ana’i Sotahio, o ana’i Sofereteo, o ana’i Peridao, o ana’Ia’alào, o ana’i Darkoneo, o ana’i Gidelo, o ana’i Sefatiào, o ana’i Katileo, o ana’i Pokerete Hatsebaimeo, o ana’i Amoneo. O hene mpitoron’anjombao naho o anam-pitoro’i Selomòo: telonjato-tsi-sivampolo-ro’amby. Iretoañe ty niboak’e Tel-melà, i Tel-karsà, i Kerobe, i Adone vaho Imere: fe tsy nahafitoñoñe ty anjomban-droae’e ndra ty maha-tariratse iareo, ke t’ie nte-Israele: O ana’i Delaiào, o ana’i Tobiào, o ana’i Nekodao: enenjato-tsi-efapolo-ro’amby. Le amo mpisoroñeo: o ana’i Kabaiao, o ana’i Hakotseo, o ana’i Barzilao i nañenga ty raik’amo anak’ampela’i Barzialy nte-Giladeo ho vali’ey le nitokaveñe ami’ty tahina’iareo. Pinay amo sinokitse am-piantoñoñeo iareo fe tsy nahaisake; aa le natao ho maleotse vaho nasitak’amy fisoroñañey. Le hoe ty nanoa’i Tirsatà, t’ie tsy hikama o miava-do’eo ampara’te eo ty mpisoroñe hiongake reketse Orime naho Tomime. Ty fitonto’i valobohòke zay le efats’ale-tsi-ro’arivo-tsi-telonjato-tsi-enempolo, mandikoatse o fetrek’oro’eo naho o anak’ampata’eo, le fito-arivo-tsi-telonjato-tsi-telopolo-fito’amby; naho am’iereo ty lahilahy naho rakemba mpisabo roanjato-tsi-efapolo-lim’amby. O soavala’iareoo, fiton-jato-tsi-telopolo-eneñ’amby; o borìke vosi’eo, roanjato-tsi-efapolo-lime amby. O rameva’eo, efajato-tsi-telopolo-lim’amby naho o borìke’eo, eneñ’arivo-tsi-fitonjato-tsi-roapolo. Le amo talèn-droae’eo ty nanolotse amy fitoloñañey: i Tirsatà nanolotse bogady volamena arivo naho koveta limampolo vaho sarom-pisoroñe liman-jato-tsi-telopolo; o talèn-droae’eo nanolotse bogady volamena ro’ale naho tsanganolo volafoty ro’arivo-tsi-roanjato amy fañajan-drala’i fitoloñañeiy; le natolo’ondaty ila’eo ty bogady volamena ro’ale naho tsanganolo ro’arivo vaho sarom-pisoroñe enempolo-fito’amby. Aa le songa nimoneñe an-drova’e ao o mpisoroñeo naho o nte-Levio naho o mpañambeñeo naho o mpisaboo naho ondaty ila’eo naho o mpitoroñ’anjombao vaho o nte-Israele iabio, sindre tan-drova’e ao te tsatoke i volam-pahafitoy.

Misoratra ao amin'ny gazety anay

Apetraho ny Église Locale