Nekemia 3

Niongak’amy zao t’i Eliasibe rekets’o rahalahi’e mpisoroñeo, le niranjie’iareo i lalambein’Añondriy; navahe’iereo naho natroa’iareo o lala’eo; navahe’iareo pak’am-pitalakesañ’abo’i Meà eo, sikal’amy fitalakesañabo’i Kanàneley. Nifañefetse am’iereo o nte-Ierikoo t’ie namboatse; le nioza am’iereo ty namboare’i Zakore, ana’Imrý. Nandranjy i lalambeim-piañey o ana’i Hasenào, le hene namboare’iereo o faha’eo naho nampitroatse o lala’eo naho o tolà’eo vaho o sikada’eo. Nanonjohy iareo ty namboare’i Meremote, ana’i Oriià, ana’i Hakotse. Le nifanoiñe am’iereo ty namboare’i Mesolame, ana’i Berekià, ana’i Mesezabele. Le nifanoiñ’am’iareo ty namboare’i Tsadoke, ana’i Baanà. Nañorike iereo o nte-Tekoào, le namboatse, fe tsy najò’o roandria’iareoo amy tolon-draha’i Talèy ty fititia’iareo. Le namboare’Ioiadà, ana’i Paseà naho i Mesolàme, ana’i Besodeià i lalambei’i rova haehaey; napeta’iareo o faha’eo, le natroa’iareo o lala’eo naho o tolà’eo vaho o sikada’eo. Nifanoiñ’am’iereo ty namboare’i Melatià nte-Gibone naho Iadone nte-Merenote naho o nte-Giboneo vaho o nte-Mitspào, nimpitoroñe o mpiami’bein-tanañe alafe’i sakay atoio. Nifanoiñ’ama’e ty namboare’i Oziele, ana’i Karhaià, amo mpanefe volamenao, le nanonjohy aze ty namboare’i Kananià, ana’o mpanao rano-mañitseo, le nihafatrare’iereo t’Ierosalaime pak’amy kijoly mangadagadañey. Nanonjohy aze namboatse t’i Refaià ana’i Kore, ty mpifele’ty vakim-pifehea’Ierosalaime. Nanonjohy aze namboatse t’Iedaià ana’i Karomafe, tandrife’i anjomba’ey. Le nanonjohy aze namboatse t’i Katose ana’i Kasabneà. Le namboare’i Malkià, ana’i Karime naho i Kasobe, ana’i Pakate-moabe, ty fange’e raike vaho i fitalakesañ’abon-toñakey. Nanonjohy aze namboatse t’i Salome, ana’i Halokese, mpifehe’ty vakim-pifehea’Ierosalaime, ie naho o anak’ampela’eo. Namboatse i lalambeim-bavataney t’i Kanone naho o nte-Zanoakeo; niranjie’iereo naho natroa’iareo o lala’eo, o tolà’eo, o sikada’eo, reketse ty kiho arivo amy kijoliy pak’an-dalambeim-porompotse eo. Le namboare’i Malkià ana’i Rekabe, mpifehe am-paripari’i Betehakereme i lalambeim-porompotsey; niranjie’e le najado’e o lala’eo, o tolà’eo vaho o sikada’eo. Le namboare’i Salome, ana’i Kolkozè, mpifehe’ty fifehea’i Mitspà i lalambein-drano migoangoañey; rinanji’e naho nitafoe’e naho najado’e o lala’eo, o tolà’eo vaho o sikada’eo; naho ty kijolin’antara’i Siloake an-golobo’i mpanjakay, pak’amy fanongàñe mizotso boak’an-drova’i Davidey. Nanonjohy aze t’i Nekemià, ana’i Azboke, mpifehe ty vakim-pifehea’i Bete-tsore, namboatse ampara’t’ie nifanandrife amo kibori’i Davideo, pak’amy antara namboareñey vaho mb’amy anjombam-panalolahiy. Nanonjohy aze namboatse o nte-Levio, i Rekome ana’i Baný. Nanonjohy aze t’i Kasbià, mpifehe’ty vakim-pifehea’i Keilà, namboatse ho a i fifehea’ey. Nanonjohy aze namboatse o rahalahi’iareoo, i Bavaý ana’i Kenadade, ty mpifehe’ty vakim-pifehea’i Keilà. Nanonjohy aze ty namboare’i Ezere, ana’Iesòa, mpifehe’i Mitspà: ty fange’e tandrife’i fitroarañe mb’amy fañajam-pialiañey amy fiolahañey mb’eo. Nanonjohy aze an-kahimbañañe t’i Baroke, ana’i Zabày: namboatse ty ila’i fiolahañey pak’amy lala’ty anjomba’i Eliasibe mpisorombeiy. Nanonjohy aze t’i Meremote, ana’i Oriià, ana’i Hakotse, namboatse ty fange tovo’e boak’an-dala’i Eliasibey pak’am-para’i anjomba’i Eliasibey. Nanonjohy aze namboatse o mpisoroñeo, ondaty nte-montoñeo. Nanonjohy aze t’i Beniamine naho i Kasobe namboatse tandrife ty anjomba’iareo eo. Nanonjohy iareo t’i Azarià ana’i Maaseià ana’i Ananià namboatse añ’ila’i anjomba’ey. Nanonjohy aze t’i Binoý ana’i Kenadade, namboatse ty fange tovo’e boak’añ’anjomba’i Azarià ampara’i fiolahañey pak’an-kotso’e eo. Le i Palale ana’i Ozay, tandrife i fiolahañey naho i fitalakesañ’abo miboak’ami’ty anjomba ambone’i mpanjakaiy, añ’ila’ty kiririsam-porozò eo. Nanonjohy aze t’i Pedaià ana’i Parose. O mpitoroñ’anjomban’Añahare nimoneñe e Ofeleo, ty namboatse tandrife ty lalambein-drano maniñana naho i fitalakesañ’abo maningìy. Nanonjohy iareo, namboare’o nte-Tekoao ty fange’e tandrife i fitalakesañ’abo jabajaba maningìy, pak’amy kijoli’i Ofeley. Ambone’i lalam-bein-tsoavalay ty namboare’o mpisoroñeo, songa tandrife ty anjomba’e. Le nañorike iareo namboatse tandrife i anjomba’ey t’i Tsadoke ana’Imere. Nanonjohy aze ty namboare’i Semaià ana’i Sekanià, mpañambeñe i lalam-bey atiñanañey. Nanonjohy aze namboatse ty fange tovo’e t’i Kananià ana’i Selemià naho i Kanone ty ana-dahy fah’ene’i Tsalafe. Nanonjohy eo t’i Mesolame, ana’i Berekià namboatse tandrife i akiba’ey. Nanonjohy aze t’i Malakià, raik’amo mpanefe volamenao, namboatse pak’amy fange’o mpitoroñ’anjombao naho o mpanao balikeoy, aolo’i lalam-beim-pisavañe eo pak’amy efetse ambone’i kotsokeiy. Le namboare’o mpanefe volamenao naho o mpanao balikeo ty añivo’i efetse ambone’i kotsokeiy pak’amy lalambein’añondriy. Aa naho jinanji’i Sanbalate t’ie namboatse i kijoliy, le niboseke vaho am-piforoforoañe mandofiry ty nañabiaña’e o nte-Iehodao. Nisaontsie’e añatrefa’o rahalahi’eo naho o lahindefo’i Someroneo ty hoe: Ino ty amboare’o nte-Iehodà mavozoo? Hamboatse an-tsatrin-troke hao? Hanao soroñe hao? Ho fonire’iareo ami’ty andro’e hao? Hampisotrafe’iereo amo votrim-porompotse niforototoe’iereoo hao o vatoo? Aa hoe t’i Tobià nte Amore mpiama’e: Toe hirotsake i kijolim-batoy te anganiha’ty fanaloke i amboare’iareoy. Mijanjiña ry Andrianañahare’ay fa sirikaen-jahay, le afotero añ’ambone’iareo o inje’iareoo, le atoloro ho kopaheñe an-tanem-pandrohizañe añe; le ko takonañe o hakeo’eo vaho ko faopaoheñe añatrefa’o o tahi’eo, ie mikai-jaka ama’o añatrefa’o mpamboatseo. Aa le namboare’ay i kijoliy vaho nifampikatoke iaby i kijoliy pak’ami’ty antsasa’ty haabo’e; ie nitoloñeñe an-joton-troke.

Misoratra ao amin'ny gazety anay

Apetraho ny Église Locale