Matio 12

Ie henane zay, niranga vare niriñariña ami’ty andro Sabata t’i Iesoà. Nisaliko o mpiama’eo vaho nampipototse loham-bare naho kinosokoso’iareo am-pitàñe ho kamaeñe. Ie nioni’o Fariseoo, le hoe iareo ama’e: Heheke manao ty faly tsy anoeñe ami’ty Sabotse o mpiama’oo. Hoe ty natoi’Iesoà: Tsy fa vinaki’areo hao ty nanoe’i Davide, ie nisaliko naho ondati’eo añ’anjomban’Añahare ao, ie nikama i mofo-miatrekey, ze tsy azo kamaeñe naho tsy o mpisoroñeo avao? Tsy vinaki’areo amy Hake ao hao te beteke miranga-Hake ami’ty Sabata o mpisoroñe añ’anjomban’Añahareo vaho malio-tahiñe? Eka, itaroñako te etoañe ty ambone’i anjombay. Aa naho napota’areo ty hoe: Fiferenaiñañe ro paiako fa tsy soroñe, le tsy ho nafà’areo ty malio tahiñe, amy te Talè’i Sabata y i ana’ondatiy. Ie heneke i andro rezay le nienga mb’eo t’i Iesoà nizilike am-pitontona’iareo ao. Teo t’indaty mate fitàñe, aa le hoe ty ontane’iareo ama’e: Vantañe hao ty mampijangañe ami’ty Sabotse? Le hoe re tam’iareo; Ia ama’areo aman’añondry mijoñe an-davake ao ami’ty andro Sabata, ty tsy mañakats’aze? Lombolombo izay t’indaty, aa le mete vaho mañeva, ty manao soa ami’ty Sabotse. Aa le hoe re am’indatiy: Ahitio o fità’oo. Napololo’e i fità’ey, vaho nivoatse manahake i ila’ey. Fe nifandrimboñe o Fariseoo, nikinia ty hañoho-doza ama’e. Niarofoana’Iesoà o ereñeren-tro’iareo; le nisitake; maro ty siloke nañorike aze, vaho fonga jinanga’e; hinatahata’e tsy hampahafohinañe aze, hampijadoñe ty nampisaontsieñe Isaia: Ingo ty mpitoroko tinendreko, i jinoboko mampinembanebañe ty trokoy; hapetako ama’e ty Troko, vaho ho taroñe’e amo fifeheañeo ty hatò. Tsy ho hemban-dre, tsy hilay, vaho tsy ho janjiñeñe an-dalañe ey ty fiarañanaña’e. Tsy ho potora’e ty vinda demoke, vaho tsy hakipe’e ty lamesa mañatoeñe ampara’te ajado’e ho nainai’e ty hatò, i Tahina’ey ro fitamà’o kilakila ondatio. Nasese ama’e t’indaty fey naho moañe, niazo’ty kokolampa, le hinaha’e. Niisa’i lahialeñey le nilatsa vaho nanao ty hoe: Tsy ie hao i Ana’i Davidey? Nahimbam-pahazo izay o Fariseoo le nanoiñe ty hoe: Tsy mañary kokolampa indatiy naho tsy i Baalzebobe talè’o kokolampao avao. Niarofoana’Iesoà ty vetsevetse’iareo, le nirazaña’e ty hoe: Ho koake ze fifeheañe mifampiria, le tsy hitroatse ze rova ndra anjomba mifanao hereñ’an-tihy. Naho roahe’i mpañìnjey ty mpañinje, le hifampiria iereo, aia ty hijadoña’i fifehea’ey? Aa naho i Bèlzebobe ro añariako kokolampa, inoñe arè ty tsy androaha’o ana’areoo irezay? Aa le ie ro ho mpizaka anahareo. Fa naho i Arofon’Añaharey ro añariako kokolampa, le toe fa migadoñe i fifehea’ey. Aia ty himoaha’t’indaty añ’anjombam-panalolahy hamaoke o vara’eo naho tsy irohiza’e hey? Izay vaho hakopa’e i anjombay. Mandietse ahy ze tsy mindre amako, naho mifary ahy ze tsy mirekets’amako. Aa le itaroñako te fonga hafahañe amo ana’ondatio ze hakeo naho hateràñe, fe tsy hapoke am‘ondatio ty fiterateràñe i Arofo Masiñey; ze minday saontsy mamokafoka i Ana’ondatiy, le hiheveañe, fe tsy hahañe ami’ty sa toy ndra amy sa ho aviy ze minday rehake fanambaitambaiñeñe i Arofo-Masiñey. He hasoao ty hatae ty amo voa’e soao, ke ampimomoho ty hatae ty amo voa’e mimontamontañeo; fa inao ty hatò: o voa’eo ty aharendrehañe ty hatae. Ry fiosoñan-dapètakeo! Aia ty hahafivolaña’areo raha soa kanao raty? Isaontsiam-palie ty fandopoaran’arofo. T’indaty soa, boak’amo vara añ’arofo’e soao ro mañakatse hasoa, le t’indaty tsereheñe, hirik’amo vara an-tro’e tsivokatseo ro mampiboake haloloañe. Hoe iraho ama’areo, ze hene entañe saontsie’ondaty, le sindre ho volilie’e amy andro zakay. O saontsi’oo ro izakañe azo, naho o sata’oo ro hamàrañe azo. Ie henane zay, nimb’amy Iesoà mb’eo ty ila’o Fariseoo naho Androanavio, nanao ty hoe: Te hahatrea viloñe ama’o boak’andindiñe ao zahay. Tinoi’e ty hoe: Ty tariratse raty naho karapilo ro mitsoetsoeke viloñe; fe tsy hitoloram-biloñe naho tsy ty vilo’i Jonà; fa manahake t’ie tan-tro’i fiañe jabajabay telo andro naho telo haleñe, le ho telo andro naho telo haleñe an-tro’tane ao i Ana’ondatiy. Hitroatse amy zakay o nte-Niniveo mindre ami’ty tariratse toy hamàtse aze, amy t’ie nitolike am-pisolohoañe amy tsei’i Jonày, fe lohà’i Jonà iraho. Hiongake amy zakay i mpanjaka ampela’i Sebay mindre ami’ty tariratse toy, hamàtse aze, amy t’ie nihirike añ’olon-tane añe nijanjiñe ty hihi’i Solomona; fe intoy iraho, lohà’i Solomona. Ie miakatse amy t’indaty ty anga-maloto, le miranga toetse tsy aman-drano mipay fitofàñe fe tsy manjo; le hoe re: Himpoliako i kijà nihirifakoy. Ie pok’ao, zoe’e kòake, soa fipalirañe, vaho nihentseñeñe. Le angala’e kokolampa fito raty ta ty vata’e, mindre ama’e naho manozìtse ao vaho raty te am-baloha’e ty fiai’indatiy. Izay ty ho ie ami’ty tariratse tsivokatse toañe. Ie mbe nisaontsy amy lahialeñey, inao nijohañe alafe ao ty rene’e naho o rahalahi’eo, nipay ty hifanaontsy ama’e. Le hoe t’indaty tama’e: Inao, mipay ty hahaisake azo ty rene’o naho o rahalahi’oo. Natoi’e ty hoe i nisaontsy ama’ey: Ia o rahalahikoo? naho ia ty reneko? Le nahiti’e mb’amo mpiama’eo o fità’eo vaho nanao ty hoe: Iretoañe o roahalahikoo naho o rahavavikoo vaho ty reneko! Ze manao ty satrin’arofon-dRaeko andindìñ’ao ro roahalahiko naho roahavaveko vaho reneko.

Misoratra ao amin'ny gazety anay

Apetraho ny Église Locale