Iehosoa 5

Aa naho jinanji’o hene mpanjaka’o nte-Amore alafe’Iardeney mañandrefañeo, naho ze hene mpanjaka’o nte Kanàne marine i riakey te nimaihe’Iehovà aolo’o ana’Israeleo o rano’Iardeneo ampara’t’ie tafatsàke, le nitronake ty arofo’iareo vaho tsy nahakofòke ty amo ana’Israeleo. Ie henane zay, hoe t’Iehovà am’Iehosoa: Tseneo meso am-bato pìlake vaho savaro indraike o ana’Israeleo ho fañindroe’e. Aa le nitsene mesom-bato pilake t’Iehosoa, vaho nisavare’e e Gibeate-ha-aralote eo o ana’Israeleo. Zao ty talim-panavara’Iehosoa iareo: toe nihomak’am-patrambey an-dalañe eo ze hene ondaty niakatse i Mitsraimeo; o lahilahio, o lahindefoñeo, ie fa niavotse i Mitsraime. Fa nivotso-boy ondaty iaby niakatse boak’aoo, fe tsy nisavareñe ze hene ondaty nasamak’am-patrambey amy lalañe niakara’iareo i Mitsraimey, amy te efa-polo taoñe ty nañaveloa’o ana’Israeleo am-patrambey añe, ampara’te nihomake i fifeheañe iabiy, o lahindefoñe niavotse i Mitsraimeo, ie tsy nañaoñe ty fiarañanaña’Iehovà; i nifantà’Iehovà te tsy hapò’e hahaoniñe i tane nifantà’Iehovà aman-droae’iareo te hatolo’e antikañey, tane orikorihen-dronono naho tanteley. Aa le nibeize’e o ana’iareoo handimbe iareo, ie ty nisavare’Iehosoa, tinampake kanao tsy nivotso-boy amy lalañey. Naho niheneke ty fanavarañe i valobohòke iabiy le nitofa an-tobe’e ao ampara’te nimelañe. Hoe ty tsara’Iehovà am’Iehosoa: Anindroany t’ie namarimbariñe ty inje’i Mitsraime tsy ho ama’areo. Aa le nitokaveñe ty hoe Gilgale i toetsey, ampara’te henane. Ie nitobe e Gilgale ao o ana’Israeleo le nambena’iareo i Fihelañ’amboney ami’ty hariva’i andro faha folo-efats’ambi’i volañeiy amonto’Ieriko ey. Nikamà’iareo ty voka’ela’i taney amy loak’andro’i Fihelañ’Amboney: mofo po-dalivay naho tsako tono amy àndroy. Nijihetse amy andro nañorike i nikamà’iareo ty voka’i taneiy i maney vaho tsy nahazo mane ka o ana’Israeleo, f’ie nikama ty vokan-tane Kanàne amy taoñe zay. Narine’Ieriko t’Iehosoa t’ie nampiandra fihaino naho nahaisake te inge t’indaty aolo’e, am-pità’e ty fibara tsinoake; vaho nimb’ama’e mb’eo t’Iehosoa, nanao ty hoe: Ama’ay v’iheo ke amo rafelahi’aio? Le hoe re, Aiy! Izaho mpifehe o lahindefo’Iehovà o ty nivotrahako etoa. Aa le nibabok’an-dahara’e an-tane eo t’Iehosoa le niambane nanao ty hoe: Ino o ho saontsie’ty talèko amy mpitoro’eio? Le hoe ty mpifehen-dahindefo’Iehovà o tam’Iehosoa: Afaho am-pandia’o o hana’oo; amy te miavake o toetse johañe’oo. Le nanoe’Iehosoa.

Misoratra ao amin'ny gazety anay

Apetraho ny Église Locale