Volily 13

Hoe ty nitsara’Iehovà amy Mosè, Añiraho ondaty hitingañe an-tane Kanàne añe, ie hatoloko amo ana’Israeleo, songa amantoho ondaty raike o fifokoan-droae’eo, fonga mpamelek’am’iereo. Aa le nampionjone’i Mosè boak’am-patrambei’i Parane ao iereo ami’ty nandilia’Iehovà, songa mpiaolo’o ana’Israeleo indaty rey. Aa le zao o tahina’iareoo: tam-pifokoa’i Reòbene, t’i Samoà ana’i Zakore; tam-pifokoa’i Simone t’i Safate ana’i Horý; tam-pifokoa’Iehodà t’i Kalebe ana’Iefonè; tam-pifokoa’Isakhare t’Igale ana’Iosefe; tam-pifokoa’i Efraime t’i Hoseà ana’i None; tam-pifokoa’i Beniamène t’i Paltý ana’i Rafò; tam-pifokoa’i Zebolone t’i Gadiele ana’i Sodý; tam-pifokoa’Iosefe, tam-pifokoa’i Menasè: t’i Gadý ana’i Sosý; tam-pifokoa’i Dane, t’i Amiele ana’i Gemalý; tam-pifokoa’i Asere t’i Setore ana’i Mikhaele; tam-pifokoa’i Naftalý t’i Nakhbý ana’i Vofsý; tam-pifokoa’i Gade, t’i Geoele ana’i Makhý; Ie ro tahina’ondaty nafanto’i Mosè hitingañe i taneio, le novae’i Mosè ty tahina’i Hoseà ho Iehosòa. Aa le nirahe’i Mosè iereo hitingañe an-tane Kanàne añe naho nafanto’e ty hoe: Mionjona mb’amo Negeveo mb’eo vaho mañambonea mb’am-bohibohitse añe, le isaho te inoñe i taney naho ondaty mimoneñe aoo ke maozatse ke maifoifo, he tsy ampeampe he maro; le i tane imoneña’iareoy, ke soa he raty; naho o rova itoboha’iareoo ke t’ie tobe he arikoboñen-kijoly; le i taney ke kobokara he tsy mamokatse; ke mitiry hatae he tsie. Aa le mahasibeha vaho añandeso ty voka’i taney. Toe san-doha-voam-balòboke henane zay. Aa le nienga iereo nijoko boak’am-patrambei’i Tsine mb’e Rekhobe am-pimoaha’i Hamate mb’eo. Le nionjoñe mañatimo naho nigodam-b’e Kebrone naho Akimane naho e Sesaý vaho e Talmaý, mb’amo ana’i Anàkeo mb’eo. (Naoreñe fito taoñe taolo’i Tsoane e Mitsraime añe ty Kebrone.) Le nivotrak’am-bavatane’Eskole eo iereo vaho nibira tsampam-baloboke rekets’angaroza’e raike nampitarazoeñe ondaty roe am-baoñe, naho nangalak’ampongabeindañitse vaho aviavy. Natao Vavatane’i Eskole i taney amy angaroza nihitsife’o ana’Israeleoy. Ie efa-polo andro añe le nimpoly i nitampoñe i taney rey, le niheo mb’amy Mosè naho i Aharone vaho i valobohò’Israeley am-patram-bei’i Parane e Kadese mb’eo ninday saontsy ama’e naho amy valobohò’Israele iabiy, vaho naboa’iereo ty voka’i taney. Le hoe ty natalili’iareo ama’e, Nigodañe’ay i tane’nañiraha’o anaiy. Toe iorikorihan-dronono naho tantele, hehe ty voka’e. Fe misañatse ondaty mimoneñe amo taneo; le faheran-kijoly fatratse o rova’eo vaho jabajaba; mbore nioni’ay ao o ana’i Anàkeo. Mimoneñe an-tane atimo ao o nte-Amalekeo; le mimoneñe am-bohibohitse ao o nte-Kheteo naho o nte-Iebosèo vaho o nte-Amareo; le mimoneñe añ’olo’i riakey naho añ’olo’i saka Iardeney o nte-Kanàneo. Nampianjiñe’i Kalebe añatrefa’i Mosè ondatio, nanao ty hoe: Antao hionjoñe mb’eo amy zao hitavañe i taney, tsy kalafo te mahagiok’aze tika. Fe nanao ty hoe ondaty niharo-lia ama’eo: Tsy lefen-tika ty hionjoñe haname ondatio amy t’ie maozatse te aman-tika. Le naboele’iereo ty talily nahatsonevotse o ana’Israeleo amy tane nitingane’iereoy, ami’ty hoe: I tane niranga’ay mpitingañey, le tane mampibotseke o mpimone’eo, vaho mijoalajoala ze hene ondaty niisa’ay ama’e. Nioni’ay ondaty joakeo (toe tarira’ondaty joake o nte-Anàkeo); le nihoe valala am-pañentea’ay zahay vaho zahay am-pahaisaha’iareo.

ニュースレターを購読する

Église Locale をインストール