Mikà 4

F’ie amo andro honka’eo, le horizañe ho abo amo vohitseo ty vohin-anjomba’Iehovà, haonjoñe ambone’o haboañeo; vaho hivovotse mb’ama’e mb’eo ondatio. Le homb’eo ty fifeheañe maro hanao ty hoe: Antao hionjom-b’am-bohi’Iehovà mb’eo, mb’amy anjomban’Añahare’Iakobey. hañòha’e antikañ’o sata’eo, hañaveloan-tika o lala’eo. Hionjoñe boake Tsione ao ty Hàke, vaho hirike Ierosalaime ao ty tsara’Iehovà, hizaka añivo’o kilakila ondatio vaho ho toroa’e lily o foko maozatse tsietoitane añeo. Le ho pehe’iareo ho fangaly o fibarao naho ho fañeteke o lefo’iareoo. Tsy hifañonjom-pibara o rofokoo, vaho tsy hiòke hialy ka. Songa hiambesatse ambane’ty vahe’e t’indaty naho ambane’i sakoa’ey eo, tsy ao ty hahahembañe iareo, fa nitsara ty falie’Iehovà’i Màroy. Sindre hanjotik’ami’ty añaran-drahare’e o kilakila’ondatio; fe hañavelo ami’ty tahina’Iehovà Andrianañaharen-tika nainai’e donia tika. Hatontoko amy andro zay, hoe t’Iehovà, ze mikoletra, naho havoriko ty nasiotse añe vaho i nanilofakoy. Hanoeko sehanga’e i nikoletray naho fifeheañe maozatse i nasiotsey. ie ho fehe’Iehovà am-bohi’i Tsione ao, henane zay naho ho nainai’e añe. Le ihe, ry Fitalakesañ’Abo i Lia-Raikey, ty haboa’i anak’ampela’i Tsioney; eka, homb’ama’o mb’eo re; hitotsake eo i fifeheañe taoloy, ty fifeleha’i Anak’ampela’Ierosalaimey. Ino ty ikoiakoiaha’o? Tsy amam-panjaka hao? Nihomake hao i Mpanoro azoy, ihe fihine’ty fanivontivoñañe manahake ty fitsongoan-drakemba? Minioniòra, mañeña, hisamaha’o, ry anak’ampela’i Tsione, manahake ty ampela mitsongo; fa hiavote’o henaneo i rovay, himoneñe an-kivok’ao, am-para’te mandoake e Bavele ao; añe irehe ho hahañe; añe ty hijebaña’Iehovà azo am-pità’o rafelahi’oo. Ie henanekeo maro ty fifeheañe mifanontoñe hialy ama’o, manao ty hoe: Ee t’ie ho tivaeñe, naho hahafisamba i Tsione o fihainon-tikañeo. Fa tsy fohi’iareo ty ereñere’Iehovà; naho tsy apota’iareo ty safiri’e; Ie ro nanontoñe iereo hoe ampemba an-toem-pamofohañe eo. Miongaha, mamofoha, ry anak’ampela’i Tsione; fa hanoeko viñe ty tsifa’o, naho hanoeko torisìke o hotro’oo; handemodemoke t’indaty maro; vaho hengae’o am’Iehovà o nivokare’iareo tsy too; ho amy Talè’ty tane bey toiy ty vara’iareo. Mifanontona am-pirimboñañe, ry anak’ampelam-pirimboñañeo fa vinandro’iareo tika; nilafàe’iareo an-kobaiñe ty fiambina’i Mpizaka’Israeley.

ニュースレターを購読する

Église Locale をインストール