Hebreo 6

Aa le apòn-tikañe o fañòheñe i Norizañey fototseo vaho hitoañe mb’ami’ty haañonañe, tsy haoreñe indraike i manantam-pisolohoañe amo sata mateo, naho ty fatokisañe aman’Añahare, naho ty fañòheñe i filiporañey, i fanampezam-pitàñey, i fivañonan-ko veloñey, vaho i zaka tsy modoy. Le ie ty hanoen-tika naho sitran’Añahare. Aa naho nihazavaeñe, fa nitsopeke i falalàn-dikerañey, fa nanoen-ko mpitraok’amy Arofo Masiñey, nikama amy saontsin’Añahare soay naho amo haozara’i sa ho aviio, f’ie midisa-voly: le tsy ho lefe’e ty himpoly hisoloho, ie nampipeke ho am-bata’e indraike i Anan’Añaharey, hamoraborak’aze ho salareñe. Toe tahien’Añahare i tane isiha’i orañe mifiafia betek’ama’ey hitiria’ty àñañe mañasoa o nañalahalàñe azeoy. F’ie mamoa fatike naho hisatse, le tsy jefa’e, antitotse hafatse, hagadon-ko forototoeñe. Aa ndra te taroñeñe, ry rañetse, iantofa’ay raha soa te amy zay, toe raha minday fandrombahañe. Tsy atao tsy to t’i Andrianañahare handikofa’e o fitoloña’areo aman-koko amy tahina’eio, ie miatrake o noro’eo naho toe mbe mañolotse. Le salalae’ay t’ie songa anjoañe fahimbañañe hoe izay, pak’amy nitilifireñey hañenefañe i fitamàñey, aa soa re te tsy mihenekeneke, fa mitsikombe o mpandova’o fitamàñeo am-patokisañe naho am-pahaliñisañe. Amy t’ie nampitamaen’Añahare t’i Abraàme, naho tsy teo ty ambone’e hitangea’e, le nifanta amy fañova’ey, ty hoe: Toe fitahiañe, ty hitahiako azo naho fangitsikitsihañe ty hampanaranàhako azo. Aa ie nitamà am-pahaliñisañe, ro nahazo i nampitamaeñey. Toe mititik’aman-joke ondatio, le am-panta hamenteañe aze, soa t’ie higadoñe tsy am-pandierañe. Izay ka t’i Andrianañahare, ie te hampalange amo mpandova’i nampitamañeio te tsy miova i nisafiria’ey, le nivente’e am-panta, soa te ami’ty raha roe tsy mihotike—ie tsy mahay mandañitse t’i Andrianañahare, le mahazo fañosihañe fatratse tika nibotatsake mb’am-pipalirañe ao hivontititse amy fitamàñe nitaroñeñe aman-tikañey ie miòreñe naho fatratse hoe vato-fantsike añ’arofon-tikañ’ao, naho mimoake an-kalo’i tsingarakarakeiy, i niziliha’Iesoà fiaolon-tikañey, ie nanoeñe Mpisorom-bey nainai’e amy famosora’i Melkizedekey.

ニュースレターを購読する

Église Locale をインストール