Samoele I 29

Natonto’o nte-Pilistio e Afeke eo ty valobohò’iareo vaho nitobe marine i rano migoangoa’Iezreeley o ana’Israeleo. Aa ie nandahatse o mpirai-lia’e zato naho arivoo o talèm-Pilistio, le nivoly i Akise t’i Davide naho ondati’eo. Le hoe o talèm-Pilistio; Manao inoñ’atoy o nte-Evreo? Le hoe ty natoi’i Akise amo talèm-Pilistio, Tsy i Davide hao i mpitoro’i Saoley nimpiamako tamy andro zay, o taoñe rezaoy? Ie mboe tsy nahatreavako hila mifototse amy nivotraha’e amako pake henaneo. F’ie niboseha’o talèm-Pilistio le hoe ty asa’o talèm-Pilisitio ama’e: Ampolio hibalike mb’amy toetse natolo’o azey mb’eo tsy hindre aman-tika an-kotakotak’ao tsy mone hivalike ho rafelahy t’ie mialy, inoñe ty ho fifampilongoañe soa ama’e naho i talè’ey naho tsy o loha’ondaty retiañeo? Tsy ie hao i Davide nitakasie’iereo an-tsinjake ty hoe: Zinama’i Saole o arivo’eo naho i Davide o aleale’eo? Kinoi’i Akise ama’e amy zao t’i Davide le nanao ama’e ty hoe: Kanao veloñe t’Iehovà, vañon-drehe, le soa am-pahatreavako ty fiavota’o naho ty fimpolia’o amy valobohòkey pak’amy ihe nindre amakoy; le tsy nahatrea hila ama’o iraho sikal’amy andro nomba’o amako pake henaneo; f’ie tsy no’o talèo. Aa le mimpolia, le mañaveloa am-panintsiñañe, tsy hanjehara’o o talèm-Pilistio. Aa hoe t’i Davide amy Akise, Ino o nanoekoo? Ino ty nioni’o amy mpitoro’oy amo hene andro nindrezako ama’o pak’androanio, te tsy hionjonako hialy amo rafelahin-talèko mpanjakao? Le hoe ty natoi’i Akise amy Davide: Fantako t’ie soa am-pahatreavako, manahake ty anjelin’Añahare; fe sinaotsi’o talèm-Pilistio ty hoe t’ie tsy hitraok’aman-tika hionjom-ban-kotakotake mb’eo. Aa le mañaleñaleña rekets’o mpitoro’i talè nindre ama’oo; le mañampitsoa, ie mazava, le miavota. Aa le niampitso t’i Davide, ie naho ondati’eo niavotse amy maraiñey, nimpoly mb’an-tane’o nte-Pilistio mb’eo; vaho nionjomb’e Iezreele mb’eo o nte-Pilistio.

Iscriviti alla nostra newsletter

Installa Église Locale