Samoele I 28

Ie amy andro zay; nifanontoñe hifañotakotak’añ’aly am’Israele o lahin-defon-te-Pilistio; le hoe t’i Akise amy Davide, Mahafohina an-katò t’ie ro hindre amako mb’an-kotakotake rekets’ondati’oo. Le hoe t’i Davide amy Akise, Toe ho isa’o ty hanoe’o mpitoro’oo. Le hoe t’i Akise amy Davide: Aa le ihe ho mpañambeñe ty lohako nainai’e. Ie amy zao fa nivilasy t’i Samoele le hene nandala aze t’Israele naho nalente’iareo e Ramà an-drova’e ao. Toe fa natao’i Saole soike amy taney ze jiny naho mpandrombo. Aa le nifanontoñe naho nimb’e Soneme mb’eo o nte-Pilistio naho nitobe eo; fonga natonto’i Saole ka t’Israele vaho nitobe e Gilboa ao. Aa ie nioni’i Saole ty hatsifotofoto’o nte-Pilistio, le nihembañe vaho nangebahebake añ’arofo. Nañontanea’i Saole t’Iehovà, fe tsy nanoiñe aze t’Iehovà, ndra ami’ty nofy ndra ami’ty Orime ndra am-pitoky. Aa le hoe t’i Saole amo mpitoro’eo: Ipaiao rakemba jiny hombàko hañontaneako. Le hoe o mpitoro’eo ama’e: Inao, te Endore ao ty rakemba jiny. Aa le nañova vintañe t’i Saole naho nañova saroñe naho nindre lia ami’ty lahilahy roe vaho nivotrak’amy rakembay haleñe; le hoe re, ehe miambane ama’o mizekèa ho ahy naho trobòho hiakara’i ho toñoneko tahinañe ama’oy. Le hoe i rakembay ama’e, Inao, toe fohi’o i nanoe’i Saoley, te niroahe’e an-tane atoy o jinio naho o doanio; aa le ino ty andamaha’o fandrik’ami’ty fiaiko, hampikenkañe ahy? Aa le nifanta ama’e t’i Saole amy Iehovà ami’ty hoe: Kanao veloñe t’Iehovà, tsy hanan-kakeo irehe amo raha zao. Le hoe i rakembay: Ia ty hakareko? Le hoe re: ampionjono t’i Samoele. Aa ie nahaoniñe i Samoele i rakembay le nikoaik’am-peo mafe; le hoe i rakembay amy Saole, Ino ty namañahia’o ahy? Toe ihe o Saoleo! le hoe i mpanjakay ama’e, Ko hemban-drehe. Ino o oni’oo? Le hoe i rakembay amy Saole, nahatrea zañahare mionjoñe boak’an-tane ao. Le hoe re, Manao akore ty vinta’e? Le hoe re: Mb’etoa t’indaty bey mikolopoke sarimbo. Le nifohi’i Saole t’ie i Samoele vaho nidrakadrakak’an-tane niambane ama’e. Le hoe t’i Samoele amy Saole, Ino ty nitsoborea’o ahy hampionjona’o? Le hoe t’i Saole, Am-poheke iraho; mialy amako o nte-Pilistio fe nienga ahy t’i Andrianañahare, tsy manoiñe ahy ka ndra am-pitoky ndra ama’nofy; aa le nikoiheko irehe hampahafohiñ’ahy ty hanoeko. Aa le hoe t’i Samoele, ino arè ty hañontanea’o ahy kanao namorintseñ’azo t’Iehovà vaho fa rafelahi’o re henaneo? Fa toe nanoe’Iehovà i nitsarae’e amakoy! Toe tinava’Iehovà ama’o ty fifehea’o vaho fa natolo’e an-drañe’o Davide; amy te tsy nihaoñe’o ty fiarañanaña’Iehovà, tsy nihenefe’o amy Amaleke ty haviñera’e miforoforo; toly ndra nampifetsaha’Iehovà o raha zao anindroany. Aa le hatolo’Iehovà am-pità’o nte-Pilistio t’Israele naho ihe ka, le hitraok’amako irehe naho o ana-dahi’oo te maray; vaho hasese’Iehovà am-pità’o nte-Pilistio i tobe’Israeley. Nilàntsiñe an-tane eo ami’ty hajoalan-tsandri’e t’i Saole fa naharevendreveñe aze ty enta’i Samoeley; ie tsy aman-kaozarañe, fa tsy nikama mofo amy àndroy ndra amy haleñe iabiy. Aa le nañarine amy Saole i rakembay vaho nioni’e te nangebahebake ty fiai’e, le hoe re ama’e: Inay! hinao’o mpitoroñ’ampela’oo ty fiarañanaña’o, naho napoko an-tañako ty fiaiko le nihaoñeko o saontsy nanoe’o amakoo; aa ehe te ho haoñe’o ka ty feo’o anak’ampata’oo, le angao hanjotsoako mofo minjilite’e; vaho mikamà hihaozara’o, hañaveloa’o mb’am-pomba’o mb’eo. F’ie nifoneñe, ami’ty hoe: Tsy hihinan-draho. Aa le sambe nandrisik’aze o mpitoro’eo rekets’i rakembay vaho hinao’e o fiarañanaña’iareoo. Nitroatse boak’an-tane re le niambesatse am-pandreañe eo. Nanañe bania vinondrak’añ’anjomba’e ao i rakembay, le nihepakepake nandenta aze; le rinambe’e ty mona, naho nibokobokoe’e naho nitoñafe’e ama’e ty mofo tsy aman-dalivay; vaho nazotso’e amy Saole, naho amo mpitoro’eo; le nikama iereo. Niongak’amy zao iereo niavotse mb’eo haleñe.

Iscriviti alla nostra newsletter

Installa Église Locale