Mpañoke 11

Ahifiho ambone’o ranoo ty mofo’o, le ho tendrek’azo andro maro añe. Zarao fito o vara’oo, he valo, fa tsy fohi’o ze hankàñe mete hifetsak’an-tane atoy. Ie milodolodo o rahoñeo, le adoa’e mb’an-tane atoy ty orañe; aa ke mihorokodoboke mañatimo ty hatae, he mañavaratse, le amy ideboña’ey ty handrea’e. Tsy hitongy ty mpisamba tioke; vaho tsy hanatake ty mpijilo rahoñe. Kanao tsy apota’o ty lala’i tiokey, naho tsy fohi’o ty fitiria’o taolañe an-kovi’i mivesatsey, le tsy fohi’o ka ty fitoloñan’Añahare mpamboatse ze he’e. Tongiso maraindray o tabiri’oo, vaho ko mampi-po pitàñe te hariva; amy te tsy fohi’o ty ho lefe, ke ty etoañe ke i eroañey, hera ho soa iaby iereo roroe. Mamy o hazavàñeo, naho mahafale fihaino ty mahaoniñe i àndroy. Aa ndra te veloñe maro-taoñe t’indaty ee te hirebeha’e iaby, le ho tiahi’e abey o andron-kamoromoroñañeo, t’ie ho maro, toe hakoahañ’iaby ty ho avy. Mandià taroba ry ajalahy, ihe mbe tora’e, ee te hampahaehak’azo ty tro’o amo andron-katora’oo. Oriho ty fisalalam-po’o naho ty fañiria’o maso’oo, fe mahafohina t’ie hampiatrefen’Añahare an-jaka ty amy hene rezay. Ano soike o halorèan-tro’oo, vaho ampihankaño ami’ty sandri’o ty falovilovia’e; fa toe mihelañe ty hatorañe naho ty haañom-piaiñe.

Baiboly Tandroy

Copyright © 2023 Steve Lellelid Language: Tandroy (Malagasy, Tandroy-Mahafaly) DRAFT VERSION This translation is made available to you under the terms of the Creative Commons Attribution Share-Alike license 4 — CC-BY-SA-4.0 — CC-BY-SA-4.0

Iscriviti alla nostra newsletter

Resta aggiornato su nuovi profili, eventi e novità della piattaforma.