Korinto I 2

O ry longo, ie nivotrake ama’areo iraho, le tsy an-dàn-tsaontsy, tsy an-kihitse ty nitaroñako i nietak’aman’Añaharey. Fa nifaharako te tsy hahafohiñe ndra inoñ’inoñe ama’areo ao naho tsy Iesoà Norizañey vaho ie pinèke. Nimokotse t’ie tama’areo, nihembañe, vaho nisilofe’ty nevenevetse. Le tsy an-tsaontsin-kihitse mahasintoñe i rehakoy naho i fitaroñakoy, fa ami’ty fampalangesañe i Arofoy naho añ-ozatse, soa tsy hioreñe ami’ty hakante’ondaty ty fatokisa’areo fa ami’ty faozaran’Añahare. Toe mitaroñe hihitse amo àñoñeo zahay, fa tsy ty hihi’ty sa toy, ndra ty a o mpifehe’an-tsa toio, ie sindre miha-modo. Toe mitaroñe i hihin’Añahare nakafitsey zahay, i hihitse naetake pak’henaney, f’ie norizan’Añahare taolo’ty sa toy hañonjona’e antika, ie ninofi’o mpifehe an-tsa toio, fa naho nifohi’iareo, le tsy ho pinè’iareo i Talèn’engeñey. Fa hoe ty pinatetse: Fihaino tsy nahaisake, ravembia tsy nahajanjiñe, vaho tsy nizilike añ’arofo’ondaty ze he’e hinalankan’Añahare ho a’o mikoko azeoo. F’ie nibentabentaren’Añahare aman-tikañe añamy Arofo’ey, fa mitsoeke ze he’e i Arofoy, naho o raha miheotse aman’Añahareo. Aa vaho ia am’ondatio ty mahafohiñe ze mitoloñe amy t’indaty ao naho tsy ty arofo am’indatiy? Manahake izay, tsy fohi’ondaty ty faharofoanan’Añahare naho tsy i Arofon’Añaharey. Ie amy zay, tsy ty fañahi’ty tane toy ty rinamben-tika, fa i Arofo boak’aman’Añaharey, soa te ho fohintika o raha natolon’Añahare antika am-patariha’eo, ie o taroñe’aio, tsy an-tsaontsy nanare’ty hihi’ondaty fa amo naò’i Arofo Masiñeio, ie mampidodea o rahan’Arofoo amo aman’Arofoo. Toe tsy maharambe o rahan’Arofon’Añahareo ty fañereñerea’ondatio, fa hagegeañe ama’e, tsy eo ty hahafohina’e, amy t’ie rendreke an’arofo. Mitsikaritse ze he’e ty aman’arofo, fe tsy leo ty ila’e tsikariteñe. Aa vaho: Ia ty mahafohiñe ty faharofoana’Iehovà hañòke aze. Toe aman-tika ty fitsakorea’i Norizañey.

Iscriviti alla nostra newsletter

Installa Église Locale