Iesaià 15

Iesaià 15

Ty bekoeñe i Moabe: Amy haleñe androtsahañe i Arey, mongotse ty Moabe; amy haleñe androtsahañe i Kirey, mongotse ty Moabe. Nionjoñe mb’amy Baite mb’eo re, mb’amy Dibone, naho o haboañeo hirovetse; mb’amy Nebò naho i Medeba, mañaolo t’i Moabe; sola peake ze hene añambone, hinitsike ze fonga somatse. Misikin-gony an-dalañe eo; songa mangololoike, mangoihoy ty rovetse o an-tafon’anjomba naho an-tameañeo. Mikaikaike ka ty Kesbone naho i Elalè; tsanoñeñe pak’e Iatsà ty feo’iareo; mikointsañe o lahin-defo’i Moabeo; mitoirañe an-tro’e ao ty fiai’e. Tolihe’ty troko t’i Moabe, ie mitriban-day mb’e Tsoare mb’eo o sehanga’eo, i kiloa telo taoñey; fa amy fitroara’i Lotitey eo ty angololoiha’iareo am-panganihañe, amy lala’i Koronaimey ty ikoiha’iareo hazolava. Koake o rano’i Nimrimeo; hene niforejeje ty ahetse, niheatse o bokao, tsy aman’antsetra. Aa le hasese’iareo mb’an-Torahan-Tsohihy mb’eo ty vara nivokare’iereo, ty vokatse nahaja’iareo an-driha ao. Nanitsike i Moabe pak’añ’efe-tane’e añe i koikey, i fañaoloa’ey pak’Eglaime, i fangololoiha’ey pake Birelime. Atse-dio ty rano’i Dimone; fe mbe ho tompeako ty Dimone, ty liona, amo hivoratsake boake Moabeo, naho amo sehanga’i taneio.

Iscriviti alla nostra newsletter

Installa Église Locale