Tolom-Piràhe’e 13

Irezao o mpitoky naho mpañòke mpiamy Fivori’i Antiokiaio: i Barnabasy naho i Simeona natao Nigera, le i Losio nte-Kirenìa naho i Menahema (i niara-nibey amy Heroda mpanjakay) vaho i Saole. Ie nitalaho amy Talè naho nililitse, le hoe i Arofo Masiñey: Aviho ho ahy t’i Barnabasy naho i Saole ho ami’ty fitoroñañe ikanjiako iareo. Aa ie nililitse naho niloloke, le nampitongoàñe fitàñe vaho nampionjoneñe mb’eo. Amy nañiraha’i Arofo Masiñey, le nizotso mb’e Seleokia mb’eo iereo vaho nijon-dakañe mb’e Kiprosy. Ie toly e Salamisy le nitaroñe i tsaran’Añaharey amo fitontona’o Jiosio. Tam’iereo ka t’i Jaona ho mpiatrake. Ie niranga i toko-nosey naho nandoake Pafo añe, le nifanjò ami’ty mpañorik’andro, mpitoki-vìlañe Jiosy atao Bar-Iesosy, nireketse amy Sergio Paolo ragova, ondaty mahilala; kinanji’indatiy t’i Barnabasy naho i Saole fa nipay ty hijanjiñe o tsaran’Añahareo. Fe natreatrè i Elima ambiasa (añara’e izay) ie nipay ty hampiamboho i ragovay tsy hiantoke. Nilifotse i Arofo Masiñey t’i Saole, i natao Paoliy ka, le niharefe’e t’i Elima vaho nanoa’e ty hoe: Ty pea ze fonga famañahiañe naho fìtake, ana’i Ratiy tìa! rafelahi’ze atao havañonañe! Tsy mete apo’o hao ty fampikelohañ’o lalam-banta’i Talèo? Ingo te ama’o henaneo ty fità’i Talè, le ho goa, tsy hahaisake i àndroy heike. Aa le nivotrak’ama’e ami’ty manao zao ty zono naho ieñe vaho nitoantoañe mb’eo re nipay ty hitarik’aze am-pitàñe. Ie nioni’i ragovay i nanoeñey, le niantoke, toe nahavereñ’aze ty fañòhañe i Talè. Aa le nijon-dakañe boake Pafo t’i Paoly naho o rañe’eo nimb’e Perga’i Pamfilia mb’eo, fe nisitak’am’iereo t’i Jaona nimpoly mb’e Ierosaleme añe. Ie hirike Perga le nandoak’Antiokia’i Pisidia, naho niheo am-pitontonañ’ao ami’ty andro Sabotse vaho niambesatse. Ie nitampetse ty famakiañe i Hake naho o Mpitokio, le nampanohine’o mpifehe’i fitontonañeio ami’ty hoe: O roahalahio, hera aman-tsara mahaosike ondatio, le milañonà. Niongake t’i Paoly nanondrotondro fitàñe le nanao ty hoe: Ry nte-Israeleo naho ze mpañeveñe aman’Añahareo, mijanjiña! Jinobon’Añahare’ondati’Israele retoañe o roaen-tikañeo, le nonjone’e ondatio t’ie nitaveañe ho renetane an-tane Egipte ao, vaho am-pionjonam-pità’e ty niaoloa’e iareo nienga i taney; Miha-efa-polo taoñe ty nañantoàña’e am-patrambey añe. Ie rineba’e ty fifeheañe fito e Kanana ao, le natolo’e iareo i tane’iareoy ho lova va’e efajato taoñe tsy limampolo. Añe i nitaliliañey, le tinolo’e mpizaka ampara’i Samoela mpitoky, ie nihalaly mpanjaka iereo, le tinolo’e i Saole ana’i Kisy, afe’i Benjamina, efapolo taoñe. Ie nasinta’e, le noriza’e t’i Davide ho mpanjaka’iareo. Le hoe ty nitaroñe’e: Nitreako t’i Davide ana’Iesesày, ondaty mañorike ty troko; hene hanoe’e o satrikoo. Boak’amo tarira’indatio, ty amy tsara’ey, ty nanesean’Añahare am’Israele ty Mpandrombake, Iesoà. Taolo’ty fiavi’e le nitseize’i Jaona ty filiporam-pisolohoañe ho amy ze hene ondati’Israele, aa ie fa ho niheneke ty fitoroña’i Jaona le nainai’e nanoa’e ty hoe: Atao’areo ho ia v’iraho? Tsy ie iraho. Hehe t’ie tonjohize’ty tsy mañeva ahy hampidraitse o hana’eo. O rolongo, ana’o tarira’i Abraàmeo, naho ry mpañeveñe aman’Añahare ama’areo, ie nampihitrifañe o entam-pandrombahañe zao. Toe nihenefa’o mpimoneñe e Ierosalemeo naho o mpifehe’eo, ie tsy nahafohiñ’aze ndra ty talili’o Mpitoky vakieñe boa-t Sabata o, fe nihenefa’iareo ami’ty namàra’iareo aze. Aa ndra te tsy nioniñe ty tali’ty hañohofan-doza ama’e, mbe nihalalie’iereo amy Pilato ty hamonoañe aze. Ie hene nifonire’iareo ze pinatetse ty ama’e, le nazotso amy hataey vaho nirohoteñe an-kibory ao, f’ie natroan’Añahare amy havilasiy, vaho nahaoniñe aze andro maro o nindre lia ama’e hirike Galilia pake Ierosaleme añeo. Iereo ro valolombeloñe am’ondatio henaneo. Taroñe’ay ama’areo i Talili-soa nampitamañe an-droaentikañey t’ie nihenefen’Añahare aman-tika ana’iareo, amy nampitroara’e I esoày. Ie i pinatetse amy Sabo faharoeiy, ty hoe: Anako irehe; Anindroany ty nisamahako azo. Ty hatò’t’ie nampitroare’e amy havilasiy tsy hibalike mb’am-pihomahañe ao ka, ro tsinara ami’ty hoe: Hatoloko azo o fitahiañe vantañe naho to’i Davideo. Hoe ka ty taroñe’ty ila’e: Ho tana’o tsy hihomake i Masi’oy. I Davide, ie fa nitoroñe o mpiharo-nono ama’eo amy natoron’Añahare azey, le nirotse naho nirohoteñe aman-droae’e ao t’ie nihomake. Fe tsy nimomoke i natroan’Añahare amy havilasiy. Aa le mahafohina ry longo, te indatiy ro itaroñañe ty fisolohoañe amo tahiñeo, le ie ro añahàñe o mpiatoo amy ze hene raha tsy nilefe’i Hà’i Mosèy hahàñe. Mitaoa arè, kera hizò i nisaontsieñe amo Mpitokio ty hoe: Oniño ry mpanivetive, mañaraharà vaho mikoromaha, fa hitoloñe am-pitoloñañe amo andro’areoo iraho, fitoloñañe tsy hiantofa’ondaty, ndra te eo ty hampalange aze ama’areo. Aa ie niakatse o Jiosio, le nihalalie’ondatio te ho lañoneñe ami’ty Sabotse here’e i tsara zay. Ie nigadoñe i fivoriy, maro amo Jiosio naho amo mpitalaho nivalike ho Jiosio ty nañorike i Paoly naho i Barnabasy ze nitaroñe am’iereo, nañosike iareo hifahatse amy hasoan’Añaharey. Ie amy Sabata here’ey, didý tsy i rova iabiy ty nifanontoñe hijanjiñe o tsaran’Añahareo. Aa naho niisa’o Jiosio i màroy, le niliforem-parahy vaho niliere’iereo o raha nisaontsie’i Paolio. Nanoiñe ty hoe am-pahavaniañe t’i Paoly naho i Barnabasy: Tsy mete tsy nitaroña’ay hey i tsaran’Añaharey, fe kanao nikihoe’areo le nizaka-vatañe t’ie tsy mañeva i haveloñe nainai’ey, inao arè! mitolik’amo kilakila ondatio zahay amy nandilia’i Talè anaiy, ty hoe: Nanoeko hazavàñe amo kilakila ‘ndatio irehe, hinday fandrombahañe sikal’añ’olo-ty tane toy añe. Ie jinanji’o kilakila ondatio izay le niehake vaho niasy ty tsara’Iehovà; vaho hene niantoke ze tinendre ho amy haveloñe nainai’ey. Le niboele nahatsitsike i taney ty tsara’Iehovà. Fe sinigì’o Tehodao o rakemba bey mpitalahoo naho ondaty bei’i rovaio, le trinobo’iereo fampisoañañe amy Paoly naho i Barnabasy vaho rinoa’iereo amy taney. Aa le nabò’iereo ama’e ty lembok’am-pandia’iareo naho nimb’e Ikonioma añe, vaho nilifotse ty ehake naho i Arofo Masiñey o mpiòkeo.

Tilaa uutiskirjeemme

Asenna Église Locale