Matio 9

HNijon-dakañe t’i Iesoà, le nimpoly mb’an-tanà’e mb’eo iereo. Nendeseñe ama’e ty nisilofa’ty hakepehañe nandre an-tihi’e eo; nivazoho’Iesoà ty fatokisa’iareo le hoe re am’indaty silokey: Anake, misomoboha fa hinaha ty figahiñan’Añahare o tahi’oo. Hoe ty nitsakorean’arofo’o androanavy ila’eo: Miteratera itìa. Nioni’Iesoà o vetsevetse’iareo, le nanoa’e ty hoe: Ino ty aereñerea’areo raty añ’arofo ao? Ty aia ty mora volañeñe, ke ty hoe: Malio hakeo irehe, he ty hoe: Mitroara, mañaveloa? Fe, ty hampahafohinañe anahareo te aman-dily an-tane atoy i Ana’ondatiy hañaha tahiñe: le hoe re amy nisilokey: Mitroara, rambeso o tihi’oo vaho mañaveloa. Niongake re, nimpoly mb’an-kiboho’e mb’eo. Nahaisake i lahialeñey le loho nañeveñe vaho nandrenge an’Andrianañahare mpanolotse faozarañe hitoloñe hoe izay am’ondatio. Ie nienga t’i Iesoà, le nahavazoho ondaty niambesatse am-pandambañam-pifampikaloan-drala eo; i Matio ty tahina’e. Le hoe re tama’e: Antao hañorike ahy. Aa le niongake re nañorike aze. Nampihova’e añ’anjomba hikama, le ie nikama, intoa ty piaroteñe naho lo-tsereke maro am-pandambaña’e eo, le hehe t’ie nitrao-pikama amy Iesoà naho amo mpiama’eo. Nioni’o Fariseoo zay le nanao ty hoe amo mpiama’eo: Ino ty itraofa’i Talè’areoy fikama amo piaroteñe naho borololoo? Jinanji’Iesoà izay, le hoe re: Tsy o jangañeo ro mipay ho tahañe, fa o silokeo. Akia, tsatsiho hey i pinatetsey: Fiferenaiñañe ro paiako fa tsy soroñe; tsy nivotrake atoy iraho hañaha o vantañeo, fa o mpanan-tahiñeo. Le nomb’ama’e mb’eo o mpiamy Jaonao, nanao ty hoe: Manao akore te beteke mililitse zahay naho o Fariseoo, fe tsy mililitse o mpiama’oo? Le hoe ty natoi’Iesoà: Tsy mahafirovetse ndra mililitse o mpiamy mpañengaio t’ie mbe am’iereo? Ho avy ty andro hanintahañe i mpañengay, izay iereo vaho hililitse. Tsy eo ty mampianto ty ila’ty sikiñe vao ami’ty tsorodea, amy te manibake i tsorodeay i takekey mañindra i riatsey. Mbore tsy añiliñañe divay vao ty zonjon-kolitse hambo’e, ke hipoñake i holitsey le hilongañe i divaiy, vaho hianto i holitsey; aiy! toe ailiñe an-jonjon-kolitse vao ty divay vao le songa mihaja i roroey. Ie sinaontsi’e izay, pok’eo ty roandriañe niambane ama’e, nihalaly ty hoe: O Talè, nisimba aniany i anak’ampelakoy, ehe mihavia, hampitongoà’o fitàñe, hameloñ’aze. Niongake t’i Iesoà le nimbeo, ie naho o mpiama’e ama’eo. Intia, te nimb’am-boho’e ao nitsapa ty riran-tsarimbo’e ty rakemba nisilofe’ty lio-lava folo taoñe ro’amby; ie naereñère an-trok’ao ty hoe: Ndra te i saro’ey avao ty paoheko, le ho haha amy zao. Nitolike t’i Iesoà le nanoa’e ty hoe: Misomobòha anako, ty aman’Añahare, andriañen-dre, fa nahajangañ’azo o fatokisa’oo. Nijangañe amy oray avao re. Ie nizilike añ’anjomba’i roandriañey ao, le nahavazoho ondaty maro nandala, le nanoa’e ty hoe: Miavota iaby, vaho ko mirovetse, miroro i ajajampelay fa tsy simba. Fe natao’iareo ho ondaty misole, le hoe iereo, Tsy nitrean-tika hao t’ie nirobake? Aa ie nakare’Iesoà alafe ao, le niheo mb’ama’e re nitsapa ty taña’e vaho nitroatse i ajajampelay. Niboele amy tane iabiy i talily zay. Nisitake t’i Iesoà, le nihitrihitry mb’ama’e ty fey roe nikaikaike ty hoe: Tretrezo zahay, ry Ana’i Davide. Ie avy amy anjombay, le nisitsitse mb’ama’e i fey rey, naho nanoa’e ty hoe: Hampijangañe anahareo ty fatokisa’areo. Niboleake amy zao o fihaino’indaty roe reio vaho nahaisake; nafanto’Iesoà am’iareo ty hoe: Asoao tsy ho fohiñe i raha zay. Niavotse mb’eo amy zao iereo nanitsike i taney, haharendrehae’e aze. Nienga t’i Iesoà, le nasese mb’ama’e t’indaty moañe niangara’ty kokolampa. Naria’e i kokolampay le nisaontsy i moañey. Nilatsa i lahialeñey, nanao ty hoe: Mbe lia’e tsy niisan-tika e Israele atoa ty manahake zao. Hoe o Fariseoo: Toe i talèn-kokolampay ty añaria’e anga-draty. Niariary mb’amo rova naho tanàñe iabio re nañoke amo fitontona’iareoo, naho nitaroñe i talili-soay naho nañafake ze hene areteñe vaho ze atao halemeañe. Nivazoho’Iesoà i lahialeñey, le niferenaiña’e, amy t’ie nifoezapoezake, nandrenàndre ey hoe añondry tsy amam-piarake. Le hoe re amo mpiama’eo: Maro o ampemba mizorazora eio, fe tsy ampe o mpanatakeo. Aa le halalio t’i Talè’o mahakama mizorazorao ty hañiraha’e mpanatake maro hanatake o ampemba’eo.

Tilaa uutiskirjeemme

Asenna Église Locale