Joda 1

I Joda, fetrek’oro’Iesoà Norizañey naho rahalahi’Iakobe, Ho amo nikanjieñe, navahen’Añahare Rae naho tambozoreñe am’Iesoà Norizañeio. Ampitoaboreñe ama’areo ty fitretrezañe naho ty fañanintsiñe vaho ty fikokoañe. Ry roañetse, nilozoheko sokitse i fandrombahañe itraofañey, fe inao ty nataoko: hàmake hañosik’anahareo himane i fatokisañe natoro amo noro’eo indraike nahahenekey. Amy te ao t’indaty nitsifitse añetake, ie nipatereñe haehae ty fàtse hizò iareo, ie tsy mañaon-Kake, mamotetse ty hasoan’Añaharen-tika ho an-kaloloañe vaho mitety Iehovà Andrianañahare tsi-roe-tsi-telo naho i Talèntika, Iesoà Norizañey. Te haniahy anahareo iraho, toe hene nifohi’areo hey, te ie rinomba’i Talè ondaty an-tane’Egipte añeo, le nimongore’e o tsi-niatoo, naho nitambozore’e an-drohy tsy modo am-pimoromoroñañe ao ampara’i zaka amy andro jabajabaiy o anjely tsy nitañe ty nañorizañe iareo naho nifary i toe’iareo do’ey; hambañe amy Sodoma naho i Gomora naho o rova nañohokeo, ie nivalijere an-karapiloañe nipay nofotse faly, vaho nanoeñe fandrazañañe, nafàtse ho lovilovieñe añ’afo ao kitro katroke. Toe manahake izay iretiañe, ie mametaveta sandriñe amo anofisa’iareoo, mañarinje mpanandily, vaho mañinje o amam-bolonahetseo. Fa ndra i Mikaela, talèn’anjely, ie nifañotak’amy mpañìnjey t’ie nifandietse amy fañòva’i Mosèy, tsy nahavany hanisý aze añ’endake, fa nanao ty hoe: Hitrevoha’t‘i Talè! Fe mañìnje o raha tsy apota’e ondaty retiañe, naho o raha nifohi’e boak’an-trokeo, hoe biby tsy mitsakore, izay ty mahamomoke iareo. Hankàñe am’iareo! Ie nitsile an-dala’i Kaina naho nifatrifatry nipay tambe ami’ty fandilara’i Balama vaho mirotsak’ami’ty fiola’i Kòra. Ie vato-haran-driake mietak’amo sabadidam-pikokoa’areoo mitrao-pikama tsy aman-kembañe; tea haneñe avao; rahoñe tsy aman-drano, ahofahofan-tioke; hatae an-tsaramanty tsy mamoa, indroe mate, nombotañe reke-bahatse; onjan-driake mivalitaboake mandoa voren-kameñarañe; vasiañe mirererere nañajàñe ieñe mimoromoroñe zafezanake. Nitokie’i Enoka, faha-fiton-tarira’i Dame, ka, ondatiy rey, nitaroñe ty hoe: Heheke, mitotsak’etoa t’i Talè aman’aleale’o noro’eo, hametsake zaka amy ze he’e, hañameloke ze tsi-aman-Kàke ty amo sata tsi-aman-Kàke nitoloñe’iareoo an-kaloloañeo, naho o tambaimbaiñe nanoe’i mpanan-kakeo tsi-aman-Kàke rezay ama’eo. Mpiñeoñeoñe iereo, mpaniñetiñe; mañorike o drao tsi-voka’eo; mivolam-pirengevohañe o vava’eo, mitsiriry laharañe, hañaramamoa’e. Ie amy zao, ry rañetse, tiahio i saontsy nente’o Firàhe’i Talèntika Iesoà Norizañeio taoloy; ie nitaroñe ty hoe: An-tsà honka’e, le hitoandratoandra an-kadrao tsy aman-Kàke o mpanivetìveo. Ie mpampiriaria—mpañorike ty draon-troke, tsy amañ’Arofo. F’inahareo, ry rañetse, ie mitomambao am-patokisañe miavake do’e naho mitalaho añamy Arofo-Masiñey, tambozoro i fikokoan’Añaharey, itamao ty fiferenaiña’i Talèntika Iesoà Norizañey minday haveloñe nainai’ey. Rambeso an-tretrè o ila’e mihañahañao. Rombaho ty ila’e, isintono boak’añ’afo ao, ferenaiño an-kahembañañe ka o ila’eo, le hejeo ndra ty sikiñe nileore’o nofotseo. Aa le ho amy mahatañ’anahareo tsy hitsikapy naho mahafitroatse anahareo ho tsy aman-kandra, an-kafaleam-bey mb’añatrefan’enge’e mb’eo, Ho aman’Añahare tokañe mahihitse, Mpandrombak’antikañe, ty engeñe naho volonahetse, fifeheañe vaho haozarañe, taolo’ze sa, henaneo vaho nainai’e donia. Amena.

Tilaa uutiskirjeemme

Asenna Église Locale