Iirmeà 12

Vantan-dRehe, ry Iehovà, ndra te ino ty ho nifandierako, f’ie mbe te hisafiry ama’o: Ino ty mampiraorao ty lala’o lo-tserekeo? Akore te hene mierañerañe o mikitro-draha ratio. Tinongi’o iereo, eka, le nivahatse; mitombo, le hehe te mamoa; ie marine azo am-palie, fe lavits’azo an-troke. Toe arofoana’o iraho ry Iehovà, mahavazohò ahy, naho mitsoke ty troko ke mb’ama’o; aveveo hoe añondry ho lentàñe iereo, avaho ho amy androm-panjamanañey. Ampara’te ombia i taney te handala, naho o hatae an-kivoke eio te hiheatse? Fonga nasintak’añe o bibio naho o voroñeo ami’ty hatsivokara’o mpimoneñeo, ie manao ty hoe: Tsy ho vazoho’e ty figadoña’ay. Ihe nitrao-pilay amo mpikovovokeo, le nahamokotse azo, aia ty hifandriadriaha’o amo soavalao? Aa ihe mikorovok’an-tane manintsiñe, hanoe’o akore te añ’ala-matahetse e Iordane ao? Ndra o rolongo’oo, naho ty anjomban-droae’o, songa namañahy azo ka, sindre nikorak’ama’o; ko iantofa’o ndra te anoe’e saontsy mora. Fa naforintseko ty akibako, fa nifarieko i lovakoy; fa natoloko am-pitan-drafelahi’e i kokoan’aikoy. Fa nanjare liona añ’ala ao amako i lovakoy, kanao nañaoloa’e, hejeko. Hoe vorom-banda mpitsatsa amako i lovakoy. Miatreatre añariary aze o vorom-pamaokeo. Akia, fonga atontono o bibin-kivokeo, endeso mb’etoa hamotseke. Mpiarake maro ty nampianto i tanem-balobokoy, fa linialia’iareo i tetekoy, nanoeñe ratraratra i tondako soay. Nampangoakoaheñe, Bangiñe! mitoreo aoloko eo; nampibabañoaheñe iaby i taney, amy te tsy haoñe’ondaty an-troke. Fa nivotraham-pampianto ze hene haboañe am-patram-bey añe; amy te mamotseke boak’añ’efe’i taney añe pak’amy añey ka ty fibara’Iehovà, fonga tsy aman-kanintsiñe ze atao nofotse. Nandrarak’ampemba iereo, fe nitatake fatike; nifanehake, f’ie tsy miraorao; aa le imeñaro ty havokara’areo, ty amy haviñera’Iehovà miforoforoy. Hoe t’Iehovà: Ty amo raty mañohok’ahio, o mitsapa i lova nampandovaeko ondatiko Israeleio, toe ho voroteko an-tane’iareo, hombotako am’iereo ty anjomba’Iehodà. Aa ie añe ty nañombotako iareo, le ho tretrezeko indraike; vaho hampoliko, songa mb’an-dova’e, sindre mb’an-tane’e. Ie amy zao, naho toe ianara’iareo ty sata’ondatikoo, ty hifanta ami’ty añarako: Kanao veloñe t’Iehovà, hambañe amy nañanara’iareo ondatiko ty hifanta amy Baale, le haoreñe aivo’ondatikoo ka iereo. F’ie naho tsy mañaoñe iereo, le ho voroteko i fifeheañe zay, hombotañe naho harotsake, hoe t’Iehovà.

Tilaa uutiskirjeemme

Asenna Église Locale