Iesaià 63

Ia o mb’atoy hirik’Edome, reketse lambam-Botsrà nimenaeñeo? i minday engeñe amo saro’eoy, i maràm-bintañ’ami’ty ha’ra’elahin-kaozara’ey? —Izaho mivolañe ami’ty hatò, fatratse te handrombake.— Aa vaho ino ty mahamena o saro’oo, naho ty sarimbo’o, manahake ty mpandia divay an-tsajoa ao? Izaho avao ty nandialia i fanindrian-divaiy, fa ondatio, leo raike tsy nimpiamako; eka ho liàko ami’ty fifomboko, naho hatsafeko ami’ty fiforoforoako; naho nifitse amo sikikoo ty lio’iareo vaho hene kinomatraoko o sarokoo, Toe androm-pañavahañe ty an-troko ao, fa tondroke ty taom-pijebañako. Nenteako te tsy teo ty hañolotse, niisako an-kalatsañe fe tsy teo ty hanozañe; aa le ty tañako avao ty ninday fandrombahañe ho ahiko, nanozañ’ahy ty fifomboko. Le niliako an-kaboseke ondatio, naho nimamoeko am-poroforo, vaho naretsako an-tane ty haozara’iareo. Ho taroñeko ty fiferenaiña’Iehovà, naho ty fijejoañe Iehovà, ty amo hene raha fanjàka natolo’Iehovà antikañeo, naho i fatariha’e ra’elahy amy anjomba’Israeley, i natolo’e iareo ty amo fitretreza’eoy naho amo fiferenaiña’e bey heneheneo, amy natao’e, ty hoe; Toe ondatiko iereo, anake tsy handañitse; Ie ro nandrombake iareo. Amo haferenai’iareo iabio, le niferenaiña’e, naho nandrombake iareo ty anjelim-piatrefa’e; ty fikokoa’e, toe i haleñ’arofo’ey ty nijebaña’e iareo naho notroñe’e vaho nivavè’e amo hene andro taoloo. Fe niola iereo, nanjehatse amy Arofo’e masiñey; aa le nifotetse re ho rafelahi’iareo; ie avao ty nialy am’iereo. Nitiahi’ondati’eo amy zao o andro taolo faha’i Mosèo: Aia i nampitroatse iareo amy riakey rekets’i mpiara-lia-rai’eiy? Aia i nampijoñe i Arofo’e Masiñey am’iereoy? ie nanehake ty fitàn-kavana’i Mosè am-pità’e lifots’engeñey; ie nandriatse i rano aolo’iareoy, hanoe’e tahinañe tsy modo ho aze; ie niaolo iareo hitsake i lalekey hoe te soavala ampatrañey, tsy hitsikapy? Manahake ty fizotsoan’añombe mb’am-bavatane mb’eo, ty nampitofà’i Arofo’Iehovà iareo; izay ty niaoloa’o ondati’oo, hanoe’o tahinañe bey volonahetse. Mijilova boak’andikerañ’añe, mivazohoa boak’amy akiba’o miavake lifots’engeñey; aia ty fahimbaña’o, naho o haozara’o ra’elahio, ty fitrekotrekon-kovi’o, naho o fiferenaiña’o ahio? nisebaneñe hao? Ihe ro Rae’ay; ndra te nofi’i Avrahame naho amoea’Israele; Ihe ry Iehovà ro Rae’ay, i Mpijebañe Anay Haehaey ro tahina’o. O ry Iehovà, ino ty ampandilara’o anay o lala’oo naho mampigañe ty tro’ay tsy hañeveñe ama’o? Mibaliha amo mpitoro’oo, amo fifokoan-dova’oo. Didý tsy ho rinoa’iareo ondaty navahe’o iabio, fa linialia’o rafelahi’aio i toe’o miavakey Fa ninjare hoe mbe lia’e tsy nifehe’o zahay, amy te tsy nitokaveñe amy Tahina’oy. Ehe te ho riate’o o likerañeo, hizotsoa’o mb’etoa, naho hiezeñezeñe añ’atrefa’o eo o vohitseo,

Tilaa uutiskirjeemme

Asenna Église Locale