Estere 6

Ie amy haleñey, niazo ty tsareke i mpanjakay; le linili’e te handesañe i bokem-pamoliliañe o talilioy, le vinaky añatrefa’i mpanjakay. Sinokitse te nitaroñe’i Mordekay i Bigtanà naho i Terese, mpiatra’i mpanjaka roe mpañamben-dalañe rey, ie nikinia hampipao-tañañ’amy Akasverose mpanjakay. Hoe i mpanjakay: Aa vaho akore ty niasieñe naho nampionjoneñe i Mordekay ty amy zay? Le hoe o mpitoro’i mpanjakay niatrak’azeo: Toe tsy nanoeñe inoñe. Le hoe i mpanjakay, Ia ty an-kiririsa ao?—ie amy zao fa nimoak’an-kiririsa’alafe’i anjombam-panjakay t’i Hamane, hisaontsy amy mpanjakay t’ie handradorado i Mordekay amy rafitse abo hinajari’e ho azey. Aa hoe o mpitoro’eo tama’e, Ingo, mijohañe an-kiririsa ao t’i Hamane. Le hoe i mpanjakay: Ampihovao. Aa le nimoak’ao t’i Hamane. Le hoe i mpanjakay tama’e, Ino ty hanoañe amy t’indaty tea’i mpanjakay asiñeñe?—naereñere’i Hamane: Ia ty ho tea’i mpanjakay asiñeñe naho tsy izaho? — le hoe t’i Hamane amy mpanjakay: Ty am’indaty tea’i mpanjakay asiñeñey, le aboake i sarom-panjaka fiombea’ey naho i soavala finingira’ey vaho i sabakam-bolonahetse fiombeañe añambone’e eo; le ampiseseheñe ami’ty raik’amo roandriam-bei’i mpanjakaio i saroñe rey naho i soavalay, hampisaroña’e indaty tea’i mpanjakay asiñeñey naho hampionjoneñe amy soavalay am-pañaveloañe an-dala’i rovay mb’eo vaho koiheñe aolo’e eo ty hoe: Zao ty hanoañe ondaty tea’i mpanjakay asiñeñeo. Aa le hoe i mpanjakay amy Hemane: Malisà arè, rambeso i saroñey naho i soavalay amy sinaontsi’oy le ano amy Mordekay nte-Iehoda mpiambesatse an-dalambeim-panjaka eo Izay; ko apo’o ndra loli’e amy nitaroñe’oy. Aa le rinambe’i Hamane i saroñey naho i soavalay naho naombe’e amy Mordekay naho nampionjone’e am-pirangàñe i lalan-drovay, nikoik’aolo’e eo, ty hoe: Zao ty hanoañe t’indaty tea’i mpanjakay asiñeñe. Le nimpoly mb’an-dalambeim-panjaka mb’eo t’i Mordekay. Fe nihitrihitry mb’añ’anjomba’e mb’eo t’i Hamane niojeoje, nitakon-doha. Natalili’i Hamane amy Zerese vali’ey naho amo rañe’e iabio i fonga nifetsak’ama’ey. Le hoe ondati’e mahihitseo naho i Zerese vali’ey ama’e: Naho tiri’Iehoda t’i Mordekay, ihe nafotsak’aolo’e eo, le tsy hahafitroara’o, fa tsy mete tsy hiridiñe añatrefa’e. Ie mbe nisaontsieñe, le pok’eo o mpiatram-panjakao nanaentaeñe i Hamane homb’amy sabadidake nihalankañe’i Esterey.

Tilaa uutiskirjeemme

Asenna Église Locale